Matthew 16
16
Phariseene ꞌinkꞌez Sadduceene huwa ꞌítꞌen-un bubaꞌ hooleh hukwaꞌ huyoodulhkut
1ꞋAwet Phariseene ꞌinkꞌez Sadduceene cha, highu nindil ꞌinkꞌez huyóolhdzih whe huyoodulhkut, “Yakꞌuz whutsꞌun hooncha tuneꞌ whutꞌen-un, whunénolhtun ꞌaitꞌoh?”
2ꞋEt ꞌúbulhni, “Hulhgha tsꞌe ndo yat whunulhꞌen. Whudulkꞌun de, ꞌet dzin hoonzoo tileh dahni. 3Bundadaꞌ yat kwꞌus bulh dulkꞌun suliꞌ whunulhꞌen de, ꞌawet ꞌazih whudutitsiꞌ dahni. Nohni duba naꞌudzooꞌne ꞌahli! ꞋEt ndo yat dawhutꞌen la tꞌeoonáhzun. ꞋEt hoontsꞌi ndoyá whudizulh dawhutꞌen la, ꞌaw tꞌeoonuzáhzun! 4ꞋAndit yinka dilhtsꞌi lubeshi tsꞌu nintꞌine ꞌuhintꞌoh. ꞋAhoolhyiz dune tsꞌeke bulh nintaꞌhutitꞌelh-un, whutsꞌó nintꞌi. Hooncha huwa ꞌítꞌen-un whuntilhꞌelh hukwaꞌ hitisꞌen. ꞋEt hoontsꞌi ꞌaw hoohꞌen-un nohghá holtsꞌit ꞌaitꞌoh. Jonah bulh dáhooja inleꞌ la, ꞌet za whutihꞌelh wheꞌ hoontꞌoh!” ubúlhni, ꞌinkꞌez bughu whenája.
Huwo hooleꞌ Phariseene ꞌinkꞌez Herod bules untuldoh-i, ꞌi chꞌa ubúlhni
5ꞋEt nyan hoozki whe yugha hodulꞌehne lhes nahodilhnoh. 6ꞋEt Jesus ꞌubulhni, “Kahdli ndunne Phariseene ꞌinkꞌez Sadduceene cha, ꞌenne bules untuldoh-i chꞌa.”
7Lhulh yawhehunilhduk, “ꞋAw lhes lhtsꞌíꞌal ꞌet huwa ꞌutni.”
8Jesus tꞌeoonanzin whe ꞌet ꞌúbulhni, “Be ꞌalha nahzun-i untsool! ꞋEt huwaꞌ ꞌudahni. ꞋAw lhes whusálhahꞌal, ꞌet howu yalhduk? 9ꞋAwhuz eh tꞌeoonuzahzun? ꞋAw whunalhuzulhni whe kwulaiꞌ lhes ꞌi be 5,000ne gha náhꞌai, ꞌinkꞌez daltsuk chalhyal chꞌutízkat-i nalhdzooh? 10ꞋInkꞌez lhtakꞌantꞌi lhes ꞌi be 4,000ne ghaꞌ náhꞌai, daltsuk chalhyal chꞌutízkat-i, ꞌi nalhdzooh? 11Ntsꞌenꞌa ꞌahtꞌoh tꞌeoonuzahzun, ꞌaw lhes ghun nohbulh yalhuzusduk? ꞋUdaꞌ nohdasniꞌ, Phariseene ꞌinkꞌez Sadduceene cha, bules untuldoh-i huwohleꞌ.” 12ꞋEt ꞌaho tꞌehoninzun Phariseene ꞌinkꞌez Sadduceene cha, dune huhodulhꞌeh-un, ꞌet whuchꞌa buchꞌa huwahli, ꞌet ꞌuwhulhni. Lhes bulh untuldoh-i, ꞌi íloh uyúlhni.
Jesus ꞌen Christ ꞌuntꞌoh, ni Peter
13Jesus Caesarea Philippi buyun kꞌuz whinya whe yugha hodulꞌehne, buboodulhkut, “Si, Yinka Dune Yeꞌ ꞌustꞌoh, dunene, mbe whe ꞌustꞌoh hutni?”
14ꞋEt ꞌuhuyulhni, “Whulohne, nyun John dune too be ꞌulhꞌen-un ꞌintꞌoh hutni. Whulohne cha, Elijah ꞌintꞌoh hutni. ꞋOnghohne cha, Jeremiah ꞌintꞌoh hutni. ꞋInkꞌez whulohne nus hooꞌen-un ꞌilhoghun ꞌintꞌoh hutni.”
