Hakai 2
2
‘Ua Fa‘amalosia le Nu‘u i le Galuega o le Malumalu
1O le fitu o masina, o le aso e lua sefulu ma le tasi i le masina, na ‘aumai ai le afioga a le ALI‘I e le perofeta o Hakai, o lo‘o fa‘apea mai:#Levi 23.34, 36 2‘Inā e fai atu lava ‘iā Serupapelu le atali‘i o Salatielu, le ali‘i e pule ‘iā Iuta ma Iosua le atali‘i o Iosataka le ositaulaga sili, ‘atoa ma ē ‘ua totoe o le nu‘u, ‘ia fa‘apea atu. 3O ai ‘ea so ‘outou ‘ua toe, o le na iloa lenei fale i lona mua‘i matagofie? pe se a lo ‘outou va‘ai nei i ai? E lē ‘ua peiseaī ‘ua leai ‘ea i o ‘outou manatu, pe a fa‘atusa ma lenā?#Esera 3.12; Hakai 2.9 4A o lenei, ‘ia e fa‘amalosi o oe o Serupapelu, ‘ua fetalai mai ai le ALI‘I; ma ‘ia e fa‘amalosi o oe o Iosua le atali‘i o Iosataka le ositaulaga sili; ma ‘ia fa‘amalolosi ‘outou tagata uma o le nu‘u, ‘ua fetalai mai ai le ALI‘I ma ‘ia ‘outou galulue; auā o a‘u, ‘ou te ‘iā te ‘outou, ‘ua fetalai mai ai le ALI‘I o ‘au. 5O le feagaiga na ‘ou osia ma ‘outou ‘ina ‘ua ō mai ‘outou nai Aikupito, ‘atoa ma lo‘u Agaga o lo‘o tumau ‘iā te ‘outou; ‘aua le fefefe ‘outou.#Eso 29.45-46; Nee 9.20; Saka 8.13, 15
6Auā o lo‘o fa‘apea ‘ona fetalai mai o le ALI‘I o ‘au: E toe tasi, e toe itiiti lava, ‘ona ‘ou lūlūina ai lea o le lagi ma le lalolagi ma le sami, ‘atoa ma le ‘ele‘ele matūtū. 7‘Ou te lūlūina fo‘i nu‘u uma; ‘ona o‘o mai ai lea o mea ‘ua mana‘omia e nu‘u uma; ‘ou te fa‘atumuina fo‘i lenei fale i le pupula, ‘ua fetalai mai ai le ALI‘I o ‘au.#Isai 52.15; 60.9, 17 8O lo‘o ‘iā te a‘u le ario, o lo‘o ‘iā te a‘u fo‘i le auro, ‘ua fetalai mai ai le ALI‘I o ‘au.#1 No 29.14, 16 9E sili le mamalu e lenei fale ‘ua mulimuli i lē na muamua, ‘ua fetalai mai ai le ALI‘I o ‘au; ‘ou te avatu fo‘i le manuia i le mea nei, ‘ua fetalai mai ai le ALI‘I o ‘au.
‘Ua Fautuaina e le Perofeta le ‘Au Ositaulaga
10O le aso e luafulu ma le fa, o le ivaga masina o le lua o tausaga o Tariu, na ‘aumai ai le afioga a le ALI‘I e le perofeta o Hakai, o lo‘o fa‘apea mai:#Hakai 2.18, 20 11‘Ua fa‘apea ‘ona fetalai mai o le ALI‘I o ‘au, Fesili ia i ositaulaga i le tulafono, ‘ia fa‘apea, 12‘Āfai e ‘ave e se tasi se tufa‘aga pa‘ia i lona pito ‘ofu, ‘ona pa‘i atu lea o lona pito ‘ofu i se areto, po o se mea ‘ua tunua, po o se uaina, po o se suāu‘u, po o se tasi mea e ‘aina, pe fa‘apa‘iaina ai ‘ea ia mea?
‘Ona tali mai lea o ositaulaga, ‘ua fa‘apea mai, “E leai.”
