Mataio 14

O le Fasiotiga o Ioane le Papatiso

(Mare 6.14-29; Luka 9.7-9)

1O ia ona po ‘ua lagona ai e le tupu o Herota le tala ‘iā Iesu;#Luka 3.19, 20 2‘ona fai atu lea o ia i ana ‘au‘auna, “O Ioane le papatiso lenā; ‘ua tu mai o ia i ē ‘ua oti; o le mea fo‘i lea ‘ua fai ai vāvega e ia.”

3Auā na pu‘e e Herota ‘iā Ioane, ‘ua fusifusi fo‘i ‘iā te ia ma tu‘uina atu o ia i le fale puipui, ‘ona o Herotia le avā a Filipo lona uso.#Luka 3.19-20 4Auā ma fai atu Ioane ‘iā te ia, “E sā ‘ona fai o ia mau avā.”#Levi 18.16; 20.21 5A o Herota#14.5 Herota: po o ia. ‘ua fia fasioti ‘iā te ia, a ‘ua mata‘u i le motu o tagata, auā o la latou tāofi o le perofeta o ia.#Mata 21.26

6‘Ua o‘o ‘ina fai le fa‘amanatuga o le aso na fānau mai ai Herota, na sa‘asa‘a i o latou luma le tama teine a Herotia, na ia fa‘afiafia fo‘i ‘iā Herota. 7O le mea lea na ia matuā fai atu ai ‘iā te ia ma le augani na te avatu ‘iā te ia se mea na te ole mai ai.

8A o ia, ‘ua fa‘aosoina e lona tinā, ‘ua fai atu, “‘Ia e ‘aumai ‘i‘inei ‘iā te a‘u le ulu o Ioane le papatiso i se tanoa.”

9‘Ona tigā ai lea o le tupu; a ‘ona o le augani ma ē ‘ua ta‘o‘oto e ‘a‘ai fa‘atasi ma ia, ‘ua ia poloa‘i atu e avatua. 10‘Ona ‘auina atu ai lea e ia se tasi, ‘ua vavae mai le ulu o Ioane i le fale puipui.#Mata 17.12 11‘Ona ‘aumai ai lea o lona ulu i le tanoa, ‘ua avane i le teine, ‘ua na ‘aveina atu fo‘i i lona tinā. 12‘Ona ō ane ai lea o ona so‘o, ‘ua ‘ave le tino, ‘ua tanu ai; ‘ua latou ō mai fo‘i ma ta‘u mai ‘iā Iesu.

‘Ua Fafagaina e Iesu le To‘atele o Tagata

(Mare 6.30-44; Luka 9.10-17; Ioane 6.1-14)

13‘Ua fa‘afofoga i ai Iesu, ‘ona maliu ‘ese ai lea o ia i lea mea i le va‘a i le mea tu‘ufua ‘ua nā o ia. ‘Ua fa‘alogo ai le motu o tagata, ‘ona latou mulimuli atu ai lea ‘iā te ia ‘ua ui a uta mai ‘a‘ai. 14‘Ua maliu atu Iesu, ‘ua na silafia le motu o tagata e to‘atele, ‘ona mutimutivale ai lea o lona alofa ‘iā te i latou, ‘ua fa‘amālōlō fo‘i e ia o latou ma‘i.#Mata 9.36

15‘Ua o‘o i le afiafi, ‘ona ō mai ai lea o ona so‘o ‘iā te ia, ‘ua fa‘apea mai, “O le mea tu‘ufua lenei, ‘ua leva fo‘i le aso; ‘ia e tu‘uina atu le motu o tagata, ‘ina ‘ia latou ō i ‘a‘ai e fa‘atau ni mea e ‘ai mā latou.”

16A ‘ua fetalai atu Iesu ‘iā te i latou, “E lē aogā ‘ona latou ō; ‘ia ‘outou avane ni mea latou te ‘a‘ai ai.”

17‘Ona latou fai mai lea ‘iā te ia, “E leai ni a tatou mea ‘i‘inei, ‘ua nā o areto e lima ma i‘a e lua.”

