Matthew 15

Ndai la nedzi be yatsꞌulhduk-i, ꞌi gha tsꞌintsiꞌ lhih

1ꞋEt Jerusalem keyoh whutsꞌun ndunne Moses be ꞌudustlꞌus ꞌukꞌu nunáguzne ꞌinkꞌez Phariseene cha Jesus highu nindil ꞌinkꞌez ꞌuhutni, 2“Di ha ngha hodulꞌehne, netsodaꞌne neꞌhustꞌen hukwꞌunꞌa hukwꞌu nulheꞌhustꞌen? Ngha hodulꞌehne, ꞌaw lanalheꞌhulhde ꞌuhutiꞌulh whutso!”

3ꞋEt ꞌúbulhni, “Di ha nohni nohkꞌoh tsꞌe huwa Yakꞌusda ooghuni ookꞌu nulheꞌzahtꞌen? 4Yakꞌusda dughuni nohtlꞌa idanꞌai whe njan ndutni, ‘Mbá ꞌinkꞌez nloo bulh hubudólhtiꞌ. Mbe la duloo ꞌinkꞌez dubá bulh dzoh tsꞌe bughu yatilhduk-un, daootsa huba ꞌuntꞌoh.’ 5ꞋEt nohni ꞌudahni, ‘Mbe la dubá kꞌus duloo ndai ꞌustꞌi-i, ꞌi be daꞌ nohla ꞌoostꞌen ooleꞌ, ꞌi tsꞌiyawh Yakꞌusda gha núsdla.’ 6ꞋEt whuz unꞌa nohꞌeꞌutꞌen kꞌoh be ꞌaw duloo ꞌinkꞌez dubá bulh lhubudílhtiꞌ. ꞋI be Yakꞌusda ooghuni nohtlꞌa idanꞌai-i, ꞌi ꞌaw hoonli lhiloh sulhtsi! 7Duba naꞌudzooꞌne ꞌahli! Nus hooꞌen Isaiah, ꞌen ꞌudaꞌ honꞌen ꞌinkꞌez tsꞌihꞌun unꞌa ꞌutni nohni nohghun. Njan ndutni,

8‘Ndunne dughuni be be za sodílhtiꞌ.

ꞋEt hoontsꞌi budzi, sghun nilhdzaꞌ ꞌuntꞌoh.

9Ndunne ꞌantsꞌet stsꞌun teni ꞌuhunoolhzin.

ꞋI Yakꞌusda ooghuni netlꞌa idanꞌai-i ꞌi kꞌunꞌa dune khuni be whubohodulhꞌeh.’”

10ꞋEt Jesus ꞌilhunaoodulhne, “ꞋAnih! Diz áhdulh!” ꞌinkꞌez ndúbulhni, “Soo zúlhtsꞌai ꞌinkꞌez tꞌeoonahzeh! 11Dune buza yúkat-i, ꞌet whe íloh hintsiꞌ hulhih. Khuni ꞌaw lhizooꞌ-i ye yalhduk-i, ꞌi be dune hintsiꞌ lhih.”

12ꞋEt yugha hodulꞌehne highu nindil whe ꞌuhuyulhni, “Tꞌeoonínzun eh Phariseene nyodantsꞌo whe buba dzoh ꞌúdinja?”

13ꞋEt Jesus ꞌubulhni, “ꞋUBá yakꞌuz usda, ꞌaw ꞌalhinilel-i, ꞌi ooghih tubulh ha hitilhchꞌulh. 14Butsꞌá ha lhozahꞌai! Moodih hoos̱ꞌenne leꞌ hintꞌoh. ꞋEt ndiz unꞌa njan duhoontꞌoh, ꞌilhoghun hoos̱ꞌen-un ꞌinkꞌez ꞌilhoghun hoos̱ꞌen-un ghunli de, nahúltꞌoh tsa kꞌet ꞌá hatiltsꞌulh.”

15Peter uyúlhni, “Ndi be nawhutnuk ꞌi be whutsꞌodulꞌeh-i be whunénilhtun.”

16ꞋEt ꞌuyulhni, “ꞋAw eh noheni talhodulhtsꞌit whe eh dahni? 17ꞋAwhuz eh tsꞌihꞌun nelhózahꞌai? Dune ooza yúkat-i, oobut be yukat. ꞋInkꞌez ooyustꞌe tsꞌu ha náyukat. 18ꞋEt dune khuni be yailhduk-i, budzi tsꞌu ha yúkat ꞌi ꞌuntꞌoh, ꞌinkꞌez ꞌi dune dilhtsꞌi. 19Dune budzi bez ha yúkat, be ne-eni untsiꞌ-i, dune hutuzilhghelh, ꞌuyoon dune ooꞌat kꞌus ꞌuyoon tsꞌeke ooki bulh nintaꞌantꞌen-un, ꞌinkꞌez ꞌaw lhghulhdiltsꞌine hoontsꞌi whuz unꞌa za neꞌhutꞌen. ꞋUndunutꞌih-un, ꞌuyoonne ba whutsꞌit-un, ꞌinkꞌez Yakꞌusda chꞌaz yalhduk-un cha. 20Ndowhi-i dune hintsiꞌ hulhih. ꞋAw lanalheꞌzulhde whe ꞌahꞌalh-un, ꞌaw ꞌet huwa iloh hintsiꞌ hulhih.”

