Matthew 17

Jesus ꞌutsꞌun whe be hóodiltsai

1ꞋEt whulh lhkꞌu tat dzin inleꞌ whe Jesus Peter, James, ꞌinkꞌez bulhutsin John, ndo dzulh kꞌuz dulh ubílya. 2ꞋInkꞌez bubut ꞌutsꞌun otꞌen suliꞌ. Oonin ꞌantsꞌi sa kꞌunꞌa ootsꞌu ha ꞌánduz, ꞌinkꞌez oonaih cha yus kꞌunꞌa ꞌulhyul suliꞌ. 3ꞋEt khuntsul Moses ꞌinkꞌez Elijah bulh bube hóodiltsai Jesus hibulh yálhduk.

4Peter Jesus yulhni, “NeMoodihti njan uzdilhtsꞌi-un hoonzoo. Hukwaꞌ ninzun de, tat-un whutꞌah ꞌutsꞌotilelh. ꞋIlhoghun nyun mba, ꞌilhoghun Moses ba, ꞌinkꞌez ꞌilhoghun Elijah ba.”

5Peter yalhduk whe khuntsul kwꞌus be tidatꞌen-i bukꞌeinde. Kwꞌus toh tsꞌe khuntsul ꞌuwhutni, “Ndun sYeꞌ soo ookꞌesiꞌ-un ꞌuntꞌoh. ꞋEn bulh hóonustꞌiꞌ. ꞋEn oozúlhtsꞌai!”

6Yugha hodulꞌehne hídantsꞌo whe hibut nachánildil, ꞌinkꞌez tube húnilhjoot. 7Jesus bughu ninya ꞌinkꞌez butꞌaiznai ꞌinkꞌez ꞌubulhni, “Dunadahdilh, whénulhjut iloh!” 8Ndo nahítatꞌen whe ꞌaw ꞌuyoonne hooloh. Jesus dichꞌoh za hinilhꞌen.

9Dzulh kꞌut whenáhudidil whe, Jesus khuni ulhtus-i be bubulh yalhduk ꞌubulhni, “Yinka Dune Yeꞌ yaidlane toh dunadija de za whutsꞌun ndet hoohꞌen-un, ꞌuyoonne dóhniꞌ!”

10Yugha hodulꞌehne huyoodulhkut, “Moses be ꞌudustlꞌus ꞌukꞌu nunáguzne, di ha ꞌuhutni, Elijah ꞌen cho whusatiyalh hubaꞌ hoontꞌoh hutni?”

11Jesus ndúbulhni, “ꞋAlha Elijah ꞌen cho whusatiyalh ꞌinkꞌez tsꞌiyai lhanaidutileh. 12ꞋEt hoontsꞌi nohdusni, Elijah ꞌudaꞌ whusainya whe ꞌuntꞌoh. ꞋInkꞌez ꞌaw tꞌehinúszun. Hukwaꞌ huninzun kꞌunꞌa ꞌuhuyinla. ꞋEt whuz unꞌa za ꞌenne bula kꞌez Yinka Dune Yeꞌ dzoh nutizut.” 13ꞋEt yugha hodulꞌehne, tsꞌiyawh John dune too be ꞌulhꞌen-un, ꞌen ghu yalhduk tꞌehonanzin.

Tsꞌoodun ntsiꞌ-i nudúdeh-i ooyudinda, ꞌen Jesus soo náꞌyinla

14ꞋAwet ꞌilhozdilne butanahundil whe ꞌilhoghun dune yughu ninya ꞌinkꞌez yubut dugwutsi be nenínya. ꞋInkꞌez ꞌutni, 15“SMoodihti syeꞌ oogha teꞌninzeh! Ookaootuzuk ꞌinkꞌez tube dzoh nuzut. Lhat tsudúltsꞌuk ꞌinkꞌez taltsꞌuk cha ꞌutꞌi. 16Ngha hodulꞌehne bughi nústih hoontsꞌi ꞌaw soo naꞌhuyooleh ꞌaitꞌoh.”

