Salāmo 44
44
O le Fa‘amanatuga o le Alofa o le Atua Anamua
Ma le usu pese. O le salāmo e a‘oa‘o ai ma le fānauga a Koru
1Le Atua e,#Eso 10.2; 13.8, 14; Sala 77.5; 78.3
‘ua fa‘alogo o matou taliga,
‘ua talatalaina e o matou tamā ‘iā te i matou,
le galuega na e faia i ona po sa i ai latou i aso anamua.
2O oe lava na e tulia i lou ‘a‘ao o nu‘u ‘ese,
‘ae totōina ai i latou.
‘Ua e fa‘atigāina fo‘i ia nu‘u
a ‘ua e fa‘atuputeleina i latou.
3Auā e le‘i maua e i latou le fanua ‘iā latou pelu,#Teu 10.15; Iosu 10.42; 24.12; Hose 1.7
e le‘i fa‘aolaina fo‘i i latou i o latou lima.
A o lou ‘a‘ao taumatau, o lou ‘a‘ao lava,
ma le malamalama o ou fofoga,
auā na e fiafia ‘iā te i latou.
4Le Atua e,
o oe lava lo‘u Tupu;
‘ia e fetalai ‘ia fa‘aolaina Iakopo.
5O oe lava matou te tulei ai i ē ita mai ‘iā te i matou;#Sala 60.12; Tani 8.4
o lou suafa fo‘i matou te soli ai i ē laga mai ‘iā te i matou.
6Auā ‘ou te lē fa‘atuatua i la‘u ‘aufana,#1 Samu 17.47; Sala 33.16
e lē fa‘aolaina fo‘i a‘u i la‘u pelu.
7Auā ‘ua e fa‘aola lava ‘iā te i matou i ē ita mai ‘iā te i matou;
‘ua e fa‘amasiasi fo‘i i ē ‘ino‘ino mai ‘iā te i matou.
8Matou te vivi‘i atu pea lava i le Atua,
matou te fa‘ane‘ene‘e fo‘i e fa‘avavau i lou suafa. Selā.
9‘Ae peita‘i ‘ua e lafoa‘iina ma fa‘amāina i matou;#2 Samu 5.24; Sala 60.1, 10; 74.1
‘ua e le ‘au fa‘atasi fo‘i ma la matou itūtau‘a.
10‘Ua e fa‘aliutuaina i matou i luma o ē ita mai;
‘ua vetea fo‘i a matou mea e i latou o ē ‘ino‘ino mai ‘iā te i matou.
11‘Ua e tu‘uina atu i matou e pei o mamoe a ‘aina;#Teu 4.27; 28.64; 2 Tu 17.6; Sala 106.27; Eseki 20.23; Luka 21.24
‘ua e fa‘ata‘ape‘apeina i matou i nu‘u ‘ese.
12‘Ua e fa‘atau atu i lou nu‘u ‘ae leai se ‘oloa ‘ua maua;#Fa‘ama 2.14; 3.8; Isai 52.3
e le‘i fa‘ateleina fo‘i au ‘oloa i le tau na fa‘atau ai i latou.
13‘Ua e faia i matou ma gao a ē matou te tuā‘oi,
o ulaga ma tauemuga a ē vagavagai mai ‘iā te i matou.
14‘Ua e faia i matou ma ‘upu fa‘atusa i nu‘u ‘ese;#Iere 24.9
‘ua lialia‘i ai ulu o tagata.
15‘Ua ‘ou lumana‘i pea le mea ‘ou te māsiasi ai;
‘ua ufitia fo‘i a‘u i le mea e mā ai o‘u mata.
16‘Ona o le leo o lē ‘ua gaogao mai ma fāifai mai;
‘ona o lē ita mai, ‘atoa ma lē ‘ua taui ma sui.
17‘Ua o‘o mai ‘iā te i matou ia mea uma;#Tani 9.13
‘ae peita‘i matou te le‘i fa‘agalogalo ‘iā te oe,
matou te le‘i pepelo fo‘i i lau feagaiga.
18E le‘i tu‘umuli o matou loto,
e le‘i liliu ‘ese fo‘i o matou vae i lou ala.
19‘Ina ‘ua e tu‘imomomoina i matou i le mea o i ai tanimo,
ma ‘ua e ufitia i matou i le ata o le oti.
20Pe ‘āfai ‘ua matou fa‘agalogalo i le suafa o lo matou Atua,
‘āfai fo‘i ‘ua fa‘aloaloa ane o matou lima i se atua ‘ese;
21e lē su‘esu‘e ‘ea lenei mea e le Atua?#1 Samu 16.17; Sala 139.1; Fai 12.14; Ioane 2.25; Roma 2.16; Epe 4.13; Fa‘aa 2.23
auā o ia lava na te silafia mea lilo o i le loto.
22‘Ona o oe lava ‘ua fasiotia i matou i aso uma;#Roma 8.36
‘ua fa‘atatauina i matou e pei o mamoe a fasia.
23Le ALI‘I e,
‘ia e tula‘i mai, se a le mea ‘ua e tofā ai?
‘Ia e maleifua mai,
‘aua ‘e te lafoa‘i ‘iā te i matou e fa‘avavau.
24Se a le mea ‘ua e ‘alo ai ou fofoga,#Iopu 13.24
ma fa‘agalogalo i lo matou tigā ma lo matou sauāina?
25Auā ‘ua fa‘ano‘uno‘u ifo i matou i le efuefu;#Sala 119.25
‘ua pipi‘i o matou manava i le ‘ele‘ele.
26‘Inā tula‘i mai ‘ia e fai ma fesoasoani ‘iā te i matou;
ma ‘ia e lavea‘i ‘iā te i matou ‘ona o lou alofa.
Currently Selected:
Salāmo 44: RSCB
Highlight
Share
Compare
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