13‘Ona fai atu lea o Hakai, “‘Āfai ‘ua pa‘i atu lē ‘ua leaga i le tagata oti i se mea o ia mea, pe leaga ai ‘ea ia mea?”
‘Ona tali mai lea o ositaulaga, ‘ua fa‘apea, “E leaga ai.”#Levi 22.4, 6; Nume 19.22
14‘Ona tali atu lea o Hakai, ‘ua fa‘apea atu: ‘Ua fa‘apenā nei tagata, ‘ua fa‘apenā fo‘i lenei nu‘u i o‘u luma, o lo‘o fetalai mai ai le ALI‘I; ‘ua fa‘apenā fo‘i mea uma ‘ua faia e o latou lima, o mea fo‘i ‘ua latou avatua ‘i‘inā ‘ua leaga lava ia.
‘Ua Folafolaina e le Ali‘i lana Fa‘amanuiaga
15O lenei fo‘i, ‘ua mafaufau lava ‘outou, ‘ia āfua mai i lenei lava aso e o‘o i aso ‘ua tuana‘i, a o le‘i fa‘ae‘etia se ma‘a i luga o le tasi ma‘a i le malumalu o le ALI‘I; 16e āfua mai ia ona po, na alu ane ai le tagata i le fa‘aputugāsaito, o fuataga, e luafulu, a ‘ua i ai na o le sefulu; na alu ane le tagata i le tu‘ugāuaina e asu ai tumu e limagafulu ai le tu‘ugāuaina, a ‘ua i ai na o le luafulu. 17Na ‘ou taia ‘outou i le mamae, ma le polopologā, ma le uato‘a, i galuega uma a ‘outou lima; a ‘ua ‘outou le fo‘i mai ‘iā te a‘u, ‘ua fetalai mai ai le ALI‘I.#Iere 5.3; Amo 4.6, 9; Hakai 1.9 18Se‘i mafaufau lava ‘outou, ‘ia āfua mai i lenei lava aso, e o‘o i aso ‘ua tuana‘i, o le aso e luafulu ma le fa i le ivaga masina, talu le aso na fa‘avaeina ai le malumalu o le ALI‘I; ‘inā ‘outou mafaufau ia.#Esera 3.10; Hakai 2.10; Saka 8.9 19E i ai pea ‘ea le saito i le fale saito? ‘Ua o‘o fo‘i i lenei aso ‘ua lē fua mai le vine, ma le mati, ma le rimoni, ma le olive; e amata mai i lenei lava aso ‘ona ‘ou fa‘amanuia ‘iā te ‘outou.
20‘Ua o‘o mai fo‘i le afioga a le ALI‘I, o le atu lua lea, ‘iā Hakai i le aso e luafulu ma le fa o le masina, o lo‘o fa‘apea mai: 21Fai atu ia Serupapelu le ali‘i e pule ‘iā Iuta, ‘ia fa‘apea atu, ‘Ou te lūlūina le lagi ma le lalolagi;#Saka 4.6 22‘ou te fulisia le nofoāli‘i o mālō; ‘ou te fa‘aumatia fo‘i le malosi o mālō o nu‘u ‘ese; ‘ou te fulisia fo‘i kariota ma ē ti‘eti‘e ai; e pa‘u‘ū solofanua ma ē ti‘eti‘e ai, e fegasea‘i i latou ‘iā latou pelu.#Tani 2.44; Mika 5.10; Saka 14.13; Mata 24.7 23‘Ua fetalai mai le ALI‘I o ‘au, o lea lava aso ‘ou te ‘avea ai oe la‘u ‘au‘auna o Serupapelu le atali‘i o Salatielu, ‘ua fetalai mai ai le ALI‘I; ‘ou te faia oe e pei se fa‘amaufa‘ailoga; auā ‘ua ‘ou filifilia oe, ‘ua fetalai mai ai le ALI‘I o ‘au.
Currently Selected:
Hakai 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.