Iopu 37
37
O toe ‘Upu i le Lauga a Eliu
1“O le mea fo‘i lenei ‘ua gatete ai lo‘u loto,
‘ua sapotuvale ai fo‘i i le mea o i ai.
2‘Inā matuā fa‘alogologo atu ia i le ta‘alili o lona si‘ufofoga,
ma le gogolo ‘ua o‘o atu nai lona fofoga.
3‘Ua ia ta‘ita‘iina ai i lalo o le lagi ‘atoa uma,
ma lona uila fo‘i e o‘o i tulu‘iga o le lalolagi.
4E mulimuli ane ai, ‘ona ta‘alili mai ai lea o le leo;#Iopu 40.9; Sala 18.13; 29.3-9; 68.33
‘ua ia fa‘apā mai le faititili i lona si‘ufofoga silisili;
‘ua ia lē tāofi fo‘i i ai pe a lagona lona si‘ufofoga.
5‘Ua fa‘apā mai, e le Atua le faititili silisili ‘ese i lona si‘ufofoga;
e faia e ia mea tetele e lē mailoa e i tatou.
6Auā e fetalai ane o ia i le kiona,
‘‘Inā tō ia oe i le lau‘ele‘ele;’
‘ua fa‘apea fo‘i i le timu ma ona timuga e matuā tetele.
7Na te tāofi lima o tagata uma,#Sala 109.27
‘ina ‘ia iloa e tagata uma lana galuega.
8‘Ona ō ai lea o manu fe‘ai i mea latou te fale ai,
ma ta‘o‘oto i o latou ana.
9E sau le asiosio mai le itū i saute,#Iopu 1.19; Isai 21.1
ma le ma‘alili mai le itū i matū.
10O le mānava mai o le Atua e ‘aumai ai le vaito‘a;
e fa‘aitiitiina ai fo‘i le lautele o vai.
11O lona pupula fo‘i e tō ifo ai le ao uliuli;
o lona malamalama e ta‘ape‘ape ai ao.
12E fe‘avea‘iina ai e ia fa‘ata‘amilomilo i lana pule,#Sala 148.8; Fa‘ata 8.31
‘ina ‘ia fai ai mea uma ‘ua ia finagalo i ai i luga o le atu laulau uma lava.
13Na te fa‘ao‘oina mai ai, po o le a‘oa‘iga,#Eso 9.18; 1 Samu 12.18-19; 1 Tu 18.45; Esera 10.9; Iopu 36.31; 38.23, 26-27
po o lona lau‘ele‘ele po o le alofa.
14“Iopu e, fa‘afofoga mai ia i lenei mea;
‘inā tula‘i mai ia, ma mafaufau i vāvega o le Atua.
15‘Ua e iloa ‘ea pe fa‘apefea ‘ona saunia o ia mea e le Atua,
ma fa‘a‘emoina mai e ia le uila o lona ao?
16‘Ua e iloa ‘ea le fuatia o le mamafa o ao uliuli,#1 Samu 2.3; Iopu 36.4
o vāvega o Lē e ona le poto ‘ato‘atoa?
17Pe fa‘apefea fo‘i ‘ona vevela ai ou ‘ofu
‘ina ‘ua fa‘amāninoaina e ia le lalolagi i le matagi mai le itū i saute?
18Na ‘oulua fofola fa‘atasi ‘ea ma ia le lagi,#Kene 1.16; Isai 42.5; 44.24
‘ua mālōlō e pei o se fa‘aata ‘apamemea?
19‘Inā e fa‘ailoa mai ia pe se a se ‘upu matou te fai atu ai ‘iā te ia;
matou te lē mafai ‘ona sauni atu ai ‘ona o le pouliuli.
20E ta‘uina atu ‘ea ‘iā te ia ‘ua ‘ou tautala?
‘Āfai e tautala atu se tasi, e fano ai lava o ia.
21O lenei, e lē va‘aia le malamalama pupula o lo‘o i ao o le lagi;
‘ae agi mai le matagi, ‘ona matafitafi ai lea.
22E sau le pupula fa‘aauro mai le itū i matū#Sala 104.1
o lo‘o i le Atua le mamalu mata‘utia.
23A o Lē e ona le malosi uma lava,#Sala 99.4; Paru 3.33; 1 Timo 6.16
tatou te lē mafai ‘ona iloa o ia;
e silisili ‘ese lona malosi ma lona fa‘amasinoga,
e sili fo‘i lana amiotonu, na te lē agaleaga.
24O le mea lea e matata‘u ai tagata ‘iā te ia;#Sala 130.4; Mata 10.28; 11.25; 1 Kori 1.26
na te lē silasila i se tasi o ē o popoto o latou loto.”
Currently Selected:
Iopu 37: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
