Isaia 44
44
O le Manuia e tupu mai le Agaga o le Atua
1A o lenei:#Isai 49.1, 5
Fa‘alogo mai ia Iakopo e la‘u ‘au‘auna
o Isaraelu fo‘i na ‘ou filifilia.
2O lo‘o fa‘apea ‘ona fetalai mai o le ALI‘I,
o lē na faia oe ma na fa‘atupuina oe i le manava;
o lē fesoasoani ‘iā te oe;
‘Aua ‘e te fefe la‘u ‘au‘auna Iakopo e,
o Iesuruna fo‘i na ‘ou filifilia.
3Auā ‘ou te liligi atu le vai i le nu‘u naumati,#Isai 35.6; Ioe 2.28
ma vaitafe i le ‘ele‘ele matūtū.
‘Ou te liligi atu lo‘u Agaga i luga o lau fānau,
ma la‘u fa‘amanuia i luga o ē tutupu mai ‘iā te oe.
4E tutupu a‘e i latou i totonu o le mutia,
e pei o garava i ‘auvai o vaitafe.
5E fai mai le tasi, “O a‘u o le tagata o le ALI‘I;”#Isai 14.1
e ta‘u atu le tasi i le igoa o Iakopo.
‘Ae tusi le tasi i lona lima, “Mo le ALI‘I;”
e fa‘aigoa fo‘i o ia e ia i le igoa o Isaraelu.
6O lo‘o fa‘apea ‘ona fetalai mai o le ALI‘I,#Isai 48.12; Fa‘aa 1.17; 22.13
o le Tupu o Isaraelu o lē na fa‘atauina fo‘i o ia.
O le ALI‘I o ‘au, o a‘u lē muamua, o a‘u fo‘i lē mulimuli;
‘ae leai se atua, ‘ua na o a‘u lava.
7O ai ‘ea fo‘i e pei o a‘u ‘ona vala‘au ma fa‘aali atu,#Isai 41.4, 26-27
ma sauni mai mo a‘u, talu ‘ona ‘ou tofia le nu‘u mai le vavau?
‘Ia latou fa‘aali atu ‘iā i latou mea o le a tutupu,
ma mea e o‘o mai.
8‘Aua le fefefe ‘outou; ‘aua fo‘i le matata‘u;
pe na a‘u le fa‘ailoa atu ‘ea ‘iā te oe anamua,
ma a‘u ta‘uina atu ‘iā te oe?
O a‘u molimau lava ‘outou;
pe i ai ‘ea se atua, ‘ua na o a‘u lava?
‘Ua leai lava se papa, ‘ou te lē iloa se tasi.
O le Tapua‘i i Tupua
9O ē fai tupua ‘ua ta, e fa‘atauva‘a i latou uma, ma a latou mea fa‘afiafia, ‘ua lē aogā lava ia; o i latou lava e molimau ‘iā i latou; latou te lē va‘ai, latou te lē iloa fo‘i, ‘ina ‘ia latou mama.#Isai 30.29; 41.24, 29 10O ai ‘ea ‘ua na faia se atua ma na gaosia se tupua u‘amea, e leai lava sona aogā? 11Fa‘auta e mamā i latou uma o ē fa‘atasi ma ia; o tufuga fo‘i, o tagata lava i latou ‘ia fa‘apotopoto i latou uma; ‘ia latou tutū i luga; e matata‘u i latou, e mamā fa‘atasi.#Sala 115.5-8
12O le tufuga fai mea u‘amea na te faia se to‘i; na te gaosia i le malala; na te faia i samala; na te galue i ai i lona lima malosi; ‘ua fia ‘ai fo‘i o ia, ‘ona leai lea o sona malosi, ‘ua lē inu ia i se vai, ‘ona vaivai ai lea o ia.
13O le tufuga na te fa‘ata‘otoina le fua, na te tusia i le peni, na te faia i tofi, na te tusia i le fua fa‘ata‘ali‘oli‘o, na te faia e pei o le tino o le tagata, e tusa ma le matagofie o le tagata, ‘ina ‘ia nofo i le fale. 14‘Ua ia tu‘u i lalo arasi mo ia, ‘ua ‘aumai e ia o le tiresa ma le aluna, na te fa‘amalosia fo‘i mo ia i la‘au o le vao; ‘ua ia totōina le orene, ‘ona tupu tele ai lea i le uaga. 15‘Ona faia lea e le tagata ma fafie, ‘ua ia ‘ave fo‘i nisi mea e mumulu a‘i o ia; na te fa‘amūina lava ma tao a‘i areto; na te faia lava se atua ma ifo atu i ai; na te fai a‘i se tupua ‘ua ta ma ifo faō i ai. 16O le tasi ona vaega la‘au ‘ua ia susunu ai i le afi; o le tasi ona vaega ‘ua ia ‘ai ai le tufa‘aga; na te tu‘una le mea e tunu, ‘ua mā‘ona fo‘i o ia; ‘ua mumulu ai lava o ia, ‘ona fa‘apea ane lea o ia, “Ena! ‘ua ‘ou mafanafana, ‘ua ‘ou iloa le afi.”
