Isaia 10
10
O le Malaia o ē Amio Leaga
1‘Oi talofa i ē pule i pulega leaga,
o ē tusi fo‘i i tusi fa‘asauā;#Sala 94.20; Iere 8.8
2‘ina ‘ia liliu ‘ese le finauga a ē ‘ua matitiva
ma ‘ia faoa le fa‘amasinoga o ē matitiva i lo‘u nu‘u;
‘ina ‘ia fai mā latou vete mea a fafine ‘ua oti a latou tane,
ma latou faoa mea a ē ‘ua aumatuā.
3Se a fo‘i se mea tou te faia i le aso
e fa‘ao‘o ai le sala ma le malaia e o‘o mai i le mea mamao?
Tou te sōsōla ‘ea ‘iā te ai e maua ai se fesoasoani?
O ifea fo‘i tou te tu‘u ai lo ‘outou mamalu?#Isai 5.26; Iere 5.29
4‘Ina ‘ia lē punonou fa‘atasi i latou
ma le tāfeaga ma pa‘u‘ū fa‘atasi ma ē ‘ua fasia.
E ui lava i ia mea uma, e le liliu ‘ese lona to‘asā,
‘ae fa‘aloaloa pea lona ‘a‘ao.
O le Tupu o Asuria o le mea Faigaluega a le Atua
5‘Oi talofa ‘iā Asuria, o le to‘oto‘o o lo‘u ita;
o le sasa fo‘i i o latou lima,
o lo‘u ita tele lea.#Isai 14.24-27; Nau 1.1—3.19; Sefa 2.13-15
6‘Ou te ‘auina o ia i le nu‘u fa‘alēmata‘u,
‘ou te tu‘u atu se poloa‘iga ‘iā te ia
i le nu‘u o lo‘o i ai lo‘u ita;
‘ina ‘ia ‘avea ai le vete, ‘ia ‘avea fo‘i mea e faoa,
ma ‘ia fai ai ma mea e solia, e pei o le palapala i le ala.
7A o ia e lē fa‘apea lona manatu,
e lē fa‘apea fo‘i le tāofi o lona loto;
auā o lona loto ‘ia fasiotia
ma ‘ia fa‘aumatia o nu‘u e tele.#Mika 4.12
8Auā e fa‘apea ane o ia,
“E lē ‘ua fai ma tupu ‘ea o ali‘i uma ‘ua ‘iā te a‘u?
9E lē tutusa ‘ea Kaleno ma Karekimisa?
E lē tutusa ‘ea Amato ma Arepa?
E lē tutusa ‘ea Samaria ma Tamaseko?#2 Tu 16.9; 17.6; 18.34; 19.13; 2 No 35.20; Iere 46.2; Amo 6.2
10E pei ‘ona maua e lo‘u lima o mālō o tupua,
o latou tupua ‘ua ta,
e sili ia i tupua o Ierusalema ma Samaria;
11e pei ‘ona ‘ou faia i Samaria ma ona tupua,
e lē fa‘apea ‘ea ‘ona ‘ou faia i Ierusalema ma ona tupua?”#2 Tu 18.34; Isai 2.8
12A fa‘auma e le Ali‘i lana galuega uma i le mauga o Siona ma Ierusalema, ‘ona ‘ou fa‘asala lea i le fuā o le loto fa‘amaualuga o le tupu o Asuria ma le fa‘alialia o ona mata fa‘asiasia. 13Auā o lo‘o fa‘apea ane o ia,
“O le malosi o lo‘u lima ma lo‘u poto
‘ua ‘ou fai ai ia mea;
auā ‘ua ‘ou fa‘autauta lava.
‘Ua ‘ou si‘i tuā‘oi o nu‘u,
‘ua ‘ou vetea fo‘i o latou ‘oloa,
pei o se toa fo‘i ‘ua ‘ou fa‘ato‘ilaloina ē o nonofo ai.#Isai 37.23-25
14‘Ua maua e lo‘u lima ‘oloa o nu‘u pei o se ōfaga,
pei o sē fa‘aputu fo‘i i fua o manu ‘ua tu‘ulafoa‘iina,
‘ua ‘ou fa‘aputuina e a‘u le lalolagi uma;
e leai fo‘i se tasi ‘ua si‘i lona ‘apa‘au,
pe fa‘amaga lona gutu pe i‘i.”
15E mitamita ‘ea le mātau i lē na te taia a‘i?
pe fa‘amaualuga atu ‘ea le ‘ili i lē na te ‘ilia a‘i?
Peiseaī e lūlūina e le to‘oto‘o lē na te si‘itia
peiseaī e si‘itia e le sasa o ia ‘ua lē se la‘au.#Isai 29.16; Roma 9.20-21
16O le mea lea e tu‘uina atu ai e le Ali‘i, o le ALI‘I o ‘au,
le tino vale i ona tagata puputa;
na te fa‘amūina le mū i lalo o lona matagofie,
e pei o le mumū o le afi.
