Iopu 3
3
O le Fetu‘uina e Iopu o le Aso na Fānau ai o ia; o ia fo‘i ‘ua fia Oti
1Mulimuli ane ‘ua tautala atu Iopu ma fetu‘u i lona aso. 2‘Ua fai atu fo‘i Iopu, ‘ua fa‘apea atu,
3“‘Ia fano le aso na fānau mai ai a‘u ma le po na fai ane ai,#Iopu 10.18-19; Iere 20.14-18
‘‘Ua tō le fafine, o le tama tane.’
4‘Ia ‘avea lenā aso ma pouliuli,
‘aua ne‘i su‘esu‘eina e le Atua mai lugā;
‘aua ne‘i pupula i ai le malamalama.
5‘Ia toe maua e le pouliuli ma le ata o le oti,#Iopu 10.21-22; Sala 23.4; Isai 9.2; Luka 1.79
‘ia tumau i ona luga le ao,
‘ia fa‘amata‘utia i mea e pouliuli ai le aso.
6O lenā po, ‘ia faoa e le pouliuli tele,
‘aua ne‘i ‘oli‘oli o ia fa‘atasi ma aso o le tausaga,
‘aua fo‘i ne‘i o‘o o ia i le faitauina o masina.
7Fa‘auta, ‘ia vale lava lea po,
‘aua ne‘i i ai se pese fiafia.
8‘Ia fa‘afanoina ia e i latou o ē ‘ua fetu‘uina aso,#Iopu 41.1; Isai 27.1
o ē ‘ua popoto e fa‘aoso mai i leviatana.
9‘Ia fa‘apouliuliina fetū o lona afiafi po,
‘ia fa‘atalitali i le malamalama, ‘ae leai lava;
‘aua fo‘i ne‘i va‘ai atu o ia i laumata o le taeao.
10Auā sa lē punitia e ia o faitoto‘a o le manava o lo‘u tinā,#1 Samu 1.5
ma ‘ua lē natia le tigā ‘iā te a‘u.
11“Se a le mea na lē oti ai a‘u ‘ina o fa‘ato‘ā te‘a mai i le manava?
Se a le mea na lē tō ai la‘u mānava ‘ina o ‘ou sau mai le manava?
12Se a le mea na talia ai a‘u i tulivae?#Kene 30.3; 50.23
Se a fo‘i na talia ai a‘u e susu ‘ou te susu ai?
13Auā po o pe na ‘ua ‘ou ta‘oto ai ma le filemū,
ma ‘ou moe ai; ‘ona ‘ou mālōlō ai lea,
14fa‘atasi ma tupu ma faipule o le lalolagi,#Isai 58.12
o ē na ati a‘e mo i latou o mea ‘ua gaogao;
15po o fa‘atasi ma ali‘i sili, o ē na i ai auro,
o ē na fa‘atūtūmuina o latou fale i ario;
16po o pei o se fānau le au ‘ua natia,#Sala 58.8; Fai 6.3; 1 Kori 15.8
‘ua leai lava o a‘u; e pei o tama meamea ‘ua lē iloa le malamalama.
17O lea mea ‘ua lē toe i ai le fa‘asoesā o tagata amio leaga;
o lea mea fo‘i ‘ua mālōlō ai ē na lailoa.
18‘Ua fīfīlemū fa‘atasi ai o ē sa noanoatia,#Eso 3.7
latou te lē fa‘alogologo i le leo o lē ‘ua fa‘asauā.
19O i ai i lea mea o tagatanu‘u ‘atoa ma ali‘i,
‘ua sa‘oloto ai fo‘i le pologa nai lona ali‘i.
20“Se a le mea ‘ua tu‘uina mai ai le malamalama i lē ‘ua tigāina,#1 Samu 1.10; 2 Tu 4.27; Iopu 10.1; Fa‘ata 31.6
ma le ola i ē ‘ua fa‘anoanoa o latou loto?
21O ē ‘ua fa‘atalitali i le oti, a ‘ua lē o‘o mai;#Fa‘aa 9.6
e tele fo‘i ‘ona ‘eli i ai, ‘ae itiiti i le ‘oloa ‘ua natia.
22O ē ‘ua matuā ‘oli‘oli, ‘ina ‘ua fiafia pe a maua e i latou le tu‘ugamau.
23Se a le mea ‘ua tu‘uina mai ai le malamalama,#Iopu 19.8; Isai 40.27
i le tagata o lē ‘ua lilo lona ala, ‘ua puipuia fo‘i o ia e le Atua?
24Auā ‘ua mua‘i sau lo‘u mapuitigā a o le‘i ‘ai a‘u,#Sala 22.1; 38.8; 42.3; 80.5; 102.9
ma ‘ua maligi mai ‘ou fa‘ataiō e pei o vai.
25Auā o le mea na ‘ou matuā fefe ai,#Fa‘ata 10.24
‘ua o‘o mai lea ‘iā te a‘u,
‘ua o‘o mai fo‘i ‘iā te a‘u le mea na ‘ou mata‘u i ai.
26‘Ua ‘ou le filemū, ‘ua ‘ou le mapu fo‘i,
‘ua ‘ou le mālōlō, a ‘ua o‘o mai le atuatuvale.”
Currently Selected:
Iopu 3: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
