Fa‘aaliga 3
3
O le Sāvali i le Ekalesia i Sarataisa
1“‘Ia e tusi fo‘i i le agelu a le ekalesia o i Sarataisa: O mea nei ‘ua fai mai ai lē ‘ua i ai agaga e to‘afitu o le Atua, ma fetū e fitu;
“‘Ua ‘ou iloa au galuega, ‘ua ‘iā te oe le igoa ‘ua e ola, a ‘ua e oti. 2‘ia e mataala, ma ‘ia e fa‘atumauina mea ‘ua totoe o le a mate; auā ‘ou te le‘i iloa au galuega ‘ona ‘ato‘atoa i luma o le Atua. 3O lea fo‘i ‘ia e manatu ai i mea ‘ua e maua ma ‘ua e fa‘alogo ai, ma ‘ia e tāofiina ai, ma ‘ia e salamō. ‘Āfai fo‘i ‘e te lē mataala, ‘ou te alu atu ‘iā te oe e pei o se gaoi, ‘e te lē iloa fo‘i le itū aso ‘ou te alu atu ai ‘iā te oe.#Mata 24.43-44; Luka 12.39-40; Fa‘aa 16.15 4‘Ua ‘iā te oe i ni nai tagata i Sarataisa lava, o ē ‘ua lē fa‘a‘ele‘elea o latou ‘ofu; latou te sāvavali ma a‘u i ‘ofu sisina, auā ‘ua tatau ai i latou. 5O lē manumālō, e fa‘a‘ofuina o ia i ‘ofu sisina; ‘ou te lē sōloi‘esea fo‘i lona igoa mai le tusi o le ola, ‘ae ‘ou te ta‘u atu lona igoa i luma o lo‘u Tamā, ma luma o ana agelu.#Eso 32.32-33; Sala 69.28; Fa‘aa 20.12; Mata 10.32; Luka 12.8 6O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.
O le Sāvali i le Ekalesia i Filatelefaia
7“‘Ia e tusi fo‘i i le agelu a le ekalesia o i Filatelefaia:
O mea nei ‘ua fai mai ai le Pa‘ia, o le fa‘amaoni ia,
o lē ‘ua i ai le ki a Tavita,
o lē na te talā, ‘ae leai sē na te fa‘amauina;
o lē na te fa‘amauina fo‘i, ‘ae leai sē na te tatalaina;#Isai 22.22; Iopu 12.14
8“‘Ua ‘ou iloa au galuega; fa‘auta, ‘ua ‘ou tu‘uina atu i ou luma le faitoto‘a ‘ua avanoa, e leai fo‘i sē na te mafaia ‘ona punitia; auā ‘ua ‘ou iloa ‘ua itiiti lou malosi, a ‘ua e tausia la‘u ‘upu, ma ‘ua e lē fa‘afitia lo‘u igoa. 9Fa‘auta, ‘ou te tu‘uina atu i latou o i le sunako o Satani, o ē o fai mai o Iutaia i latou, ‘ae leai lava, a ‘ua pepelo i latou; fa‘auta, ‘ou te ta‘ita‘i ‘iā te i latou ‘ina ‘ia latou ō atu i ou luma, ma ifo atu i ou vae; latou te iloa fo‘i o a‘u ‘ua ‘ou alofa atu ‘iā te oe.#Isai 43.4; 45.14; 49.23; 60.14; 66.23 10‘Ua e tausia le ‘upu o lo‘u ‘onosa‘i, o lea fo‘i ‘ou te tausi ai ‘iā te oe i le itū aso e tofotofoina ai, a o‘o mai i le lalolagi uma, e tofotofo ai i ē o nonofo i le lalolagi. 11Fa‘auta, ‘ou te vave alu atu; ‘ia e tāofi mau i le mea ‘ua ‘iā te oe, ne‘i ‘avea e se tasi lou pale. 12O lē manumālō, ‘ou te faia lea ma poutū i le malumalu o lo‘u Atua, e lē toe ulufafo lava ia, ‘ou te tusi fo‘i i ai le suafa o lo‘u Atua, ma le igoa o le ‘a‘ai a lo‘u Atua, o Ierusalema fou lea e alu ifo nai le lagi mai lo‘u Atua, ‘atoa fo‘i ma lo‘u igoa fou.#Fa‘aa 21.2; Isai 62.2; 65.15 13O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.
O le Sāvali i le Ekalesia i Laotikaia
14“‘Ia e tusi fo‘i i le agelu a le ekalesia o i Laotikaia: O mea nei ‘ua fai mai ai le Amene o le molimau moni ma le fa‘amaoni, o le amataga o mea na faia e le Atua.#Sala 89.37; Fa‘ata 8.22
15“‘Ua ‘ou iloa au galuega, ‘e te lē ma‘alili, ‘e te lē vevela fo‘i. ‘Ou te loto ‘ina ‘ia e ma‘alili pe vevela. 16O lenei, ‘ua e fa‘aleogalua, ‘e te lē ma‘alili, ‘e te lē vevela fo‘i, o le mea lea ‘ou te luai atu ai ‘iā te oe i lo‘u gutu. 17Auā ‘ua e fai mai, ‘‘Ou te se mau‘oa, ‘ua fa‘atamao‘āigaina a‘u, ‘ou te lē mativa fo‘i i se mea e tasi.’ A ‘ua e lē iloa o oe o le malaia, ma le pagātia, ma le mativa, ma le tauaso, ma le lē lavalavā.#Nume 12.8; 1 Kori 3.18; 4.8 18‘Ou te fai atu ai ‘iā te oe, ‘ia e fa‘atau atu ‘iā te a‘u le auro ‘ua fa‘amamāina i le afi, ‘ina ‘ia e tamao‘āiga ai; ma ‘ofu sisina ‘ina ‘ia e ‘ofu ai, ‘ina ne‘i iloa le mā o lou lē lavalavā; ma le vaimata e nini a‘i ou mata, ‘ina ‘ia e pupula ai. 19‘Ou te a‘oa‘i atu ma sasa ‘iā i latou uma ‘ou te alofa i ai; o lenei, ‘ia e vilivilita‘i, ma ‘ia e salamō.#Fa‘ata 3.12; Epe 12.6 20Fa‘auta, ‘ou te tu atu i le puipui ma tu‘itu‘i atu; ‘ai se tasi e fa‘alogo mai i lo‘u leo, ma tatala mai le puipui, ‘ou te ulufale atu ‘iā te ia, ma te talisua fo‘i ma ia, o ia fo‘i ma a‘u.#Mare 13.14; Ioane 14.23; Luka 12.36; 22.29 21O lē manumālō ‘ou te avatua ‘iā te ia ma te nonofo fa‘atasi ma a‘u i lo‘u nofoāli‘i, e pei o a‘u fo‘i ‘ona ‘ou manumālō, ‘ua ma nonofo fo‘i fa‘atasi ma lo‘u Tamā i lona nofoāli‘i. 22O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.”
Currently Selected:
Fa‘aaliga 3: RSCB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.