Matthew 18

Yakꞌuz whulerwe dilhtsꞌine mbe suba ꞌukꞌenus díztiꞌ?

1ꞋEt ꞌoh daꞌ za Jesus yugha hodulꞌehne, highu nindil ꞌinkꞌez huyoodulhkut, “Yakꞌuz whulerwe dilhtsꞌine mbe suba kꞌus díztiꞌ?”

2ꞋEt Jesus tsꞌoodunyaz ꞌanih yulhni, ꞌinkꞌez butoh neínilhti. 3ꞋInkꞌez ꞌet ꞌúbulhni, “ꞋEt soo tsꞌihꞌun unꞌa nohdusni, ꞌaw ꞌutsꞌun unꞌa nalheꞌzahtne de, ꞌinkꞌez tsꞌoodunneyaz kꞌoh tsꞌe ꞌahtꞌoh nasahdliꞌ de, ꞌet de za yakꞌuz whulerwe unli-un whuz tihdulh. 4ꞋEt huwa ndun tsꞌoodunyaz, kꞌunꞌa yo ꞌududildzun-un, ꞌet ntsꞌe la yakꞌuz kꞌuneꞌ whulꞌen-un, ꞌenne za kꞌus hidilhtiꞌ-un tileh whe ꞌuntꞌoh.

5ꞋInkꞌez tsꞌoodunyaz, yukꞌoh tsꞌe ꞌuntꞌoh-un, Si sooziꞌ cha yukꞌoh tsꞌe yílhchoot-un, si cha suhílhchoot wheꞌ hoontꞌoh.” 6“ꞋEt hoontsꞌi tsꞌoodunne buba ꞌalha ꞌustꞌohne, tsꞌoodunne hoontsiꞌ tsꞌe ubonilhtꞌine, mbe la dune edújane, ꞌenne tse cho butsꞌilchun ehudinguz ꞌinkꞌez kꞌus takhulh-un ꞌet tábahano de, ꞌon nus hootázooꞌ.

Dune lubeshi itálhchulh-un, ꞌet whutsꞌu yúlha

7Ndi yun kꞌut dilhtsꞌine, hukwaya hoonli tuneꞌ ꞌutꞌenne, ꞌ dawhultsiꞌ-un, butsꞌu hóoltsꞌulh wheꞌ hintꞌoh. Hukwaya hoonli tuneꞌ whutitꞌen wheꞌ hoontꞌoh. ꞋInkꞌez mbe la oogha ꞌet ndúhooja-un, dawhultsiꞌ-un, hotiꞌelh wheꞌ hoontꞌoh! 8Nla kꞌus nke be hukwaya hoonli tuneꞌ ꞌantꞌen de, kꞌunintꞌas ꞌinkꞌez ꞌun tilhꞌis! Dzoh ninya kꞌus nyustꞌe bodinꞌai de, ꞌet whuz unꞌa ꞌilhiz be tsꞌukhuna-i nghaltsꞌut de, ꞌet ꞌon nus ꞌukꞌenus mba hootázooꞌ. ꞋEt hoontsꞌi nke nankultꞌoh cha ꞌinkꞌez nla nankultꞌoh cha bulh ꞌíntꞌoh whe kwun nalhnusne-i tanyoníno de, ꞌukꞌenus mba hootátsiꞌ. 9ꞋInkꞌez nyuna be tankꞌus nintꞌi de, nyuna ha nínꞌaih ꞌinkꞌez ꞌun ntilhꞌis! ꞋEt nyuna ꞌilho bulh za, ꞌet whuz unꞌa ꞌilhiz be tsꞌukhuna-i ngha nínzut de, ꞌukꞌenus mba hootazooꞌ. ꞋEt hoontsꞌi nyuna nankultꞌoh bulh kwun nalhnusne-i tanyoníno de, ꞌukꞌenus mba hootatsiꞌ.”

Ninta ninkatne, Jesus ꞌubutilhyih ha, ꞌet huba whusainya

10“ꞋEt ndunne tsꞌoodunne khun buka lheꞌnuzoohzin junih! ꞋAlhaꞌ bulizas yakꞌuz hudilhtsꞌi, ꞌenne bughu hinli ꞌinkꞌez SBá yakꞌuz usda-un bulizas ꞌahoolhyiz hinalh neꞌutꞌen.