17O le mea fo‘i ‘ua totoe na te fai a‘i se atua, o lana tupua ‘ua ta; ‘ua ia ifo faō i ai, ma tapua‘i atu i ai; ‘ua ia tatalo fo‘i i ai, o lo‘o fa‘apea atu, “‘Ia e lavea‘i mai ‘iā te a‘u, auā o lo‘u atua lava oe.”
18‘Ua latou lē iloa, ‘ua latou le lagona; auā ‘ua ufitia o latou mata ‘ia lē va‘ai, ma o latou loto ‘ina ‘ia lē mafaufau. 19‘Ua lē mafaufau o ia, ‘ua leai se poto, ‘ua leai se fa‘autauta se‘i fa‘apea ane ai o ia, “O le tasi ona vaega la‘au ‘ua ‘ou susunuina lea i le afi, ‘ua ‘ou taoa fo‘i le areto i ona malala ola; ‘ua ‘ou tunua le tufa‘aga, ma a‘u ‘aina; ‘ou te faia ‘ea le mea ‘ua totoe ma mea e ‘inosia? ‘ou te ifo faō ‘ea i le ogāla‘au?”#Teu 27.15
20‘Ua fai māna mea e ‘ai le lefulefu; o le loto pelogia ‘ua fa‘aliliu‘eseina ai o ia; o lea na te lē malavea‘iina ai o ia ‘iā te ia, na te lē fai ane fo‘i, “E lē o le pepelo ‘ea ‘ua i lo‘u lima taumatau?”
O le Ali‘i o le Fa‘aola ma na Ia Faia Mea Uma
21‘Ua fetalai mai le ALI‘I:#Isai 43.25
‘Ia e manatu i nei mea Iakopo e;
o Isaraelu fo‘i, auā o la‘u ‘au‘auna oe.
‘Ua ‘ou faia oe, o la‘u ‘au‘auna oe;
Isaraelu e, e lē galo oe ‘iā te a‘u.
22‘Ua ‘ou sōloia ou solitulafono e pei o se ao uliuli,
ma au agasala e pei o se ao;
fo‘i mai ‘iā te a‘u, auā ‘ua ‘ou fa‘atauina oe.
23‘Ia pese oe le lagi e,#Isai 49.13; 55.12; Hose 2.21-22
auā ‘ua faia lea mea e le ALI‘I.
‘Ia ‘alalaga ‘outou o mea maulalalo i le lalolagi;
‘ia leo tetele ‘outou mauga e, ma ‘alalaga fiafia.
O oe le vao ma la‘au uma o i ai;
auā ‘ua fa‘atauina Iakopo e le ALI‘I,
na te fa‘atupuina fo‘i lona lava vi‘iga ‘iā Isaraelu.
24O lo‘o fa‘apea ‘ona fetalai mai o le ALI‘I lē na fa‘atau ‘iā te oe,
o lē na fa‘atupuina fo‘i oe i le manava;
O a‘u o le ALI‘I lē na faia mea uma;
o lē fa‘amafolafola le lagi na o a‘u lava;
o a‘u lava o lē fofolaina le lalolagi.
25O lē na te fa‘alēaogāina fa‘ailoga o ē pepelo;#1 Kori 1.20; Isai 19.3
na te fa‘avaleleaina o ē fa‘ataulāitu;
o lo‘o fa‘aliliuina i tua o ē popoto,
na te fa‘alēaogāina o latou poto.
26O lo‘o fa‘amauina le ‘upu a lana ‘au‘auna,#2 No 36.22-23; Iere 32.15, 44
na te fa‘ataunu‘uina fo‘i le pule a ana sāvali.
O lo‘o fa‘apea ane i Ierusalema, “E ‘ainā o ia;”
o lo‘o fa‘apea fo‘i i ‘a‘ai a Iuta,
“E faia lava ia; ‘ou te fa‘atūina fo‘i ana mea ‘ua fa‘atafunaina;”
27O lē fai atu i mea loloto,
“‘Ia fa‘apa‘umatūina ‘ou te fa‘amamate fo‘i i ou vaitafe.”
28O lē fai atu ‘iā Kuresa,#2 No 36.23; Esera 1.2; 2 Samu 5.2
“O lo‘u leoleo mamoe o ia;
na te fa‘ataunu‘uina fo‘i o mea uma ‘ou te loto i ai;”
O lo‘o fai atu fo‘i i Ierusalema,
“E faia lava oe;”
O lo‘o fai atu fo‘i i le malumalu,
“E fa‘avaeina lava oe.”
Currently Selected:
Isaia 44: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.