15ꞋEt ꞌubulhni, “Nohni doꞌ, mbe ꞌustꞌoh dahni?”
16ꞋEt Simon Peter yatilhduk, “Nyun Christ, Yakꞌusda khuna-un, ꞌen ooYeꞌ ꞌintꞌoh,” yúlhni.
17Jesus ꞌuyulhni, “Simon Jonah ooyeꞌ, ꞌukꞌenus hoonzoo-un nghá whultsꞌut! ꞋAw ndi yun kꞌut dune iloh nyunalhtsꞌet ha húhonꞌai. ꞋUBá yakꞌuz usda-un, nyunalhtsꞌet ha honꞌai. 18ꞋInkꞌez nyudúsni, nyun Peter ꞌintꞌoh. ꞋEt ndi tse ꞌi kꞌut slugliz neootasꞌalh. Njan Kwuncho ulhtus-i yo tsꞌu haindilne, ꞌenne hoontsꞌi ꞌaw whuchꞌa hoolhdeh ꞌaitꞌoh. 19ꞋEt yakꞌuz whulerwe usda-un, whulugli ntlꞌa tisdlelh. Ndai la yun kꞌut whedinguz-i, ꞌet ꞌudaꞌ yakꞌuz cha whedintꞌi. ꞋEt ndai la ndi yun kꞌut kꞌunainꞌuk-i, ꞌet yakꞌuz cha ꞌudaꞌ whuz unꞌa kꞌunatitꞌuk.” 20ꞋInkꞌez yugha hodulꞌehne khuniti be ubúlhni, “Khun te ꞌuyoonne dóhniꞌ junih si Jesus Christ, ꞌustꞌoh.”
Dzoh nutizut-un ꞌinkꞌez datítsah-un, ꞌet Jesus huwu yalhduk
21ꞋEt whutsꞌun Jesus yugha hodulꞌehne, whubunulhtun nus daootanelh la. Jerusalem tsꞌu tiyalh. Keyoh ꞌutso whudilhdzulhne, lubret bumoodihne, ꞌinkꞌez Moses be ꞌudustlꞌus ꞌukꞌu nunáguzne cha, ꞌenne bube lhat-un whe dzoh nuhítilhdzut, ꞌinkꞌez hituzilhghelh. ꞋInkꞌez whulh tát dzin dunadutádalh.
22ꞋEt Peter Jesus ꞌudun neínilhti ꞌinkꞌez hukwaꞌ yudániꞌ, “SMoodihti nyun Yakꞌusda ngha teꞌuntazeh! ꞋAw nyulh ꞌet ndúhoneh ꞌaitꞌoh!”
23Peter yutsꞌu nálhꞌa ꞌinkꞌez ꞌuyulhni, “Satan stꞌa nenínyaih! Sba dzoh ꞌudini! Yakꞌusda datꞌen-un, ꞌaw howu nuni lhnuzinzut. Ndi yun kꞌut dune neꞌhutꞌen-un, huwun nuni ninzut!”
Mbe la whe khuna-un Jesus gha ninta ooninꞌai de, ꞌen whe khuna-un whuchꞌa ootalhdoh
24Jesus ꞌet yugha hodulꞌehne ndúbulhni, “Dune seꞌ ꞌutꞌen kꞌoh ootꞌen ha suntiyalh hukwaꞌ ninzun de, yun kꞌut datsꞌíntꞌoh-un, ꞌet whula dootni, ꞌinkꞌez dutulalhgus yólhchoot ꞌinkꞌez suntooyaꞌ. 25Whe khuna-un huwu hotilhyihne, ꞌenne ninta huhútaꞌalh. ꞋEt hoontsꞌi mbe la whe khuna-un si sgha ninta ooninꞌai de, whe khuna-un nahootáꞌalh. 26Dune ndi yun nduwhúlcho oochꞌeꞌ whúzdliꞌ de, ꞌinkꞌez duzul ꞌi ninta inínꞌai de, ndet whuchꞌa óotaldoh? Kꞌus duzul di kꞌelha suba nayoket? 27Yinka Dune Yeꞌ whusatiyalh, ooBá ye diztiꞌ-i ꞌinkꞌez oolizas, bubulh, whusatiyalh whe tsꞌiyanne dahitꞌen, whuz unꞌa ꞌilhone whe buba kꞌelha whutilhtselh. 28Soo tsꞌihꞌun unꞌa nohdusni, whulohne njan núdilhyane, dahutitsah whutsꞌo Yinka Dune Yeꞌ whe lerwe unli-un, whuz unꞌa whuz de uyalh de, dahútitsa whutsꞌo huyuntilhꞌelh.”
Currently Selected:
Matthew 16: crx
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
