Isaia 34
34
O le Fa‘asalaga o Etoma
1‘Inā fa‘alatalata mai ia ‘outou nu‘u ‘ese
‘ina ‘ia fa‘alogologo mai ai;
‘outou nu‘u fo‘i, ua‘i mai ia o ‘outou taliga;
fa‘alogologo mai ia le lalolagi ma mea uma ‘ua tumu ai,
o le atu laulau ma mea uma ‘ua tutupu mai ai.
2Auā o lo‘o i nu‘u ‘ese uma le to‘atama‘i o le ALI‘I,
o lona to‘asā fo‘i o lo‘o ‘iā latou ‘au uma lava;
‘ua ia fa‘afanoina i latou,
‘ua ia tu‘uina atu lava i latou ‘ia fasiotia.
3E lafoa‘iina lo latou fasi, e alu a‘e fo‘i le elo i o latou tino oti,
e tafe‘esea mauga i o latou toto.
4E mavae fo‘i ‘au uma lava a le lagi,
e ta‘ata‘aia le lagi e pei o se tusi;
e pa‘u‘ū a latou ‘au uma lava,
e pei ‘ona pa‘u‘ū o lau o le vine,
e pei ‘ona pa‘u‘ū o lau o le mati.#Mata 24.29; Mare 13.25; Luka 21.26; Fa‘aa 6.13-14; Ioe 2.31
5Auā e ‘onā la‘u pelu i le lagi;
fa‘auta, e alu ifo ia i luga o Etoma,
i luga lava o le nu‘u ‘ua ‘ou fa‘afanoina,
‘ina ‘ia fa‘asalaina.#Isai 63.1-6; Iere 49.7-22; Mala 1.2-6
6‘Ua mā‘ona le pelu a le ALI‘I i le toto;
‘ua malie i le ga‘o;
o le toto o tama‘i mamoe ma ‘oti,
o le ga‘o o i ai fatuga‘o o mamoe po‘a;
auā e i le ALI‘I le taulaga i Posara,
ma le fasi tele i le lau‘ele‘ele o Etoma.
7E pa‘u‘ū fo‘i rema fa‘atasi ma i latou
ma povi ta‘anoa fa‘atasi ma povi po‘a;
e ‘onā o latou lau‘ele‘ele i le toto,
e malie fo‘i lo latou efuefu i le ga‘o.
8Auā e i le ALI‘I le aso e taui ai ma sui;
o le tausaga e taui atu ai i ē o finau ma Siona.
9E liu pulu safeta ona vaitafe, e liu teiō fo‘i ona efuefu,
e ‘avea fo‘i lona lau‘ele‘ele ma pulu safeta o mū.
10E lē tineia lava ia i le po, po o le ao;
e pusa a‘e pea lava lona asu;
e tu‘ufua ia i lea tupulaga ma lea tupulaga,
e lē uia e fa‘avavau fa‘avavau lava.#Fa‘aa 14.11; 19.3; Isai 66.24
11‘Ae faia mo kati ma kifota;
e nonofo ai fo‘i o inesofe ma oreva;
na te faloina fo‘i i ona luga le fua e fa‘agaogaoina ai,
ma le fua fa‘atautau e fa‘atu‘ufuaina ai.
12E lē o i ai fo‘i ni ona ali‘i latou te tofia e pule;
o ona ali‘i sili e lē toe ai lava so latou.
13E tutupu a‘e la‘au tuitui i ona maota,
o vao ogoogo fo‘i ma la‘au talatala e tātupu i ona ‘olo;
e ‘avea fo‘i ma mea e nonofo ai luko ma mea e nonofo ai iaena.#Isai 13.22; 32.13
14E fetaia‘i ai manu fe‘ai o le vao ma aie;
e fevala‘aua‘i fo‘i ‘oti o le vao,
e nofo filemū ai le lilita,
e maua ai fo‘i e ia se mea e mālōlō ai.
15E fai ai e le kifosa lona ōfaga ma tu‘u ai ona fua,
ma togitogi ai, e ufiufi fo‘i i ai i lona tino;
e fa‘apotopoto ai taie e ta‘ilua.
16‘Inā sā‘ili‘ili ia i le tusi a le ALI‘I ma faitau i ai;
e leai so latou e i‘u vale;
e leai se tasi e lē iloa lona soa;
auā o lona fofoga ‘ua fetalai atu ai,
o lona agaga fo‘i, o ia na te fa‘apotopotoina i latou.
17O ia fo‘i na faia le vili mo i latou,
o lona ‘a‘ao na vaevaeina ai mo i latou i le fua fa‘ata‘oto;
e faia mo i latou e fa‘avavau,
latou te mau ai i lea tupulaga ma lea tupulaga.#Sala 78.55; Fa‘ata 16.33
Currently Selected:
Isaia 34: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
