Isaia 18

O le Malaia o Aitiope

1E! le nu‘u e ‘ua palalū ona ‘apa‘au,

o lē ‘ua i ona tala atu o vaitafe o Aitiope.#Sefa 2.12

2O lē ‘ua tu‘u sāvali e ui i le sami,

i va‘a kome fo‘i i fogātai;

‘ina o ia ‘outou savali tele vavave

i le nu‘u malosi ma le totoa.

O le nu‘u mata‘utia talu lona amataga;

o le nu‘u matua malosi lava

ma le manumālō ‘ua so‘oso‘o vaitafe lo latou lau‘ele‘ele.

3O ‘outou uma o ē nonofo i le atu laulau,

o ‘outou fo‘i o ē mau i le lalolagi,

a fa‘atūina le tagāvai i mauga

‘ia ‘outou va‘ai atu i ai;

a ilia fo‘i le pū ‘ia ‘outou fa‘alogo i ai.

4Auā ‘ua fa‘apea ‘ona fetalai mai o le ALI‘I ‘iā te a‘u:

‘Ou te nofo filemū ma ‘ou va‘ai atu i le mea ‘ou te nofo ai,

e pei o le vevela tele i la‘au iti,

e pei o le sau ‘ua totō i le vevela i ona po e selesele ai.

5Auā a o le‘i o‘o i ona po e selesele ai,

a mavae le fuga,

a liu vine moto fo‘i le fuga,

e sala e ia ‘ona la i polo teu vine,

na te ‘ave‘eseina moemoe ‘ina ‘ua vavae‘eseina.#Eseki 31.3, 12-13

6E tu‘ua i latou fa‘atasi ma manu felelei

e fe‘ai o i mauga ma manu fo‘i e tata‘a i le lau‘ele‘ele;

e ‘atoa le tau vevela e nonofo ai manu felelei,

e ‘atoa fo‘i le tau ma‘alili e nonofo ai manu uma e tata‘a i le lau‘ele‘ele.

7O ona po ia e ‘aumai ai mea alofa i le ALI‘I o ‘au, o le nu‘u malosi ma le totoa, o le nu‘u fo‘i e mata‘utia talu lona amataga, o le nu‘u matua malosi lava ma le manumālō, ‘ua so‘oso‘o vaitafe lo latou lau‘ele‘ele, e ‘aumaia i le mea o i ai le suafa o le ALI‘I o ‘au, o le mauga o Siona.#2 Samu 7.13; Sala 68.31; Isai 18.2; Sefa 3.10

Currently Selected:

Isaia 18: RSCB

Highlight

Copy

Compare