Salāmo 33
33
O le Fa‘amanū i le ALI‘I i lona Agalelei ma lona Alofa tele i Tagata
1‘Inā pepese ia i le ALI‘I o ‘outou o ē amiotonu;
e ono lava i ē ‘ua amio sa‘o ‘ona vivi‘i atu.#Sala 32.11
2‘Inā vivi‘i atu ia i le ALI‘I i le kitara;
‘ia fai pesega ‘iā te ia i le napeli e sefulu ona manoa.
3‘Inā pepese atu ia ‘iā te ia i le pese fou;#Sala 40.3; Isai 42.10; Fa‘aa 5.9
‘ia ‘outou tā malie ma le leo fiafia.
4Auā e sa‘o lava le afioga a le ALI‘I;
‘ua faia fo‘i e ia ana galuega uma i le fa‘amaoni.
5E fiafia o ia i le amiotonu ma le fa‘amasinoga;
‘ua tumu le lalolagi i le alofa o le ALI‘I.
6O le afioga a le ALI‘I na faia ai le lagi;#Kene 1.6-7; 2.1; Isai 11.4; Ioane 1.1-3; Epe 11.3; 2 Pete 3.5
ma ‘au uma o i ai na faia i le mānava a lona fofoga.
7‘Ua fa‘apotopotoina e ia o suāsami e pei se mea maupu‘epu‘e;#Eso 15.8; Iosu 3.13
‘ua tu‘uina atu e ia o le moana i fale ‘oloa.
8‘Ia matata‘u i le ALI‘I ‘atoa uma le lalolagi;
‘ia fefefe lava ‘iā te ia o ‘outou uma o ē nonofo i le atu laulau.
9Auā o ia lava na fetalai ane, ‘ona i ai lava lea;
o ia na tulei mai lana afioga, ‘ona tu mai lava lea.
10E fa‘alēaogāina e le ALI‘I o taupulepulega o nu‘u ‘ese;#2 Samu 15.34; 17.14; Nee 4.15; Isai 8.10; 19.3
e fa‘ai‘uvaleina e ia o mafaufauga a tagata.
11E tu le pule a le ALI‘I e o‘o i le fa‘avavau;#Fa‘ata 19.21; Isai 46.10; Galu 4.27-28
o mafaufauga a lona finagalo e a le tu a le tu lava.
12‘Amu‘ia le nu‘u ‘ua Atua i le ALI‘I,
o le nu‘u ‘ua filifilia e ia e fai mōna lava tofi.
13O lo‘o silasila mai le ALI‘I mai le lagi;#2 No 16.9; Iopu 34.21; Sala 11.4; Epe 4.13
e silafia e ia le fānau uma a tagata.
14O lo‘o matuā silasila mai o ia mai le mea,#1 Tu 8.39, 49; Iere 32.19
o lo‘o afio ai o ia ‘iā i latou uma o ē nonofo i le lalolagi.
15E faia lava e ia o latou loto uma lava;#Fa‘ata 24.12; Isai 64.8
o lo‘o matuā silafia e ia a latou galuega uma.
16E lē fa‘aolaina se tupu i le to‘atele o ana ‘au;
e lē lavea‘iina le tagata fitafita i lona malosi tele.
17E lē aogā le fa‘aola a le solofanua;#Sala 20.7; Fa‘ata 21.31; Hose 1.7
e leai fo‘i sē lavea‘iina e ia i lona malosi tele.
18Fa‘auta, o lo‘o silasila le ALI‘I i ē matata‘u ‘iā te ia,#Iopu 36.7; Sala 34.15
o ē fa‘amoemoe i lona alofa;
19‘ina ‘ia lavea‘i ‘iā te i latou a‘i le oti,#Iopu 5.20; Sala 37.19; Galu 12.11
‘ina ‘ia ola fo‘i i latou i le oge.
20O lo‘o fa‘atalitali o tatou loto i le ALI‘I;#Sala 115.9-11; Isai 8.17
o ia lava lo tatou fesoasoani ma lo tatou talitā.
21Auā o lo‘o fiafia ‘iā te ia o tatou loto;#Saka 10.7
auā ‘ua tatou fa‘atuatua i lona suafa pa‘ia.
22Le ALI‘I e,
‘ia i luga ‘iā te i matou lou alofa,
e pei ‘ona matou fa‘amoemoe ‘iā te oe.
Currently Selected:
Salāmo 33: RSCB
Highlight
Share
Compare
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