11ꞋEt huwa ninta ninkatne, Yinka Dune Yeꞌ ꞌubutilhyih ha, ꞌet huba whusainya. 12Daja nahzun? Dune ꞌen whunizyat whunizyai (100) ꞌusbai ꞌutꞌi butoh ꞌilhoghun ninta nílhget de yuloh ꞌet néyuninla ꞌinkꞌez ndun ꞌilhoghun ninta nilhget-un, ꞌen dzulh kꞌuz yukawhenántai. 13Nayilhti de, tsꞌihꞌun unꞌa nohdusni ndunne yuloh ꞌet nébuninlane, ꞌenne bugha whunilhni. ꞋEt hoontsꞌi ndun ꞌilhoghun ninta nilhget-un, nayilhti de, ꞌen gha dahoolcho ꞌi be suba ꞌon nus whuntálhnih! 14ꞋEt whuz unꞌa za ndunne tsꞌoodunne, ꞌet ꞌilhoghun hoontsꞌi kwuncho yo tsꞌu tiyalh de, nohBá yakꞌuz usda-un, ꞌen ꞌaw hukwa lheꞌnizun.”

Nyulhutsin lubeshi be ndulhyo ꞌuja de, datánlelh?

15“ꞋO ꞌun cha nyulhutsin lubeshi be ndulhyo ꞌuja de, oozih neninya ꞌinkꞌez daja whe ndulhyo ꞌuja-un, whuꞌiz dóniꞌ. Nghuni yílhchoot de, nyulhutsin whuchꞌa nanilde wheꞌ hoontꞌoh. 16ꞋEt hoontsꞌi ꞌaw lhunyoozílhtsꞌai de, ꞌilhoghun kꞌus nane te ilhchoot ꞌinkꞌez ꞌet ooyoh tsꞌe natoohdilh. Nane kꞌus tane te mba lhgha ꞌúhudija de, ꞌet whuz unꞌa la ꞌuhótꞌeꞌ. ꞋI be la daja hutni, tsꞌiyai khuni tsꞌihꞌun unꞌa ꞌuhoneh. 17ꞋInkꞌez ꞌaw lhunoh oozílhtsꞌai de, ꞌet de Yakꞌusda ba ꞌilhunaoodulhne cha budóhni. ꞋEnne cha ꞌaw lhuboozílhtsꞌai de, ꞌet de mbe la ꞌaw ooba ꞌalha lheꞌhootꞌoh-un kꞌus mbe la sooniya ꞌilhunaoosꞌaih-un, ꞌet ndun lubeshi be ndulhyo ꞌuja-un, ꞌen ꞌenne bukꞌunꞌa noolhꞌen.

18ꞋAlhaꞌ dusni wheꞌ dusni, nohni ndai la ndi yun kꞌut oola dihtni de, ꞌi ndo yakꞌuz cha oola oodutitnih. ꞋEt ndi yun kꞌut ndai lhgha ꞌúhudija de, ꞌi ndo yakꞌuz cha lhgha ꞌúwhutanelh.

19Doo cha za ꞌunohdusni, ndai ookwa oodutalhkut-i, nane kꞌus tane ndi yun kꞌut lhgha nohba sooꞌ hoontꞌoh de, yakꞌuz usda-un sBá, ꞌen nohba ꞌuwhutilelh. 20ꞋEt huwa sooziꞌ gha nane kꞌus tane ꞌilhunaoodilh de, butoh ꞌustꞌoh wheꞌ hoontꞌoh.”

Lhba whunatsꞌodoolnoh-un

21ꞋEt Peter yughu ninya whe yoodulhkut, “SMoodihti sulhutsin lubeshi be sdulhyoh ꞌuja-un, dawhultsuk sdulhyoh lubeshi ꞌutilelh ꞌinkꞌez ooba whunaoodutiznoh? Lhtakꞌantꞌit tilah ꞌet ꞌuwhultsuk-un?”

22ꞋEt Jesus ndúyulhni, “ꞋAw lhtakꞌantꞌit lhduzusnih. ꞋEt lhtakꞌantꞌit whunizyat (70) ꞌet ꞌuwhultsuk dusni wheꞌ dusni.

