Ioelu 2
2
E Faigatā le To‘asā o le Atua
1‘Ia ‘outou ilia le pū i Siona, ‘ia ta‘alili i lo‘u mauga pa‘ia,#Ioe 1.15; 2.15
‘ia tetemū i latou uma o ē nonofo i le nu‘u;
auā o le a o‘o mai le aso o le ALI‘I, auā ‘ua latalata mai.
2O le aso pouliuli ma le pogisā,
o le aso malumalu ma le pogisā lava,
e pei o le malamalama o le taeao ‘ona sosolo i mauga.
O le nu‘u tele ma le malolosi, e leai sona tusa mai vavau;
a mavae ia e lē toe fa‘apea lava i lea tupulaga ma lea tupulaga.
3O lo‘o i o latou luma le afi e fano ai,#Kene 2.8-9; Isai 51.3; Ioe 1.19, 20; Sala 7.14
o lo‘o i o latou tua fo‘i le afi mumū;
o le fanua i o latou luma e pei o le fa‘ato‘aga i Etena ia,
a o latou tua, ‘ua fa‘alalaoina ia;
e leai lava se mea e sao ‘iā te i latou.
4E tino mai i latou e fa‘apei ‘ona tino mai o solofanua;#Fa‘aa 9.7-9
pei o ē ti‘eti‘e i solofanua,
e fa‘apea lava ‘ona latou taufetuli.
5Latou te taufaioso, e pei o le ta‘alili o kariota i tumutumu mauga,#Isai 5.24; Ope 18; Nau 3.2
e pei o le ta‘alili o le mū o le afi e susunuina ai tagutugutu o saito,
e pei o le nu‘u malosi ‘ua pae tau.
6E gatete tagata i luma ‘iā te i latou,#Nau 2.10
e sesega mata o tagata uma.
7Latou te taufetuli e pei o tagata totoa;
latou te tausili i le ‘aupā e pei o tagata tau;
latou te sāvavali ta‘itasi i lona ala,
latou te lē ‘alo fo‘i ai le mea e ui ai i latou.
8E le tulei le tasi i le tasi;
latou te sāvavali ta‘itasi i lona ala;
a latou pa‘u‘ū fo‘i i tao e le manunu‘a ai.
9Latou te tamomo‘e i le ‘a‘ai;#Isai 33.4; Iere 9.21; Ioane 10.1
latou te taufetuli fo‘i i le ‘aupā;
latou te fea‘e‘ei i fale;
latou te ulufale atu i fa‘amalama e pei o se gaoi.
10E tetemū le lalolagi i o latou luma; e lūlūina le lagi;#Fa‘aa 8.12; Sala 18.7; Isai 13.10
e pouliuli le lā ma le masina,
o fetū fo‘i e lē toe fepulafi mai.
11O le ALI‘I fo‘i na te tulei mai lona si‘ufofoga i ana ‘au;#Fa‘aa 6.17; Ioe 2.25; Mala 3.2; 1 Tesa 4.16
auā e matuā tele lava lana itūtau‘a;
auā e malosi o ia le na te fa‘ataunu‘uina lana afioga.
Auā e mamafa le aso o le ALI‘I, e matuā mata‘utia.
Po o ai sē na te mafaia ‘ona talia?
O le Vala‘au ‘ina ‘ia Salamō
12O lenei, ‘ua fa‘apea mai le ALI‘I:#Teu 4.30; 1 Samu 7.3, 6; Iere 4.1
‘Ia ‘outou toe fo‘i mai ‘iā te a‘u ma o ‘outou loto ‘atoa,
ma le anapogi ma le fētāgisi ma le tagiauē.
13‘Ia ‘outou saeia o ‘outou loto, ‘ae lē o ‘outou ‘ofu,#Eso 34.6; Nume 23.19; Sala 34.18; 86.5, 15; Eseki 24.14; Hakai 2.19; Mala 3.10
ma toe fo‘i mai i le ALI‘I lo ‘outou Atua
auā e alofa fua ma alofa mutimutivale o ia,
e telegese lona to‘asā ‘ua tele fo‘i lona alofa,
e salamō ia ‘ona o le leaga.
14Po o ai se tasi ‘ua iloa,
pe toe fo‘i mai o ia, ma salamō ma tu‘uina mai le manuia pe a mavae atu ia mea
o le taulaga lea i mea e ‘ai ma le taulaga i mea e inu i le ALI‘I lo ‘outou Atua?
15‘Ia ‘outou ilia le pū i Siona,
‘ia ‘outou ‘atofaina ni aso e anapogi ai,
‘ia ‘outou tala‘iina se fa‘apotopotoga.
16‘Ia ‘outou fa‘apotopotoina le nu‘u,#Teu 24.5; Iosu 3.5; 2 No 20.13; Fai 3.5; 1 Kori 7.5
‘ia ‘outou fa‘apa‘iaina le potopotoga,
‘ia ‘outou fa‘apotopotoina toeaina,
‘ia aofia tamaiti, ‘atoa ma ē o fesusui;
‘ia alu atu le fa‘ato‘āfaiavā a‘i lona potu
ma le fa‘ato‘ānofotane a‘i lona afeafe.
