Iopu 30
30
O ‘Upu a Iopu
1“A o ona po nei ‘ua tapisa mai ai ‘iā te a‘u i latou e itiiti o latou aso i o‘u;
ta ‘ino‘ino e tu‘u fa‘atasi o latou tamā ma ta‘ifau o lo‘u lafu mamoe.
2A o le malosi o latou lima se a ‘ea lona aogā ‘iā te a‘u,#Iopu 24.4-8; 30.2-8
o ē ‘ua mavae lo latou malosi?
3O le mativa ma le oge na tino vavale ai i latou;
na sōsōla atu i le nu‘u naumati,
o le pouliuli, o le ta‘aligoligoa ma le gaogao.
4O ē na fafati i maluka i tafatafa o vao iti,
ma a‘a o ratami e fai mā latou mea e ‘ai.
5Na tuli‘esea i latou i le mea o i ai tagata,
na latou tuli‘alaga ‘iā i latou e pei o se gaoi.
6Na latou nonofo i vanu,#1 Samu 13.6; Iere 4.29
ma ana fo‘i o le lau‘ele‘ele ma papa.
7Na latou fētāgisi i totonu o vao iti,#Iopu 6.5; Fa‘ata 24.31
e pei o asini o le vao;
na fa‘apotopotoina i latou i lalo o le vao ogoogo.
8O le fānau i latou a tagata vālea;
o le fānau fo‘i a ē ‘ua lē igoā;
na tuli‘eseina i latou i le nu‘u.
9“A o ona po nei ‘ua ‘avea ai a‘u ma a latou pese,#Iopu 17.6; Sala 69.12; Paru 3.14, 63
‘ua fai fo‘i a‘u ma fa‘atauemuga ‘iā te i latou.
10‘Ua latou ‘ino‘ino mai ‘iā te a‘u,#Isai 50.6; Mata 26.67; 27.30
ma ‘alo‘alo mamao ‘iā te a‘u;
‘ua latou le tāofia o latou feanuga i o‘u luma.
11Auā ‘ua tatalaina e le Atua la‘u maea ma na fa‘atigāina a‘u,
‘ina ‘ia latou fa‘atauemu mai ‘iā te a‘u.
12‘Ua tula‘i mai tama leaga i lo‘u itū taumatau,#Iopu 19.12
‘ua latou tavae mai i o‘u vae,
‘ua latou tanu fo‘i o latou ala ‘ia malaia ai a‘u.
13‘Ua latou lepeti lo‘u ala,
‘ua latou fa‘ateleina lo‘u malaia,
e leai se fesoasoani mai ‘iā te i latou.
14‘Ua latou feosofi mai i le malae laolao;#Iopu 16.14
ma latou osofa‘i a‘u i le taimi e tasi.
15‘Ua fa‘asagasaga mai ‘iā te a‘u mea mata‘utia;
‘ua latou tuliloa mai i lo‘u mamalu e pei o le matagi:
‘ua mavae atu fo‘i lo‘u manuia e pei o le ao.
16“O lenei, ‘ua fa‘avaivaia lo‘u loto i totonu ‘iā te a‘u;#1 Samu 1.15
‘ua maua a‘u i aso o le puapuagā.
17‘Ua tigā tele lava o‘u ivi i le po,
e lē mapu i le gāoi o lo‘u tino.
18O lo‘u ma‘i ‘ina ‘ua matuā tele ‘ua fai mo‘u ‘ofu;
‘ua fusi ‘iā te a‘u e pei o le ua o lo‘u ‘ofu tino.
19‘Ua ia lafotūina a‘u i le palapala;#Kene 18.27; Iopu 42.6
‘ua ‘avea fo‘i a‘u e pei o le efuefu ma le lefulefu.
20‘Ua ‘ou ‘alaga atu ‘iā te oe, a ‘e te lē tali mai ‘iā te a‘u;
‘ua ‘ou tu atu, a ‘e te le‘i silasila mai ‘iā te a‘u.
21‘Ua liua oe ‘ua e fa‘atigā ‘iā te a‘u;#Iopu 16.9; Isai 63.10
‘ua e tuliloa mai ‘iā te a‘u i lou ‘a‘ao malosi.
22‘Ua e si‘itia a‘u, ‘ua e fa‘ati‘eti‘e ‘iā te au i le matagi;
‘ua e fa‘avaivaia ma fa‘amata‘utia a‘u.
23Auā ‘ua ‘ou iloa ‘e te ‘avea a‘u i le oti,#Iopu 19.25
ma le fale ‘ua tofia mo tagata ola uma lava.
24“‘Ae peita‘i na te lē fa‘ao‘o atu lona ‘a‘ao i le tu‘ugamau,
pe ‘āfai e i ai ‘iā te i latou le tatalo i lona fa‘ao‘oina o le malaia.
25‘Ou te le‘i tagi ‘ea ‘ona o lē na puapuagātia?#Sala 35.13-14; Roma 12.15
E le‘i fa‘anoanoa ‘ea lo‘u loto ‘ona o lē ‘ua mativa?
26Na ‘ou fa‘atalitali i le lelei, ‘ona o‘o mai ai lea o le leaga;
na ‘ou fa‘amoemoe fo‘i i le malamalama, ‘ona o‘o mai ai lea o le pogisā.
27‘Ua sapotuvale lo‘u manava ma ‘ua lē to‘a filemū;#2 Samu 22.6
‘ua o‘o mai ‘iā te a‘u aso o le puapuagā.
28‘Ua ‘ou fealua‘i ‘ua uliuli ‘ae lē o le lā;
‘ua ‘ou tula‘i i le fa‘apotopotoga ma ‘ou ‘alaga.
29‘Ua ‘avea a‘u ma uso o tanimo ma uō o iaena.#Isai 13.21; Mika 1.8
30‘Ua uliuli lo‘u lava pa‘u, ‘ua mū fo‘i o‘u ivi i le vevela.#Sala 102.3; 119.83; Paru 4.8; 5.10
31‘Ua liua fo‘i la‘u kitara ma fa‘anoanoaga,#Paru 5.15
o la‘u fa‘aili fo‘i ‘ua liua ma leo o ē fētāgisi.
Currently Selected:
Iopu 30: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