23ꞋEt yakꞌuz kꞌúneꞌ whulꞌen-un, ꞌet nduhoontꞌoh: ꞌilhoghun lerwe unli daꞌ, ꞌet be ꞌulhnane, ꞌenne daltsuk be butsꞌú whulhꞌai, ꞌi tsꞌiyawh ye bubúlh lhanaoodutile hukwaꞌ ninzun. 24ꞋEt whunilhꞌen whe ꞌilhoghun be ꞌulhna-un dahinilhti ye yutsꞌú whulhꞌai-i, ꞌi 10,000 sooniya diztiꞌ-i, ꞌet ꞌultsuk. 25ꞋEt hoontsꞌi yukꞌelha yoolhtselh-i hooloh. ꞋEt lerwe dughuni be ꞌuyulhni; dune, ooꞌat, buzkeh, ꞌinkꞌez yutꞌi-i cha, tsꞌiyawh be ꞌóket. ꞋEt de ooba ꞌukꞌelha whutaleh.

26ꞋEt be ꞌulhna-un yubut nachániti ꞌinkꞌez yutsꞌun tedudli whe ꞌuyulhni, ‘Smoodih kꞌat, huba silhꞌi! Tsꞌiyawh mba kꞌelha whutiselh!’ 27Oomoodih yugha teꞌnanzin. ꞋEt ndai la ye yutsꞌu whulhꞌai-i, tsꞌiyawh yuba whunaoodilhnoh, ꞌinkꞌez whenayalhꞌaꞌ.

28ꞋEn ꞌulhna za ꞌaz whinya ꞌilhoghun dudulh ꞌulhna-un, ꞌen nayilhti. ꞋEn whunizyat whunizyai (100) sooniya tsꞌuditiꞌ-i, be yutsꞌu whulhꞌai. Yuzool ílhchoot ꞌinkꞌez uyúlhni, ‘Ndai la bé ntsꞌo zusꞌai-i, sba ookꞌelha hoolhtsi!’

29ꞋEt yubut dugwutsi be neninya ꞌinkꞌez yutsꞌu tedudlih whe ꞌuyulhni, ‘Kꞌat, huba silhꞌi. Tsꞌiyawh mba ꞌukꞌelha whutiselh!’

30ꞋEt hoontsꞌi ꞌaw lhuyoozilhtsꞌai. ꞋAyanꞌai ye yutsꞌu whulhꞌai-i, tsꞌiyawh yuba ꞌukꞌelha whutilhtselh whutsꞌun. 31ꞋOnghoh ꞌulhnane, tsꞌiyawh honalhꞌen dahooja la, tsꞌiyawh howu ni huzdliꞌ. ꞋEt huwa dumoodih tsꞌu whehandil ꞌinkꞌez tsꞌiyawh hidaniꞌ.

32ꞋEt ndúja-un, ꞌen oomoodih ꞌanih yudaniꞌ ꞌinkꞌez ndúyulhni, ‘Nyun ꞌulhna-un kꞌus ntsiꞌ-un ꞌintꞌoh! Stsꞌu tedindli ha huwa ndai stsꞌo zilhꞌai-i, tsꞌiyawh mba oonawhudizno! 33Ngha teꞌniszin, ꞌet whuz unꞌa za ꞌoneh hubaꞌ hoontꞌoh, nyulh ꞌulhna-un tsꞌun!’ yulhni. 34Oomoodih yulh hunilchꞌe. Dune dzoh nulhdehne, ꞌenne butlꞌa yálhti. Ye yutsꞌu whulhꞌai-i, ꞌi tsꞌiyawh yuba kꞌelha whutilhtselh whutsꞌun.

35ꞋEt nohni cha nohulhutsinke nintaꞌhantꞌen de, ꞌinkꞌez nohdzi be ꞌaw buba whunalhodulhnoh de, ꞌet de sBá yakꞌuz usda-un, whuz unꞌa za ꞌaw nohba whunaoodoolnoh ꞌaitꞌoh.”

Currently Selected:

Matthew 18: crx

Highlight

Copy

Compare