Luka 3
3
O le Tala‘iga a Ioane le Papatiso
(Mata 3.1-12; Mare 1.1-8; Ioane 1.19-28)
1O le tausaga e tasi le sefulu ma le lima i le nofoa‘iga a Tiperio Kaisara, sa pule Ponotio Pilato i Iutaia, o Herota fo‘i o le tupu ia o Kalilaia, ma Filipo lona uso o le tupu ia o Ituraia ma le nu‘u o Terekoniti, o Lusanio fo‘i o le tupu ia o Apilene; 2o Ana fo‘i ma Kaiafa o ositaulaga sili i lā‘ua, ‘ua o‘o ane ai le afioga a le Atua ‘iā Ioane le atali‘i o Sakaria i le vao. 3‘Ona alu atu ai lea o ia i itū uma o Ioritana, ‘ua tala‘i atu le papatisoga o le salamō ‘ina ‘ia fa‘amāgaloina agasala.
4Pei ‘ona tusia i le tusi o ‘upu a Isaia le perofeta:
“O le leo o lē ‘ua ‘alaga i le vao:
‘‘Inā teuteu ia ‘outou le ala o le Ali‘i,
‘ia fa‘alaulelei ona ala.
5E fa‘atumuina o vanu uma,
e fa‘amaulaloina fo‘i mauga ma mea maupu‘epu‘e uma;
e fa‘asa‘oina fo‘i o mea pi‘opi‘o,
ma mea gaoā e fai ma ala laulelei ia.
6E va‘aia fo‘i e tagata uma le fa‘aolataga mai le Atua.’”
7‘Ua fai atu o ia i le motu o tagata ē na ō mai e papatisoina e ia, “Fānau a gata fe‘ai e, o ai ‘ea sa na fa‘aali atu ‘iā te ‘outou e sōsōla ‘ese i le to‘asā atalī?#Mata 12.34; 23.33 8‘Ia ‘outou fua mai ni fua e tatau ma le salamō, ‘ae ‘aua tou te fa‘apea ifo i o ‘outou loto, ‘O Aperaamo, o ia o lo matou tamā;’ auā ‘ou te fai atu ‘iā te ‘outou, e mafaia lava e le Atua ‘ona fa‘atupuina mai i nei ma‘a ni fānau ma Aperaamo.#Ioane 8.33 9O lo‘o tu‘u nei fo‘i le mātau i tafu‘e o la‘au; o la‘au uma fo‘i e lē fua mai i fua lelei, e taia ma lafoina i le afi.”#Mata 7.19
10‘Ua fesili mai le motu o tagata ‘iā te ia, “Se a fo‘i se mea matou te faia?”
11‘Ua tali atu o ia, ‘iā te i latou, “O le tagata e lua ona ‘ofu tino, ‘ia avane ‘iā te ia e leai sona ‘ofu; o lē ‘ua ‘iā te ia mea e ‘ai, ‘ia fa‘apea fo‘i ‘ona fai.”
12‘Ua ō mai fo‘i tagata ao lafoga ‘ia papatisoina, ‘ua fa‘apea mai ‘iā te ia, “Le a‘oa‘o e, se a se mea matou te faia?”#Luka 7.29
13‘Ona fa‘apea atu lea o ia ‘iā te i latou, “‘Aua tou te fa‘asili i mea ‘ua totogi mai ‘iā te ‘outou.”
14‘Ua fesili fo‘i tagata tau ‘iā te ia, “Se a fo‘i se mea matou te faia?”
‘Ona fa‘apea atu lea o ia ‘iā te i latou, “‘Aua tou te fa‘asauā i se tasi, ‘aua tou te tu‘ua‘i fua se tasi; ‘ia ‘outou tali filemū i lo ‘outou taui.”
15A o fa‘atalitali le nu‘u, ma mānatunatu uma lava i o latou loto ‘iā Ioane, po o ia o le Keriso; 16‘ua tali atu Ioane ‘iā te i latou uma ‘ua fa‘apea atu, “O a‘u nei lē papatiso atu ‘iā te ‘outou i le vai, a o lē maliu mai, e silisili o ia ‘iā te a‘u, e lē aogā a‘u ‘ona tatala le nonoa o ona se‘evae; o ia lava na te papatiso ‘iā te ‘outou i le Agaga Pa‘ia ma le afi. 17O i lona ‘a‘ao lana asu, e fa‘amamā ai ē i lana fa‘aputuga saito; e fa‘apotopoto fo‘i e ia le saito i lona fale saito, ‘ae susunuina le otaota o saito i le afi e lē matineia.”