17‘Ia fētāgisi le ‘au ositaulaga o ‘au‘auna a le ALI‘I,
i le vā o le fa‘apaologa ma le fatafaitaulaga,
ma ‘ia latou fa‘apea atu, “Le ALI‘I e ‘ia e fa‘asaoina lou nu‘u,
‘aua fo‘i ‘e te tu‘uina atu lou tofi ‘ia fa‘alumaina,
‘ina ne‘i fai ma fa‘atusa o nu‘u ‘ese;
latou te fa‘apea i se a i nu‘u, ‘O ifea lo latou Atua?’”
‘Ua Toe Fa‘atamao‘āigaina e le Atua le Lau‘ele‘ele
18‘Ona fuā lea o le ALI‘I ‘ona o lona nu‘u,#Sala 103.13; Saka 1.14
na te alofa mutimutivale i ona tagata.
19E tali mai le ALI‘I, ma fa‘apea mai i lona nu‘u:#Sala 4.7; Ioe 1.10; Mala 3.10-13
Fa‘auta mai, ‘ou te foa‘iina atu ‘iā te ‘outou le saito,
ma uaina ma suāu‘u tou te mā‘o‘ona ai;
‘ou te lē toe tu‘uina atu ‘iā te ‘outou ‘ia fa‘alumaina e nu‘u ‘ese.
20‘Ou te fa‘ate‘a mamao ‘iā te ‘outou o ‘au mai le itū i matū,
‘ou te tulia i latou i le nu‘u naumati ma le gaogao,
e fa‘asaga o latou mata i le sami i sasa‘e;
e fo‘i o latou tua i le sami tupito,
e alu a‘e fo‘i lo latou elo, e alu a‘e fo‘i ma lona sauga,
auā o mea tetele ‘ua ia faia.
21Le fanua e, ‘aua ‘e te fefe;#Sala 126.2-3
‘ia e fiafia ma ‘oli‘oli,
auā e faia e le ALI‘I mea tetele.
22O manu vaefā o le vao e, ‘aua tou te fefefe,
auā ‘ua tupu le mutia i mea e tata‘a ai manu o le vao,
auā ‘ua fua mai le la‘au i lona fua,
o le mati ‘atoa ma le vine ‘ua matuā fua mai lava.
23O ‘outou fo‘i o le fānau a Siona e, ‘ia ‘outou fiafia ma ‘oli‘oli i le ALI‘I lo ‘outou Atua;#Teu 11.14; Sala 100.1-2; Hose 6.3; Sapa 3.18
auā ‘ua ia foa‘iina fa‘atatau mai ‘iā te ‘outou le timuga muamua,
na te fa‘atotōina ifo fo‘i le timu mo ‘outou, o le timuga muamua,
‘atoa ma le timuga mulimuli i le masina muamua.
24E tūtūmu mea e sasa ai saito i saito,
e taumasuasua o latou tu‘ugāuaina i le uaina ma le suāu‘u.
25‘Ou te taui atu ‘iā te ‘outou
o tausaga na ‘aina e le sē akerise, ma le sē aleka, ma le se kasili, ma le sē kasama,
o la‘u itūtau‘a tele na ‘ou ‘auina atu ‘iā te ‘outou.
26Tou te ‘a‘ai lava ma mā‘o‘ona ai,#Levi 25.19; Isai 49.23
tou te vivi‘i atu fo‘i i le suafa o le ALI‘I lo ‘outou Atua,
o lē ‘ua faia vāvega ‘iā te ‘outou;
e lē mā fo‘i lo‘u nu‘u e fa‘avavau.
27Tou te iloa fo‘i, ‘ou te i ai ‘iā Isaraelu,
o a‘u lava o le ALI‘I lo ‘outou Atua,
‘ae leai se tasi; e lē mā lo‘u nu‘u e fa‘avavau.
O le Aso o le Ali‘i#2.28-32 O le matā‘upu 3.1-5 i le Tusi Pa‘ia Eperu
28Mulimuli ane, e i‘u ‘ina ‘ou liligi ifo ai lo‘u Agaga i luga i tagata uma;#Galu 2.17-21
ona perofeta ai lea o ‘outou atali‘i ma o ‘outou afafine,
e fai miti o ‘outou toeaina, e iloa fa‘aaliga e o ‘outou taulele‘a.
29‘Ou te liligi ifo fo‘i lo‘u Agaga#Mata 24.30; 1 Kori 12.13
i ‘au‘auna ma ‘au‘auna fafine, i ia ona aso.
30‘Ou te tu‘uina atu fo‘i vāvega
i le lagi ma le lalolagi,
o le toto ma le afi ma le asu fa‘aniutū.
31E muamua ‘ona liua le lā i le pouliuli ma le masina i le toto,#Mata 24.29; Mare 13.24-25; Luka 21.25; Fa‘aa 6.12-13
i le o‘o ai i le aso tele ma le silisili o le ALI‘I.
32E i‘u fo‘i ‘ina fa‘aolaina o i latou uma lava o ē vala‘au atu i le suafa o le ALI‘I;#Roma 10.13
auā e i ai le fa‘aolataga i le mauga o Siona ma Ierusalema,
fa‘apei ‘ona fetalai mai ai o le ALI‘I,
e i ai fo‘i i ē ‘ua totoe o i latou ia e vala‘auina e le ALI‘I.
Currently Selected:
Ioelu 2: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
