Ruta 4
4
‘Ua Faiavā Poasa ‘iā Ruta
1‘Ua alu a‘e Poasa i le faitoto‘a o le ‘a‘ai, ‘ua nofo ai; fa‘auta i le tagata o lo latou ‘āiga na fai atu ai Poasa ‘ua alu ane. ‘Ona fai atu lea o ia, “Le ali‘i e, ‘inā afe mai ia ‘inā e nofo i le mea nei;” ‘ona afe ane lea o ia, ‘ua nofo ai.#Ruta 3.12; 2 Samu 15.2; Sala 127.5 2‘Ua ‘a‘ami e ia toeaina o le ‘a‘ai e to‘asefulu, ‘ua fai atu i ai, “‘Inā nonofo ia ‘outou i le mea nei;” ‘ona latou nonofo ai lea. 3‘Ona fai atu lea o ia i le tagata o lo latou ‘āiga, “O le fasi fanua sa i lo tā uso o Elimeleka o le a fa‘atau e Naomi, ‘ua fo‘i mai nai le nu‘u o Moapi; 4na ‘ou fai ane fo‘i, ‘ou te ta‘u atu ‘iā te oe, o lo‘o fa‘apea, ‘Inā fa‘atau ia i luma o ē nonofo mai, ma luma o toeaina o lo‘u nu‘u; ‘āfai ‘e te fa‘atau ai, ‘inā fa‘atau ia; ‘āfai ‘e te lē fa‘ataulia, ‘inā fai mai ia ‘iā te a‘u ‘ina ‘ia ‘ou iloa; auā e leai se tasi e muamua ‘iā te oe i le fa‘atau; o a‘u fo‘i ‘ou te aupito atu ‘iā te oe.”
‘Ona fai mai lea o ia, “‘Ou te fa‘ataulia lava.”#Levi 25.25; Iere 32.7-8
5‘Ua fai atu Poasa, “O le aso ‘e te fa‘atau ai le fanua nai le lima o Naomi, ‘e te fa‘atau fo‘i nai ia Ruta le fafine Moapi, le avā a le ‘ua oti; e fa‘atumau ai le igoa o lē ‘ua oti i lona tofi.”
6‘Ona fai mai lea o le tagata o le ‘āiga, “‘Ou te lē mafa‘atau ai mo‘u, ne‘i ‘ou fa‘alēaogā i lo‘u tofi; ‘ia e fa‘atau mo oe le fanua, auā ‘ou te lē mafai ‘ona fa‘ataulia.”#Ruta 3.12-13
7O lenei le masani i Isaraelu anamua i le fa‘atau mai ma fa‘atau atu, e fa‘amau a‘i mea uma; ‘ua tatala e le tasi tagata lona se‘evae, ‘ua avatu i le tasi, o le tu lava lea a Isaraelu.#Teu 25.9
8‘Ua fai mai le tagata o lo latou ‘āiga ‘iā Poasa, “Fa‘atau ia mo oe;” ‘ona tatala ai lea e ia o lona se‘evae. 9‘Ona fai atu lea o Poasa i toeaina ma le nu‘u uma, o molimau ‘outou i lenei aso, “‘Ua ‘ou fa‘atau mea uma sa ‘iā Elimeleka, ma mea uma sa ‘iā Kiliona ma Maalona nai le lima o Naomi.#Ruta 1.2, 4, 5 10O Ruta fo‘i le fafine Moapi, le avā a Maalona, ‘ua ‘ou fa‘atau ‘iā te ia e fai ma a‘u avā, e fa‘atumau ai le igoa o lē ‘ua oti i lona tofi, ‘ia lē galo le igoa o lē ‘ua oti ai lona ‘au uso, ma le faitoto‘a o lona ‘a‘ai; o molimau i ai ‘outou i lenei aso.”#Teu 25.5-6
11‘Ua fai mai tagata uma sa i le faitoto‘a, ‘atoa ma toeaina, o molimau lava i ai i matou; “‘Ia ‘avea e le ALI‘I lenei fafine, o le a alu i lou ‘āiga pei o Rasela ma Lea sa la ati a‘e le ‘āiga o Isaraelu; ‘ia e malosi i Efarata, ma ‘ia vi‘ia oe i Peteleema;#Kene 29.31 12‘ia ‘avea fo‘i lou ‘āiga pei o le ‘āiga o Faresa na fānau mai e Tamara ‘iā Iuta, nai le fānau e foa‘i mai e le ALI‘I ‘iā te oe i lenei teine.”#Kene 38.27-30
O Poasa ma lona Sologa
13‘Ua ‘ave e Poasa ‘iā Ruta, ‘ua fai māna avā; ‘ua alu atu o ia ‘iā te ia ‘ona tō ai lea o ia i le pule a le ALI‘I, ‘ua fānau mai lana tama tane.#Kene 29.31; 33.5 14‘Ua fai mai fafine ‘iā Naomi, “Fa‘afetai i le ALI‘I ‘ina ‘ua foa‘i atu ‘iā te oe i lenei aso se tasi e auga i ai lou ‘āiga, ‘ia vi‘ia lona igoa i Isaraelu. 15E fai o ia ‘iā te oe ma fa‘amalosi o lou ola, ma tausi i lou lo‘omatua, auā o le avā a lau tama, o lē alofa ‘iā te oe, ‘ua fānau; ‘ua lelei o ia ‘iā te oe e sili i tama tane e to‘afitu.” 16‘Ua tago Naomi i le tama, ‘ua tu‘u i lona fatafata, ma tausi ‘iā te ia.#4.16 ‘ua tu‘u i lona fatafata ma tausi ‘iā te ia: po o ‘ua fai o ia ma ana tama fai.
17O fafine ē na tuā‘oi ma ia, ‘ua latou fa‘aigoa ‘iā te ia, ‘ua fa‘apea; “‘Ua fānau mai se tama ‘iā Naomi,” ‘ua latou fa‘aigoa ‘iā te ia, o Opeta o le tamā o ia o Iese, o le tamā o Tavita.
18O le gafa lenei o Faresa; na fānaua e Faresa o Esarona; 19na fānaua e Esarona; o Rama; na fānaua e Rama o Aminatapu; 20na fānaua e Aminatapu o Naasona; na fānaua e Naasona o Salemona; 21na fānaua e Salemona o Poasa; na fānaua e Poasa o Opeta; 22na fānaua e Opeta o Iese; na fānaua e Iese o Tavita.#1 No 2.4-15; Mata 1.3-6; Luka 3.31-33
Currently Selected:
Ruta 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.