18O isi fo‘i ‘upu fa‘amafanafana e tele ‘ua ia folafola ai le tala lelei i le nu‘u. 19A o Herota le tupu o lē ‘ua a‘oa‘iina e ia ‘ona o Herotia le avā a lona uso, o Filipo, ‘atoa fo‘i ma mea leaga uma na faia e Herota;#Mata 14.3-4; Mare 6.17-18 20‘ua na fa‘aopoopoina lenei mea i mea uma, ‘ua tu‘uina atu e ia o Ioane i le fale puipui.
O le Papatisoga o Iesu
(Mata 3.13-17; Mare 1.9-11)
21‘Ua papatisoina le nu‘u uma ‘ona papatisoina ai lea o Iesu, ‘ua tatalo ia, ‘ona fa‘aavanoaina ai lea o le lagi, 22‘ona afio ifo lea o le Agaga Pa‘ia i ona luga, ‘ua tino mai e peiseaī se lupe, ‘ua o‘o mai fo‘i le si‘ufofoga mai le lagi, ‘ua fa‘apea mai, “O lo‘u Atali‘i pele oe, ‘ua ‘ou fiafia lava ‘iā te oe.”#Kene 22.2; Sala 2.7; Isai 42.1; Mata 3.17; Mare 1.11; Luka 9.35
O le Gafa o Iesu
(Mata 1.1-17)
23O Iesu fo‘i, po ‘ua tolugafulu o ona tausaga, ‘ina ‘ua amata lana galuega ‘ua manatu fo‘i tagata, o ia o le atali‘i o Iosefa, o le atali‘i ia o Heli, 24o le atali‘i ia o Matata, o le atali‘i ia o Levi, o le atali‘i ia o Melekei, o le atali‘i ia o Ianai, o le atali‘i ia o Iosefa, 25o le atali‘i ia o Matatia, o le atali‘i ia o Amosa, o le atali‘i ia o Nauma, o le atali‘i ia o Eseli, o le atali‘i ia o Nagae, 26o le atali‘i ia o Maato, o le atali‘i ia o Matatia, o le atali‘i ia o Semeina, o le atali‘i ia o Ioseka, o le atali‘i ia o Iota, 27o le atali‘i ia o Ioanana, o le atali‘i ia o Resa, o le atali‘i ia o Serupapelu, o le atali‘i ia o Salatielu, o le atali‘i ia o Nerei, 28o le atali‘i ia o Melekei, o le atali‘i ia o Atei, o le atali‘i ia o Kosamo, o le atali‘i ia o Elematama, o le atali‘i ia o Eru, 29o le atali‘i ia o Iose, o le atali‘i ia o Elisara, o le atali‘i ia o Iorimo, o le atali‘i ia o Matata, o le atali‘i ia o Levi, 30o le atali‘i ia o Simeona, o le atali‘i ia o Iuta, o le atali‘i ia o Iosefa, o le atali‘i ia o Ionamo, o le atali‘i ia o Eliakimo, 31o le atali‘i ia o Melea, o le atali‘i ia o Mena, o le atali‘i ia o Matata, o le atali‘i ia o Natano, o le atali‘i ia o Tavita, 32o le atali‘i ia o Iese, o le atali‘i ia o Iopeta, o le atali‘i ia o Poasa, o le atali‘i ia o Sala, o le atali‘i ia o Naasona, 33o le atali‘i ia o Aminatapu, o le atali‘i ia o Arama, o le atali‘i ia o Eserona, o le atali‘i ia o Faresa, o le atali‘i ia o Iuta, 34o le atali‘i ia o Iakopo, o le atali‘i ia o Isaako, o le atali‘i ia o Aperaamo, o le atali‘i ia o Tara, o le atali‘i ia o Nakori, 35o le atali‘i ia o Seruka, o le atali‘i ia o Reu, o le atali‘i ia o Peleko, o le atali‘i ia o Eperu, o le atali‘i ia o Selaa, 36o le atali‘i ia o Kainano, o le atali‘i ia o Afasata, o le atali‘i ia o Semu, o le atali‘i ia o Noa, o le atali‘i ia o Lameko, 37o le atali‘i ia o Metusela, o le atali‘i ia o Enoka, o le atali‘i ia o Iareto, o le atali‘i ia o Maalaelu o le atali‘i ia o Kainano, 38o le atali‘i ia o Enosa, o le atali‘i ia o Setu, o le atali‘i ia o Atamu,#3.38 Atamu: O le talaga o le gafa o Iesu e Luka, e amata mai ‘iā Iesu ‘ae fa‘ai‘u ‘iā Atamu. E fa‘ailoa mai ai o Atamu o le tamā o tagata uma, o Iesu o le Mesia mo tagata uma ma le lalolagi ‘atoa. o le atali‘i ia o le Atua.
Currently Selected:
Luka 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.