Fa‘ata‘oto 18
18
1O lē ‘ua vavae ‘ese, ‘ua sā‘ili o ia i lona mana‘o;
e finau o ia i le poto uma lava.
2E lē mana‘o le vale i le fa‘autauta;
‘ua na ‘ona ia fa‘aali o lona loto.#Fa‘ata 13.16
3A sau le tagata agasala, ‘ua sau fa‘atasi ai fo‘i le ‘ino‘ino;
e sau fo‘i le luma fa‘atasi ma le amio matagā.
4O ‘upu a le gutu o le tagata, o vai loloto ia;
o le puna o le poto, o le alia ola lava lea.#Fa‘ata 20.5
5E lē lelei ‘ona ‘au ma le tagata agasala,
‘ina ‘ia faia‘ina i le fa‘amasinoga lē ‘ua amiotonu.#Levi 19.15; Teu 1.17; Sala 82.2; Fa‘ata 17.15
6E ō atu laugutu o le vale i le misa;
‘ua vala‘au fo‘i lona gutu i ta.
7O le gutu o le vale e fano ai o ia; o ona laugutu fo‘i,
o le mailei lea o lona ola.#Fa‘ata 12.13; Fai 10.12
8O ‘upu a lē fa‘atuaupua, e tusa ia ma mea suamalie;
‘ua o‘o ifo i totonu lava o le manava.
9O lē ‘ua paiē fo‘i i lana galuega, la te uso ma lē na te fa‘amaumau mea.
10O le suafa o le ALI‘I, o le ‘olo malosi lea;
e sola atu i ai lē amiotonu, ‘ona sao ai lea o ia.#Sala 61.3; Fa‘ata 29.25
11O le ‘oloa o le mau‘oa, o lona ‘olo malosi lea;
e pei o le pā maualuga fo‘i i lona lava manatu.
12E muamua ‘ona fa‘amaualuga o le loto o le tagata i le malaia o ia;
‘ae muamua le fa‘amaulalo i le mamalu.#Fa‘ata 11.2; 15.33
13O lē na te tali atu i le ‘upu, a o le‘i fa‘alogo i ai,
e fai lea mōna valea ma mea e fa‘amāina ai o ia.
14O le loto o le tagata, na te fa‘ato‘ato‘a ai lona ma‘i;
a o le loto fa‘anoanoa, o ai sē na te lavā ‘onosa‘i?
15O le loto o lē ‘ua mafaufau na te maua le poto;
o taliga fo‘i o lē ‘ua poto, e sā‘ili ia i le poto.
16O le mea alofa a le tagata e fa‘alauteleina ai se ala mōna;
e ta‘ita‘iina ai fo‘i o ia i luma o ali‘i.#Kene 32.20; 1 Samu 25.27
17E tonu lē ‘ua muamua i lana finauga,
‘ae sau le tasi tagata, ‘ona su‘esu‘e ai lea o ia ‘iā te ia.
18O le vili e i‘u ai misa; e māvae ai fo‘i ē fitafita.
19O le tagata ‘ua agaleagaina e lona uso, e sili o ia ‘ona faigatā i le ‘olo;
o misa fo‘i o uso e tusa ia ma fa‘amaufa‘alava o le ‘olo.
20O le fua o le gutu o le tagata e mā‘ona ai lona manava;
e mā‘ona o ia i mea e tupu mai i ona laugutu.#Fa‘ata 12.14
21O le oti ma le ola, o lo‘o i le pule a le laulaufaiva ia;
o ē manana‘o i ai latou te ‘a‘ai i lona fua.
22O lē ‘ua maua le avā, ‘ua maua e ia le mea lelei;
‘ua maua fo‘i e ia le alofa mai le ALI‘I.#Fa‘ata 19.14
23E tautala mai ma le ‘ai‘oi lē ‘ua mativa,
a o le mau‘oa e tali atu o ia ma le fa‘asiasia.#Iako 2.6
24O le tagata ‘ua fai ana uō, e i‘u ‘ina tigāina ai o ia,
a o i ai le tagata alofa e sili ona pipi‘i mai i lo le uso.#Fa‘ata 17.17
Revised Samoan Catholic Bible © Bible Society of the South Pacific, 2010.