Fa‘aaliga 2
2
O le Sāvali i le Ekalesia i Efeso
1“‘Ia e tusi i le agelu a le ekalesia o i Efeso: O mea nei ‘ua fai mai ai lē u‘u i fetū e fitu i lona lima taumatau, o lē savali i totonu o tu‘ugāmolī auro e fitu.
2“‘Ua ‘ou iloa au galuega, ma lou tigā, ma lou ‘onosa‘i, ‘ina ‘ua e lē lavātia i ē ‘ua leaga; ‘ua e tofotofo fo‘i i ē ‘ua fai mai o ‘aposetolo i latou, ‘ae leai lava, ‘ua e iloa fo‘i o tagata pepelo i latou. 3Ma ‘ua e lavātia, ‘ua ‘iā te oe fo‘i le ‘onosa‘i, ‘ua e tautigā ‘ona o lo‘u igoa, ‘e te le‘i fa‘avaivai lava. 4A ‘ua ‘ou lē fiafia ‘iā te oe, ‘ona ‘ua e tu‘ua o lo‘u ulua‘i alofa. 5O lenei, ‘ia e manatua le mea na e pa‘ū mai ai, ma ‘ia e salamō, ma e faia au ulua‘i galuega; ‘āfai e leai, ‘ona ‘ou vave alu atu lea ‘iā te oe, ‘ou te ‘ave‘esea lau tu‘ugāmolī i le mea e tu‘u ai, pe ‘āfai ‘e te lē salamō. 6A ‘ua ‘iā te oe lenei mea, ‘ina ‘ua e ‘ino‘ino i galuega a le au Nikalaitai, o a‘u fo‘i ‘ou te ‘ino‘ino i ai. 7O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.
O le manumālō, ‘ou te avatua ‘iā te ia e ‘ai i le la‘au o le ola o i totonu o le parataiso o le Atua.#Kene 2.9; Fa‘aa 22.2; Eseki 28.13; 31.8
O le Sāvali i le Ekalesia i Semurana
8“‘Ia e tusi fo‘i i le agelu a le ekalesia o i Semurana: O mea nei ‘ua fai mai ai lē muamua ma lē mulimuli, o lē na oti, a ‘ua ola mai.#Isai 44.6; 48.12; Fa‘aa 1.17; 22.13
9“‘Ua ‘ou iloa au galuega, ma lou puapuagā, ma lou mativa, a ‘ua e tamao‘āiga, ma le ‘upu fāifai a ē ‘ua fai mai o Iutaia i latou, ‘ae leai lava, a o le sunako o Satani i latou. 10‘Aua lava ‘e te fefe i mea o le ‘ae tigā ai. Fa‘auta, o le a tu‘uina atu ni o ‘outou e le tiapolo i le fale puipui, ‘ina ‘ia tofotofoina ai ‘outou; e pō agafulu fo‘i e puapuagātia ai ‘outou. ‘ia e fa‘amaoni se‘ia o‘o i le oti, ‘ona ‘ou avatu ai lea ‘iā te oe o le pale o le ola. 11O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.#Fa‘aa 20.14; 21.8
O lē manumālō, e lē afaina lava o ia i le oti fa‘alua.
O le Sāvali i le Ekalesia i Perekamo
12“‘Ia e tusi fo‘i i le agelu a le ekalesia o i Perekamo: O mea nei ‘ua fai mai ai lē ‘ua i ai le pelu e fa‘atau ma‘ai ona itū ‘ua ma‘ama‘ai lava.
