Efeso 4

‘Ia Loto Gatasi

1O lenei, o a‘u o lē ‘ua noanoatia ‘ona o le Ali‘i ‘ou te ‘ai‘oi atu ‘iā te ‘outou ‘ia ‘outou sāvavali ‘ia tusa ma le vala‘au ‘ua vala‘auina ai ‘outou.#Kolo 1.10 2‘Ia ‘outou loto maulalo lava ma le agamalū, ma le ‘onosa‘i, ‘ia ‘outou fa‘apalepale le tasi i le tasi ma le alofa, 3‘Ia taumafaia e ‘outou ‘ona tāofi o le loto gatasi i la le Agaga i le noataga o le filemū.#Kolo 3.14, 15 4E tasi le tino, e tasi fo‘i le Agaga, fa‘apei ‘ona vala‘auina ai ‘outou i le fa‘amoemoe e tasi ‘ua vala‘auina ai ‘outou.#Roma 12.5 5E tasi le Ali‘i, e tasi le fa‘atuatuaga, e tasi le papatisoga; 6e tasi le Atua, o le Tamā fo‘i lea o tagata uma lava, o lē ‘ua i luga o mea uma lava, o lē ‘ua i ai i mea uma lava, o lo‘o i totonu fo‘i o mea uma lava.

7A ‘ua foa‘iina mai ‘iā te i tatou ta‘ito‘atasi o le alofa tunoa, e fa‘atatauina ma le mea foa‘ifuaina mai e Keriso.#Roma 12.3, 6; 1 Kori 12.11 8O le mea lea ‘ua fai mai ai,#Sala 68.18; Kolo 2.15

“Na afio a‘e o ia i luga,

ma na ta‘ita‘i fa‘atagataotau‘a i le tāfeaga,

‘ua nā foa‘iina fo‘i mea alofa i tagata.”

9‘Ia, o le ‘upu lea, “Na ia afio a‘e,” se a lona uiga, pe ‘āfai e lē o lea, ‘ua mua‘i ‘ona afio ifo o ia i mea maulalo i le lalolagi? 10O lē na afio ifo o ia lava lea na afio a‘e i luga o lagi uma lava, ‘ina ‘ia fa‘atumuina e ia o mea uma lava. 11O ana mea alofa fo‘i, ‘ia fai nisi ma ‘aposetolo, o isi fo‘i e fai ma perofeta, o isi fo‘i e folafola le tala lelei, o isi fo‘i e fai ma leoleo ‘atoa ma a‘oa‘o.#1 Kori 12.28; Galu 21.8 12‘Ina ‘ia fa‘a‘ato‘atoaina ai le ‘au pa‘ia, latou te fai ai le galuega a ‘au‘auna, ‘ia atiina a‘e ai le tino o Keriso;#1 Pete 2.5; 2 Timo 3.17 13se‘ia tatou o‘o atu o i tatou uma lava ma le loto gatasi i le fa‘atuatua ma le iloa lelei o le Alo o le Atua, ‘ina ‘ia fai ma tagata matua, ‘ia o‘o i le fua o lē ‘ua matua, e tatau ma le tumu o Keriso. 14‘Ina ‘ia lē toe tama nini‘i i tatou o lo‘o felafoa‘iina e pei o peau, ma fe‘avea‘iina i matagi uma lava matā‘upu, i le pepelo o tagata, i togafiti leaga ‘ua saunia e fa‘asesē ai.#1 Kori 14.20; Epe 13.9 15Peita‘i, a o tautalatala fa‘amaoni i le alofa, ‘ia tutupu i tatou ‘iā te ia i mea uma, o le ulu lava ia, o ia fo‘i o Keriso.#Efe 1.22; 5.23; Kolo 1.18 16E mai ‘iā te ia ‘ona tupu o le tino uma lava, o lo‘o o fa‘atatauina ma fa‘aso‘oina i ‘ua uma lava e fesoasoani i ai, e tusa ma le galuega i le fua o itū tino ta‘itasi, ‘ia i‘u ‘ina atiina a‘e le tino e ia lava i le alofa.