17ꞋEt Jesus ꞌuyulhni, “Nohni ꞌandit whudizulhne, nohni ꞌaw be ꞌalha ꞌuhoontꞌoh-i lhahtꞌih, ꞌinkꞌez tankꞌus zaꞌ ꞌihtꞌelh. Dawhuldzoh nohtoh tisdalh? ꞋInkꞌez dawhuldzoh nohba ndutistꞌelh? Deꞌ, nyeꞌ sghu nilhtih!” 18Ntsiꞌ-i nududeh-i ooyudinda-i, Jesus khuni ulhtus-i be hukwaꞌ yudániꞌ. ꞋEt whulh hulhgha za yutsꞌu ha nája ꞌinkꞌez tsꞌoodun soo naꞌuja.

19ꞋEt Jesus yugha hodulꞌehne, disoh tsꞌe highu nindil whe ꞌuhuyulhni, “Dahoontꞌoh huwa ndun tsꞌoodun ntsiꞌ-i nududeh-i ootsꞌu ha nátsꞌinooyoot ꞌaitꞌoh?”

20ꞋEt Jesus ꞌúbulhni, “Nohba ꞌalha lheꞌhootꞌoh ꞌet huwa ꞌaw oohleh ꞌaitꞌoh. ꞋAlha nohdusni ꞌanukat-i lheꞌniltsool-i, ꞌi mustard huyulhni, ꞌi kꞌunꞌa be nohba ꞌalha ꞌuhoontꞌoh de, ꞌet ꞌulcho de, dzulh njan whutsꞌun, nguz nailtsꞌut dahni de, ꞌaho ndutínelh. ꞋEt whuz unꞌa tsꞌiyaitsuk whuz unꞌa ꞌudahni de, ꞌet ndutítꞌelh.

21ꞋEt hoontsꞌi ntsiꞌ-i nududeh-i, netenadudli-i, ꞌinkꞌez soo tsꞌúhoonih, ꞌi be za dune butsꞌu ha nátsꞌiyuntiyulh wheꞌ hoontꞌoh.”

Jesus datitsah-un, ꞌet doo cha huwu yalhduk

22ꞋEt ꞌawet Jesus ꞌinkꞌez yugha hodulꞌehne, Galilee yun kꞌut hudilhtsꞌi whe ndúbulhni, “ꞋAwet nilhdukw Yinka Dune Yeꞌ, ꞌuyoonne dune tlꞌa hítilhtelh. 23Hituzilhghelh ꞌinkꞌez whulh tat dzin dunadutádalh.” ꞋEt huwu dantsꞌo whe tube tsꞌodi huzdliꞌ.

Jesus ꞌen cha lugliz whucho whuzooneya yukꞌelha hoolhꞌi

24Keyoh Capernaum whuz hoozdil whe ꞌilhoghun sooniya ꞌilhunaooꞌaih-un, Peter yughu ninya ꞌinkꞌez yoodulhkut, “Whunohodulhꞌeh-un ꞌen cha iloh lakw lugliz whucho whuzooneyaꞌ yukꞌelha hoolhꞌi?”

25“A,” ni. ꞋEt Peter yoh tsꞌu whinya. ꞋEt Jesus yutso yatílhduk ꞌinkꞌez ndúyulhni, “Simon, daja ninzun? Sooneya lerwene buba ꞌukꞌelha yutaleh-i, sooniya ꞌilhunahosꞌaih? Dichꞌoh bubuzkeh tilah kꞌus nꞌawh whutꞌenne tilah buba kꞌelha huwhulhtsꞌih?”

26ꞋEt Peter ꞌúyulhni, “Nꞌawh whutꞌenne, ꞌaw ꞌenne za.” Jesus uyúlhni, “ꞋEt ꞌalha dini. Lerwene bubuzkeh ꞌaw ꞌukꞌelha lhoohoolhꞌi.

27ꞋEt hoontsꞌi Capernaum whutꞌenne, ꞌenne nebulh hónilchꞌe hukwꞌunꞌa ꞌubutsꞌoolhꞌen ꞌaitꞌoh. Dugweꞌ, bun guz tsꞌinyalh ꞌinkꞌez oolhjas. Soo ꞌudechoo lho silhjus-i, ꞌi ooze lhchꞌaz ꞌuhoonleh. ꞋEt sooniya naitánꞌalh. ꞋI ilhchoot ꞌinkꞌez neba bugha íninꞌaih.”

Currently Selected:

Matthew 17: crx

Highlight

Copy

Compare