Tsꞌeke, ꞌudun yun kꞌut whutꞌen-un, ooba ꞌalha ꞌuhoontꞌoh hooncha wheꞌ hoontꞌoh

21ꞋEt Jesus nyo usda-un whuchꞌa nasja whe Tyre ꞌinkꞌez Sidon whunat ꞌoh ho tsꞌu wheínya. 22ꞋIlhoghun tsꞌeke, Canaan whutꞌen-un ꞌuntꞌoh, yughu ninya. Tso bulh yalhduk wheꞌ yulhni, “SMoodihti sgha teꞌninzeh, David ootsꞌuhainzut-un ꞌintꞌoh! Syaz tsꞌekeyaz tube hoontsiꞌ hukwꞌunꞌa ntsiꞌ-i nududeh-i ooyudinda!”

23ꞋEt ꞌaw daja lhidínel. ꞋEt yugha hodulꞌehne highu nindil ꞌinkꞌez ꞌuhuyulhni, “Nꞌun nailhꞌalh, ꞌet la tso bulh yalhduk-un ꞌetsul udónih.”

24ꞋEt ꞌubulhni, “Israel ooyoh whutꞌine, ꞌusbai ninta nihꞌaz-i leꞌ ꞌuntꞌohne, ꞌenne za butsꞌún tizꞌaꞌ.”

25Tsꞌeke yughu ninya whe yubut nachaniti ꞌinkꞌez, “SMoodihti, sla ꞌineh!” yulhni.

26ꞋEt Jesus ꞌutni, “Tsꞌoodunne yuꞌalh-i lhikeyaz gha óohꞌalh junih.”

27ꞋEt tsꞌeke ꞌuyulhni, “SMoodihti ꞌalha dini. ꞋEt hoontsꞌi moodihti ludab kꞌut tukat-i, ꞌi lhikeyaz huyuldil.”

28ꞋEt Jesus ꞌuyulhni, “ꞋOoh tsꞌeke hooncha whe mba ꞌalha ꞌuhoontꞌoh-un, ꞌet hooncha wheꞌ hoontꞌoh. ꞋEt huwa hukwaꞌ ninzun kꞌunꞌa ꞌuhoneh.” ꞋOh whuya hoozulh-un, ooyatsꞌe soo naꞌuja.

Lhane undudane, Jesus usda-un highu nindil ꞌinkꞌez tsꞌiyawh soo náꞌbalhꞌen

29ꞋEt Jesus bughu natisja whe Galilee bun taba lhusuya ꞌinkꞌez ndo dzulh kꞌuz whinya, ꞌet natlꞌa didaꞌ. 30ꞋEt lhane dune, highu nindil. Mbene la nulhúsdilne, hoos̱ꞌenne, yalhulhdukne, ooyustꞌe bodinlane, ꞌuyoonne cha, tsꞌiyawh hitsꞌu botule. Hibut neboninla ꞌinkꞌez tsꞌiyawh soo náꞌbalhꞌen. 31Yalhulhdukne cha yawhehunilhduk, ooyustꞌe bodinꞌaine, cha soo naꞌhuja. Nulhúsdilne cha nahúdilh nahusdliꞌ, hoos̱ꞌenne cha hoohooꞌen nahusdliꞌ. Tsꞌiyanne bunalhꞌen whe tube buba hooncha ꞌinkꞌez Israel whudune buYakꞌusda ꞌen hidálhtiꞌ.

Jesus 4,000ne gháꞌ ninꞌai

32Jesus yugha hodulꞌehne, ꞌanih ubudániꞌ ꞌinkꞌez ꞌúbulhni, “Ndunne dunene bugha téꞌnuszun. Tat dzin whutsꞌun njan szih hudilhtsꞌi ꞌinkꞌez ꞌaw huyaꞌalh-i lhuhítꞌiꞌ. ꞋAw lheꞌhusꞌal whe bukeyoh tsꞌe nabutoosꞌaꞌ ꞌaitꞌoh. Doo ka si, nahidulh tsꞌe bukaootoozit.”

33Yugha hodulꞌehne huyulhni, “Njan dune hooloh-un ꞌuhoontꞌoh. Ntsꞌez de suba soo ꞌúltsuk-i ꞌutꞌalh-i natsꞌólelh lheꞌultsukne dune gháztiꞌalh-i?”

34ꞋEt Jesus ubúlhni, “Daltsuk lhes sutꞌe ahtꞌi?” “Lhtakꞌantꞌi lhes sutꞌe ꞌinkꞌez lho ntsꞌoolyaz bulh,” huyulhni.

35ꞋEt ꞌilhozdilne natlꞌa dulhtsꞌi ꞌubulhni. 36ꞋInkꞌez lhes lhtakꞌantꞌi lho bulh yílhchoot ꞌinkꞌez musi ni whe tenadidli. Taidanyuz ꞌinkꞌez yugha hodulꞌehne butlꞌa yánkai. ꞋI natlꞌa diltsꞌine butahinínla. 37Tsꞌiyawh naꞌhitꞌal ꞌinkꞌez ꞌuhunisdai. Yugha hodulꞌehne lhtakꞌantꞌi chalhyal dizbun ꞌi highá ꞌozꞌal-i nahuyalhdzoo. 384,000ne atꞌen ꞌuhanꞌal. Tsꞌoodunne ꞌinkꞌez tsꞌekoo bubulh ꞌalhgoh. 39ꞋEt ꞌawet Jesus ꞌilhunaoosdilne bukeyoh tsꞌe whe nábalhꞌaꞌ, tsꞌi be naja ꞌinkꞌez yun Magdala huwhutni tsꞌe whehánki.

Currently Selected:

Matthew 15: crx

Highlight

Copy

Compare