O le Ola Fou ‘iā Keriso

17O lenei, ‘ou te fai atu ‘iā te ‘outou, ma ta‘utino atu lenei mea i luma o le Ali‘i, ‘aua tou te toe sāvavali fa‘apei o nu‘u fa‘apaupau uma, o ē sāvavali i le valea o o latou loto,#Roma 1.21; Kolo 2.4, 6 18O lo‘o fa‘apouliuligia o latou mafaufau, o liliu‘eseina i latou i le ola o i le Atua, ‘ona o le valea ‘ua ‘iā i latou, ‘ona o le ma‘a‘a o latou loto.#Efe 2.12; Kolo 1.21; 1 Pete 1.14 19‘Ua latou lē lagona se mea, ‘ua tu‘uina atu i latou e i latou i le mataitu, e fai mea leaga uma lava ma le tu‘inanau i ai.

20A o ‘outou, e lē fa‘apenā ‘ona a‘oa‘oina ‘outou e Keriso, 21pe ‘āfai e moni ‘ua ‘outou fa‘alogologo ‘iā te ia, pe a‘oa‘oina fo‘i ‘outou ‘iā te ia, e pei ‘ona i ai le ‘upu moni ‘iā Iesu; 22‘ina ‘ia ‘outou tō ‘ese le tagata tuai o lo‘o ‘ua leaga, e tusa ma le amioga fa‘a‘anamua, e tusa ma tu‘inanau e fa‘asesē ai.#Roma 8.13; Kolo 3.9; Kala 6.8 23‘Ae peita‘i, ‘ia toe fuata‘iina mana‘o o ‘outou loto, 24ma ia ‘o‘ofu ‘outou i le tagata fou ‘ua faia e foliga i le Atua i le amiotonu ma le amio lelei e fa‘amaoni.#Kene 1.26

25O lenei, ‘ia ‘outou tu‘u ‘ese le pepelo, ‘ia tautalatala fa‘amaoni ta‘itasi ma lē la te tuā‘oi; auā o itū tino lava tatou o le tasi i le tasi.#Saka 8.16; Kolo 3.8 26A ‘outou ita, ‘aua le agasala ai; ‘aua ne‘i goto le lā o ita pea ‘outou.#Sala 4.4; Iako 1.19-20 27‘Aua fo‘i ne‘i tu‘uina atu e ‘outou se mea e mautū ai le tiapolo. 28O lē gaoi, ‘aua ne‘i toe gaoi, ‘ae lelei ‘ina fa‘amalosi o ia i galuega a ona lima i mea aogā, ‘ia maua e ia se mea e avatu i ē ‘ua matitiva. 29‘Aua ne‘i alu atu se ‘upu leaga a‘i o ‘outou gutu, nā o le ‘upu lelei e ati a‘e ai i mea e aogā, e tupu ai le lelei i ē fa‘alogologo i ai.#Efe 5.4; Kolo 3.16-17; 4.6 30‘Aua fo‘i tou te fa‘atigā i le Agaga Pa‘ia o le Atua, ‘ua fa‘amaufa‘ailogaina ai ‘outou ‘iā te ia se‘ia o‘o i le aso e fa‘aolaina ai.#Efe 1.13; Isai 63.10 31‘Ia te‘a ma ‘outou ‘upu fa‘afiufiu uma lava, ma le lotoa, ma le ita, ma le leo tele, ma le ‘upu fa‘aleaga, ‘atoa ma le loto leaga uma lava. 32A ‘ia ‘outou feagaleleia‘i, ‘ia femutimutivalea‘i lo ‘outou alofa, ‘ia fefa‘amāgāloa‘i ‘outou, fa‘apei ‘ona fa‘amāgaloina ‘outou e le Atua ‘iā Keriso.#Mata 6.14; 18.22-35; Kolo 3.12-13

Currently Selected:

Efeso 4: RSCB

Highlight

Copy