Mataio 4

Fa‘aosoosoga na o‘o ‘iā Iesu i le Vao

(Mare 1.12-13; Luka 4.1-13)

1‘Ona ‘aveina a‘e lea o Iesu i le vao e le Agaga, ‘ina ‘ia fa‘aosoosoina e le tiapolo.#Epe 2.18; 4.15 2‘Ua fa‘alāina o ia i po e fagafulu ma ao e fagafulu, mulimuli ane ‘ona fia taumafa ai lea o ia. 3‘Ona alu ane lea ‘iā te ia o lē fa‘aosooso, ‘ua fa‘apea mai, “‘Āfai o oe o le Alo o le Atua, ‘inā fetalai atu ia, ‘ia liu areto nei ma‘a.”

4‘Ona tali atu ai lea o Iesu, ‘ua fa‘apea atu, “‘Ua tusia,

‘E lē na o mea e ‘ai e ola ai le tagata,

a o afioga uma e tulei mai i le fofoga o le Atua.’” #Teu 8.3

5‘Ona ‘ave ai lea o Iesu#4.5 Iesu: O le fa‘aliliuga tuai; ia. e le tiapolo i le ‘a‘ai pa‘ia, ‘ua ia fa‘atūina fo‘i ‘iā te ia i le tumutumu o le malumalu, 6‘ona fai mai lea o le tiapolo ‘iā Iesu,#4.6 tiapolo ‘iā Iesu: O le fa‘aliliuga tuai; ia ‘iā te ia. “‘Āfai o oe o le Alo o le Atua, oso ia oe i lalō; auā ‘ua tusia,

‘E poloa‘i o ia i ana agelu ‘iā te oe,’

‘latou te ‘ave ‘iā te oe i o latou lima,

ne‘i tū‘ia lou vae i se ma‘a.’”

7‘Ua fetalai atu o Iesu ‘iā te ia, “‘Ua tusia fo‘i, ‘‘Aua ‘e te tofotofo i le Ali‘i lou Atua.’”#Teu 6.16

8‘Ona toe ‘ave lea o ia e le tiapolo i le mauga matuā maualuga, ‘ua ia fa‘aali fo‘i ‘iā te ia mālō uma o le lalolagi ma o latou matagofie; 9‘ona fai mai lea o le tiapolo ‘iā Iesu, “‘Ou te avatua nei mea uma ‘iā te oe, pe ‘āfai ‘e te fa‘apa‘ū ma ifo mai ‘iā te a‘u.”

10‘Ona fetalai atu lea o Iesu ‘iā te ia, “‘Inā alu ‘ese ia oe Satani; auā ‘ua tusia,

‘‘E te ifo atu i le Ali‘i lou Atua,

‘ua nā o ia lava ‘e te ‘au‘auna i ai.’”#Teu 6.13

11‘Ona tu‘ua ai lea o ia e le tiapolo, fa‘auta fo‘i, ‘ua ō mai agelu ma ‘au‘auna mai ‘iā te ia.

‘Ua Amata le Galuega a Iesu i Kalilaia

(Mare 1.14-15; Luka 4.14-15)

12‘Ua fa‘afofoga Iesu ‘ua tu‘uina atu Ioane i le fale puipui, ‘ona maliu atu ai lea o ia i Kalilaia;#Mata 14.3; Mare 6.17; Luka 3.19-20 13‘ua tu‘ua e ia o Nasareta, ‘ua maliu atu o ia ma nofo i Kapanaumi ‘ua tu matāfaga, i le tuā‘oi o Sepulona ma Nafatali;#Ioane 2.12 14‘ina ‘ia taunu‘u ai le ‘upu a le perofeta o Isaia, ‘ua fa‘apea mai,

15“O le nu‘u o Sepulona ma le nu‘u o Nafatali,#Isai 9.1-2

o le ala i le vai i tala ane o Ioritana

o Kalilaia o nu‘u ‘ese.

16O le nu‘u sa nofo i le pouliuli,

‘ua latou iloa le malamalama tele;

o i latou fo‘i sa nonofo i le nu‘u ma le ata o le oti,

‘ua alu a‘e le malamalama ‘iā te i latou.”

17Talu mai ai na āfua ‘ona tala‘i atu e Iesu, ‘ua fa‘apea atu, “‘Inā salamō ia ‘outou; auā ‘ua latalata mai le mālō o le lagi.”#Mata 3.2

‘Ua Vala‘auina e Iesu Tagata Faifaiva

(Mare 1.16-20; Luka 5.1-11)

18‘Ua savali ane Iesu e latalata ane i le vai o Kalilaia, ‘ona silafia lea e ia o le uso e to‘alua, o Simona ‘ua igoa ‘iā Peteru ma Aneterea lona uso, ‘ua la lafo le ‘upega i le vai, auā o tagata fai faiva i lā‘ua. 19‘Ona fetalai atu lea o ia ‘iā te i lā‘ua, “‘Inā mulimuli mai ia, ‘iā te a‘u, ‘ou te faia ‘oulua ma fai faiva i tagata.” 20‘Ona la tu‘ua loa lea o lā‘ua ‘upega, ‘ae mulimuli atu ‘iā te ia.

21‘Ua tuana‘i fo‘i e ia lea mea, ‘ona silafia lea e ia o le isi uso e to‘alua, o Iakopo le atali‘i o Sepetaio, ma Ioane lona uso, ‘ua i le va‘a ma lo la tamā o Sepetaio, ‘ua latou fai māsae o latou ‘upega;#4.21 fai māsae o latou ‘upega: po o o lo‘o sauni o latou ‘upega. ‘ua ia vala‘au atu fo‘i ‘iā te i lā‘ua. 22‘Ona lā tu‘ua loa lea o le va‘a ma lo la tamā, ‘ae mulimuli atu ‘iā te ia.

O A‘oa‘oga ma Fa‘amālōlōga a Iesu

(Luka 6.17-19)

23‘Ua fa‘ata‘amilo Iesu i Kalilaia uma, ‘ua ia a‘oa‘o i o latou sunako, ‘ua ia tala‘i atu fo‘i le tala lelei o le mālō ma fa‘amālōlō e ia o ma‘i uma ma ma‘i tigā uma o le nu‘u.#Mata 9.35; Mare 1.39 24‘Ua o‘o atu ai lona logo i Suria uma, ‘ona latou ‘aumai ai lea ‘iā te ia o ē ‘ua mama‘i ‘atoa uma, o ē ‘ua i ai ma‘i ‘ese‘ese, ma ē ‘ua puapuagātia, ma ē ‘ua uluitinoina e temoni, ma ē ‘ua ma‘i māliu, ‘atoa ma ē ‘ua mama‘i i le supa; ‘ona fa‘amālōlōina lea o i latou e ia. 25‘Ona mulimuli atu lea ‘iā te ia o le motu o tagata e to‘atele mai Kalilaia ma Tekapoli ma Ierusalema ma Iutaia ma ona tala atu o Ioritana.

Currently Selected:

Mataio 4: RSCB

Highlight

Copy