Isaia 38
38
O le Ma‘i o Esekia ma lana Tatalo; o lana Fa‘afetai ‘ina ‘ua Mālōlō
(2 Tu 20.1-11; 2 No 32.24-26)
1O ona po ia na ma‘i ai Esekia, ‘ua tāli oti. ‘Ona sau ai lea ‘iā te ia o le perofeta o Isaia le atali‘i o Amota, ‘ua fai mai ‘iā te ia, O lo‘o fa‘apea ‘ona fetalai mai o le ALI‘I, “Sauni ia sau mavaega i lou ‘āiga, auā o le a e maliu, ‘e te lē soifua.”
2‘Ona liliu atu ai lea e Esekia ona fofoga i le pā o le fale, ‘ua tatalo atu o ia i le ALI‘I, 3‘ua fa‘apea atu, “Le ALI‘I e, ‘ou te ‘ai‘oi atu, ‘ia e manatu mai i lo‘u savali i ou luma ma le fa‘amaoni, ma le loto ‘atoa, ‘ua ‘ou faia fo‘i mea ‘ua e finagalo i ai.” ‘Ona tagi lotulotu ai lea o Esekia.#2 Tu 18.5-6
4‘Ona o‘o mai ai lea o le afioga a le ALI‘I ‘iā Isaia, ‘ua fa‘apea mai, 5“Alu ia, ‘inā e fai atu ‘iā Esekia, O lo‘o fa‘apea ‘ona fai mai o le ALI‘I le Atua o Tavita lou tamā, ‘Ua ‘ou fa‘alogo i lau tatalo, ‘ua ‘ou iloa ou loimata; fa‘auta fo‘i, ‘ou te fa‘aopoopo i aso o lou ola o tausaga e sefulu ma le lima; 6‘Ou te lavea‘i fo‘i ‘iā te oe ma le ‘a‘ai nei a‘i le lima o le tupu o Asuria; ‘ou te fa‘amamaluina fo‘i lenei ‘a‘ai.#Isai 37.35
7“O lenei fo‘i le fa‘ailoga mai le ALI‘I ‘iā te oe ‘e te iloa ai, e faia e le ALI‘I lenei lava mea ‘ua na fetalai mai ai.#2 Tu 20.9-11 8Fa‘auta, ‘ou te fa‘afo‘i atu le ata i vaega na uma ‘ona alu ifo i le mea a Aasa e vaevae ai itūlā, ‘ia fo‘i atu i vaega e sefulu.” ‘Ona fo‘i atu ai lea o le lā i vaega e sefulu, o vaega lava ia ‘ua uma ‘ona alu ifo ai.
9O le tusi a Esekia le tupu o Iuta, ‘ina ‘ua mālōlō o ia sa ma‘i:
10Na a‘u fa‘apea ane, o le tautuluaga o lo‘u ola,#Sala 102.24
‘ou te ulu atu ai i faitoto‘a o le tu‘ugamau,
e ‘ave‘esea o‘u tausaga ‘ua totoe.
11Na a‘u fa‘apea ane: ‘Ou te lē toe iloa le ALI‘I,#Sala 27.13; 31.22
o le ALI‘I lava, i le nu‘u o tagata ola;
‘ou te lē toe va‘ava‘ai i tagata,
fa‘atasi ma ē o nonofo i le lalolagi.
12‘Ua lia‘iina lo‘u fale,#Iopu 4.20; 6.9; 7.6; 2 Kori 5.1
‘ua ‘ave‘eseina ‘iā te a‘u e pei o le fale ‘ie o le leoleo mamoe;
‘ua ‘ou ta‘ata‘aia lo‘u ola e pei o lē laga ‘ie;
‘ua na vavae‘eseina a‘u i pito manoa;
o le aso e tasi ‘e te fa‘aumatia ai a‘u.
13Na a‘u fīfīlemū se‘ia ao,
‘ona ia momomo ai lea o o‘u ivi uma e pei o se leona;
o le aso e tasi ‘e te fa‘aumatia ai a‘u.
14E pei o le pe‘ape‘a, po o le akuru,#Sala 69.3; Isai 59.11
e fa‘apea lava ‘ona ‘ou i‘i;
‘ou te tagi e pei o le lupe;
‘ua tigā o‘u mata i lo‘u va‘ava‘ai a‘e;
le ALI‘I e, ‘ua puapuagātia a‘u,
‘ia fai oe mo‘u fesoasoani.
15Pe se a se mea ‘ou te fai atu ai?
a fetalai mai lava o ia ‘iā te a‘u,
o ia fo‘i na ia faia;
‘ou te savali ma le fa‘amaulalo i o‘u tausaga uma,
‘ona o le tigā o lo‘u loto.
16Le Ali‘i e, o mea ia e ola ai tagata;
o mea uma ia e ola ai lo‘u agaga;
‘e te fa‘amālōlō ‘iā te a‘u,
‘e te fa‘aola fo‘i ‘iā te a‘u.
17Fa‘auta, ‘ua suia lo‘u tigā tele i le filemū;#Sala 103.12; 119.75
na e finagalo e lavea‘iina#38.17 finagalo e lavea‘iina: O nisi fa‘aliliuga; finagalo alofa. a‘u i le lua e fa‘aumatia ai;
auā ‘ua e lafoa‘iina a‘u agasala uma i ou tua.
18Auā e le vivi‘i atu le tu‘ugamau ‘iā te oe;
e le fa‘ane‘ene‘e le oti ‘iā te oe;
o ē ō ifo i le lua latou te lē fa‘amoemoe i lou fa‘amaoni.
19O lē ‘ua ola, o lē ‘ua ola,#Teu 4.9; Sala 78.3-4
o ia lava e vivi‘i atu ‘iā te oe,
e pei o a‘u lava i le aso nei;
e fa‘ailoa lou fa‘amaoni o le tamā i lana fānau.
20‘Ua fa‘aolaina a‘u e le ALI‘I;
matou te taia a‘u nekina i le fale o le ALI‘I i aso uma o lo matou ola.
21Auā sa fai atu Isaia,#2 Tu 20.7
“‘Ia latou ‘ave se potopotoga mati,
ma tu‘u ai o tu‘ivaivai i le mea na fulaga‘i,
‘ona mālōlō ai lea o ia.”
22Sa fai atu fo‘i Esekia, “Se a se mea ‘ou te iloa ai, ‘ou te alu a‘e i le fale o le ALI‘I?”#2 Tu 20.8
Currently Selected:
Isaia 38: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