18‘Ua fetalai atu o ia, “‘Aumaia ‘i‘inei ‘iā te a‘u.” 19‘Ona fetalai atu ai lea o ia i le motu o tagata ‘ia latou ta‘o‘oto i le mutia. ‘Ona tago lea o ia i areto e lima ma i‘a e lua,#14.19 areto e lima ma i‘a e lua po o areto e limagafua ma i‘a e lua lau. ‘ua tepa a‘e i le lagi, ‘ua fa‘afetai; ‘ua ia tofitofi fo‘i i areto, ma avatu i le ‘au so‘o, ‘ona avatu ai lea e le ‘au so‘o i le motu o tagata. 20‘Ona ‘a‘ai ai lea o i latou uma lava, ‘ua mā‘o‘ona; ‘ua latou fu‘e fo‘i toe ‘aiga, ‘ua tūtūmu ai ‘ato e sefulu ma le lua.#2 Tu 4.44 21O i latou fo‘i na ‘a‘ai pe limaafe o tane, ‘ae le‘i faitaulia fafine ma tamaiti.

‘Ua Savali Iesu i Luga o le Vai

(Mare 6.45-52; Ioane 6.15-21)

22‘Ona u‘una‘i loa lea o Iesu ona so‘o e ō a‘e i le va‘a, e muamua atu ‘iā te ia i le tasi itū, se‘ia tu‘uina atu e ia le motu o tagata ‘ia ō. 23‘Ua tu‘uina atu e ia le motu o tagata ‘ia ō, ‘ona maliu a‘e lea ‘ua nā o ia i le mauga e tatalo. ‘Ua o‘o i le afiafi, ‘ua nā o ia sa i ai.#Luka 6.12; 9.18 24A o le va‘a ‘ua i totonu o le vasa ‘ua felafoa‘iina i le sou; auā ‘ua agi mai i luma le matagi.

25‘Ua maliu atu Iesu ‘iā te i latou i le leoleoga e fa o le po,#14.25 leoleoga e fa o le po: po o le itūlā e 3 i le 6 i le taeao. ‘ua savali i luga o le vai. 26‘Ua iloa mai e le ‘au so‘o o ia ‘ua savali i luga o le vai, ‘ona latou atuatuvale ai lea, ‘ua fa‘apea ane, “O le aitu;” ‘ona latou uiō lea i le matata‘u.#Luka 24.37

27‘Ona fetalai atu loa lea o Iesu ‘iā te i latou ‘ua fa‘apea atu, “‘Ia ‘outou loto tetele; o a‘u lava, ‘aua tou te matata‘u.”

28‘Ua tali mai Peteru ‘iā te ia, ‘ua fa‘apea mai, “Le Ali‘i e, ‘āfai o oe, ‘ia e fetalai mai ‘iā te a‘u, ‘ou te alu atu ‘iā te oe i luga o le vai.”

29‘Ona fetalai atu lea o ia, “‘Inā sau ia.” ‘Ona alu ifo ai lea o Peteru mai le va‘a, ‘ua savali i luga o le vai e alu ‘iā Iesu. 30‘Ua va‘ai o ia i le matagi ‘ua tetele, ‘ona fefe ai lea; ‘ona āfua ai lea ‘ona goto, ‘ua ‘alaga mai, ‘ua fa‘apea mai, “Le Ali‘i e, ‘ia e fa‘aola mai ‘iā te a‘u.”

31‘Ona ‘a‘apa atu loa lea o Iesu o lona ‘a‘ao, ‘ua tago ‘iā te ia, ‘ua fa‘apea atu ‘iā te ia, “O oe na, lē fa‘atuatua itiiti, se ā le mea ‘ua e māsalosalo vale ai?”#Mata 8.26

32‘Ona la ō a‘e lea i le va‘a ‘ona malū ai lea o le matagi. 33‘Ona ō mai ai lea o ē na i le va‘a ‘ua ifo mai ‘iā te ia, ‘ua fa‘apea mai, “E moni, o oe lava o le Alo o le Atua.”

‘Ua Fa‘amālōlō e Iesu le ma‘i i Kenesareta

(Mare 6.53-56)

34‘Ua ō atu i latou i le tasi itū, ‘ua o‘o i le nu‘u, o Kenesareta. 35‘Ua iloa mai o ia e tagata o lea nu‘u, ‘ona latou fe‘au atu ai i lea itū uma lava, ‘ua latou ‘aumai ai ‘iā te ia o ē mama‘i uma lava; 36ma ‘ua latou ‘ai‘oi ‘iā te ia, tau lava ‘ina latou papa‘i i le tu‘upao o lona ‘ofu; ‘ua fa‘amālōlōina fo‘i o i latou uma o ē na papa‘i mai i ai.#Mata 9.21; Luka 6.19

Currently Selected:

Mataio 14: RSCB

Highlight

Copy