17E ‘avea lava ma afi le Malamalama o Isaraelu,
e ‘avea fo‘i ma afi mumū lona Ali‘i Pa‘ia;
e susunu ai ma fa‘aumatia ai ona la‘au talatala
ma ona la‘au tuitui i le aso e tasi.#Ope 18
18E fa‘aumatia ai fo‘i le matagofie
o lona vao ma lona fanua lafulemū,
o le agaga ‘atoa ma le tino;
e vaivai fo‘i o ia pei o le tagata ma‘i.
19O nai la‘au o lona vao ‘ua totoe e itiiti ia,
e mafaia e se tama ‘ona faitauina.
O le a To‘aitiiti Latou e toe Fo‘i Mai
20O lea aso e lē toe fa‘alagolago ai ē ‘ua totoe o Isaraelu, ma ē ‘ua sao o le ‘āiga o Iakopo i lē na te taia i latou; ‘ae latou te fa‘alagolago fa‘amaoni i le ALI‘I le Pa‘ia o Isaraelu.#2 Tu 16.7; 19.14; Isai 4.2 21E toe fo‘i mai ē ‘ua totoe, o ē ‘ua totoe o Iakopo, i le Atua malosi. 22Auā e ui lava ‘ina tutusa o lo‘u nu‘u o Isaraelu ma le oneone i le sami, ‘ae fo‘i mai ‘iā te ia o ē ‘ua totoe. O le fa‘aumatia o i latou ‘ua ia pule ai, e lofia lea i le amiotonu.#Roma 9.27; Isai 6.13; 28.22; Tani 9.27; Roma 9.27-28 23Auā o le fa‘aumatia ‘ua pulea, e faia e le Ali‘i o le ALI‘I o ‘au i totonu o le nu‘u uma.
O le a Fa‘asalaina e le Ali‘i o Asuria
24O le mea lea o lo‘o fa‘apea ‘ona fetalai mai ai o le Ali‘i o le ALI‘I o ‘au: Lo‘u nu‘u e, o lē nofo i Siona, ‘aua ‘e te fefe ‘iā Asuria; na te taia oe i le to‘oto‘o, e si‘i fo‘i lana sasa ‘iā te oe, e fa‘apei o Aikupito. 25Auā e toe itiiti lava ‘ona uma ai lea o le ita tele, o lo‘u ita fo‘i e uma pe a fa‘aumatia i latou.#Isai 17.14 26E si‘i e le ALI‘I o ‘au le sasa i luga ‘iā te ia, pei o le fasiga o Mitiana i le papa o Oreva; e i ai fo‘i lana sasa i le sami, na te si‘itia e fa‘apei o Aikupito. 27O lea aso fo‘i e ‘ave‘eseina ai lana avega i lou fuatāua#10.27 ‘ave‘eseina…lana avega i lou fuatāua: po o ‘ave‘eseina le ‘amoga mai lou tau‘au. ma lona amo fo‘i i lou ua; e gausia fo‘i le amo ‘ona o lē fa‘au‘uina.
O le Osofa‘iga a le Fili
28‘Ua o‘o o ia i Aiata,#10.28 aiata: o le nofoaga lenei ma isi nofoaga o lo‘o ta‘ua i le fuai‘upu 28-32, e tutū latalata ane i Ierusalema; sa fa‘aaogā e tagata fouvale e fa‘ataunu‘uina ai a latou osofa‘iga.
‘ua ui ane i Mekerona, ‘ua tu‘u ana mea i Mekemase.#1 Samu 13.23; 17.22
29‘Ua latou ui atu i le ala, ‘ua fai Kapa mā latou api;
‘ua gatete Rama; ‘ua sola Kipea o Saulo.
30‘Inā ‘alaga ia oe le tama fafine a Kali,
‘ia fa‘alogo atu ai o Laisa, Anatota lē ‘ua puapuagātia e.
31‘Ua sola Matemena;
‘ua sōsōla lava ē sa nonofo i Kipima.
32E toe tasi le aso e nofo ai i Nove,
‘ona lu‘i tau atu lea o lona lima i le mauga o le tama fafine a Siona,
o le mauga fo‘i o i ai Ierusalema.
33Fa‘auta, o le Ali‘i o le ALI‘I o ‘au,
na te vavae‘eseina la la‘au i le malosi tele lava;
e tatu‘uina fo‘i ē ‘ua maualuluga ‘ona tutupu,
e fa‘amaulaloina fo‘i ē ‘ua fa‘amaualuluga.#Isai 10.18; Eseki 31.3; Nau 1.12
34Na te tatu‘uina fo‘i le vao filifili i le u‘amea,
e fa‘apa‘ūina fo‘i Lepanona i le malosi.
Currently Selected:
Isaia 10: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