13“‘Ua ‘ou iloa au galuega, ma le mea ‘ua e nofo ai, o i ai le nofoāli‘i o Satani, ‘ua e tāofi mau fo‘i i lo‘u igoa, ma ‘ua e lē fa‘afitia le fa‘atuatua ‘iā te a‘u i ia ona pō lava na i ai Anetipa o la‘u molimau o lē na fa‘amaoni, sa fasiotia o ia na ‘iā te ‘outou i le mea o nofo ai Satani. 14A ‘ua ‘iā te a‘u ni nai mea ‘iā te oe, ‘ou te lē fiafia ai ‘iā te oe, ‘ona ‘ua ‘iā te oe o ē ‘ua tāofi i le a‘oa‘oga a Palaamo, o lē na a‘oa‘o ‘iā Palako e tu‘u atu le mea e tausuai ai i luma o le fānauga a Isaraelu, ‘ona ia ‘a‘ai i mea ‘ua fasia mo tupua ma ‘ia latou faita‘aga.#Nume 22.5-7; 25.1-3; 31.16; Teu 23.4 15E fa‘apea fo‘i ‘ona ‘iā te oe o ē ‘ua tāofi i le a‘oa‘oga a le ‘au Nikalaitai. 16‘Inā e salamō ia; ‘āfai e leai, ‘ona ‘ou vave alu atu lea ‘iā te oe, ‘ou te tau fo‘i ma i latou i le pelu a‘i lo‘u gutu. 17O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.#Eso 16.14-15; 16.33-34; Ioane 6.48-50; Isai 62.2; 65.15
E manumālō, ‘ou te avatua ‘iā te ia le manai lilo e ‘ai ai; ‘ou te avatu fo‘i ‘iā te ia le ma‘a sinasina, ‘ua tusia fo‘i i le ma‘a le igoa fou, e lē iloa e se tasi ‘ua na o lē ‘ua maua.
O le Sāvali i le Ekalesia i Tuatira
18“‘Ia e tusi fo‘i i le agelu a le ekalesia o i Tuatira: O mea nei ‘ua fai mai ai le Atali‘i o le Atua, o lē e pei o le mumū o le afi ona mata, o ona vae fo‘i e pei o le ‘apa pupula.#Tani 10.6
19“‘Ua ‘ou iloa au galuega ma lou alofa, ma lou fa‘atuatua ma lou ‘au‘auna mai, ma lou ‘onosa‘i, ‘ua sili fo‘i au galuega mulimuli i lo galuega muamua. 20A ‘ua ‘iā te a‘u ni nai mea ‘ou te lē fiafia ai ‘iā te oe, ‘ona ‘ua e tu‘u pea le fafine o Iesepela, ‘ua ta‘ua o ia e ia o le perofeta fafine, e a‘oa‘o ma fa‘asesē i a‘u ‘au‘auna, ‘ina ‘ia faita‘aga, ma ‘a‘ai mea na fasia mo tupua.#1 Tu 16.31; 2 Tu 9.22, 30 21‘Ua ‘ou tu‘u atu fo‘i ni ona aso ‘ia salamō ai i lana faita‘aga, a ‘ua lē salamō lava o ia. 22Fa‘auta, o a‘u ‘ou te lafo ‘iā te ia i le moega o tigā, ‘ou te fa‘ao‘o fo‘i le puapuagā tele i ē ‘ua mulilulua ma ia, pe ‘āfai latou te lē salamō ‘iā latou galuega. 23‘Ou te fasia fo‘i ana fānau ‘ia oti; e iloa fo‘i e ekalesia uma, o a‘u lava o lē su‘esu‘e i manatu ma loto; ‘ou te avatua fo‘i ‘iā te ‘outou ta‘ito‘atasi e tusa ma a ‘outou galuega.#Sala 7.9; 62.12; Iere 17.10
24“A ‘ou te fai atu i nisi o ‘outou o i Tuatira, o ē ‘ua lē i ai lenei a‘oa‘oga, ma ‘ua latou lē iloa ‘mea loloto a Satani,’ pei ‘ona tā‘ua e i latou, ‘ou te lē tu‘uina atu se isi avega ‘iā te ‘outou. 25‘Ae peita‘i o le mea ‘ua ‘iā te ‘outou ‘ia ‘outou tāofi mau ai, se‘ia ‘ou alu atu. 26O lē manumālō fo‘i, ma tausi i a‘u galuega se‘ia o‘o i le gata‘aga,
‘Ou te avatua ‘iā te ia e pule i nu‘u ‘ese.
27E pule fo‘i o ia ‘iā te i latou i le to‘oto‘o u‘amea;
e nutipalaina i latou pei o ipu a lē fai ipu ‘omea,
e pei o a‘u fo‘i ‘ona ‘ou maua mai i lo‘u Tamā.
28‘Ou te avatua fo‘i ‘iā te ia le fetū ao.#Sala 2.8-9 29O lē ‘ua i ai taliga, ‘inā fa‘alogo mai ia o ia i le mea ‘ua fetalai mai ai le Agaga i ekalesia.
Currently Selected:
Fa‘aaliga 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.