Iopu 24
24
O Toe ‘Upu o le Tali a Iopu ‘iā Elifasa
1“‘Ua lē lilo tausaga i Lē e ona le malosi uma lava,#Iopu 15.20; Fai 9.12; Isai 2.12; 13.6; Ioe 1.15; 2.1; Amo 5.18
o lenei, se a le mea ‘ua, lē iloa ai ona aso e i latou ‘ua masani ma ia?
2‘Ua si‘i tuā‘oi nisi; ‘ua latou faoa le lafu mamoe, ma latou fafaga ai.
3‘Ua latou ‘avea le asini a ē na aumatuā,#Iopu 22.6
‘ua latou ‘ave le povi a le fafine ‘ua oti lana tane e fai ma mea tu‘u fa‘afa‘atau.
4‘Ua latou tuleia ē ‘ua matitiva nai le ala;
‘ua lalafi fa‘atasi ai o ē ‘ua puapuagātia i le nu‘u.
5Fa‘auta, e pei o asini o le vao,#Sala 104.21, 23
latou te ō atu ai ‘iā latou galuega,
e ala sā‘ili i se mea e fao;
o le vao latou te maua mai ai mea e ‘ai ma a latou fānau.
6‘Ua latou selesele mea e faga a‘i a latou manu i le fanua ‘ese;
‘ua latou tau le fua o le tō vine ‘ua maua i le amio leaga.
7‘Ua aoina o latou o fa‘asautia o ē matitiva,#Eso 22.26-27
e leai fo‘i so latou ‘ie afu i le ma‘alili.
8‘Ua susū i latou i le timuga i mauga,
‘ua fa‘amalu fo‘i i le papa ‘ina ‘ua leai se mea e malu ai.
9“‘Ua latou faoa nai fānau iti mai o latou tinā ‘ua oti o latou tamā,
ma fa‘atau atu e totogi a‘i ‘aitalafu.
10O i latou ‘ua fealua‘i telenoa ma le lē lavalavā;#2 Timo 2.6; Iako 5.4
‘ua fia ‘a‘ai fo‘i i latou o ē tautu‘u a latou fusi saito.
11‘Ua latou tatau le suāu‘u i o latou fale,
‘ua latou solisoli i o latou soligāvine, a ‘ua latou fia inu.
12O lo‘o feoi tagata i le ‘a‘ai, o lo‘o ‘alalaga fo‘i o ē ‘ua manunu‘a;#Iere 51.52
‘ae le‘i fa‘afofoga le Atua ‘iā latou tatalo.
13“E i ai nisi e ‘ino‘ino i le malamalama;#Ioane 3.19-20
latou te lē iloa ona ala, latou te lē tumau fo‘i i ona magāala.
14‘Ua tula‘i i le vave ao le fasi tagata,#Sala 10.8, 11
‘ua ia fasioti i lē ‘ua puapuagātia ma lē ‘ua mativa;
‘ua pei o se gaoi fo‘i o ia i le po.
15‘Ua fa‘atalitali fo‘i le tagata mulilua i le segisegi,#Fa‘ata 7.9
o lo‘o fa‘apea ifo, ‘E lē iloa a‘u e se tasi;’
‘ua ia ufiufi fo‘i ona mata.
16Latou te uluulu i fale i le po,#Eso 22.2; Mata 6.20
‘ae lalafi i le ao;
auā latou lē manana‘o i le malamalama.
17Auā e fiafia i latou i le po nai lo le ao,
e lē fefefe fo‘i i latou i le mata‘utia o le po.
18“E tusa i latou ma se mea māmā i luga o le vai;#Iopu 9.26; Hose 10.7
‘ua fa‘afanoina o latou tofi i le lalolagi;
‘ua lē fa‘asaga i latou i le ala i tōvine.
19‘Ua fa‘aumatia vai kiona i le lā ma le vevela,#Iopu 21.13
e fa‘aumatia fo‘i o ē agasala i le tu‘ugamau.
20E fa‘agalogaloina o ia e le manava o lona tinā,
e suamalie o ia i ilo, e lē toe manatua o ia;
e gauia fo‘i lē ‘ua amioletonu e pei o le la‘au.
21“E agaleaga o ia i le fafine pā ‘ua lē fānau;
‘ua ia lē agalelei fo‘i i le fafine ‘ua oti lana tane.
22E gausia e le Atua o ē ‘ua malolosi i lona malosi;
a tula‘i le Atua, ‘ona lē fa‘atuatua ai lea o se tasi i lona ola.
23E tu‘uina e le Atua ‘iā te ia ‘ia saogalemū,#Sala 11.4; Fa‘ata 15.3
‘ua ia fa‘alagolago fo‘i i ai;
e silasila fo‘i o ia i o latou ala.
24E fa‘amaualulugaina i latou i nai aso,#Iopu 14.2; Sala 37.10
‘ona leai lea o i latou; ‘ua fa‘aumatia fo‘i i latou,
‘ua fa‘apotopotoina e pei o tagata uma;
e salaina fo‘i i latou e pei o le tumutumu o ‘au o saito.
25‘Āfai e lē fa‘apea,
O ai sē na te fa‘ailoa mai lo‘u pepelo,
ma fa‘alēaogāina la‘u ‘upu?”
Currently Selected:
Iopu 24: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
