2 Samuelu 1
1
‘Ua ‘Aumai ‘iā Tavita le Tala o le Oti o Saulo ma Ionatana
1‘Ua o‘o ‘ina ‘ua mavae le oti o Saulo ma ‘ua fo‘i atu Tavita nai le fasiga o Amaleka; sa nofo fo‘i Tavita i Sekeleka i aso e lua.#1 Samu 30.17-20; 31.6 2‘Ona o‘o ai lea i le aso tolu, fa‘auta, ‘ua sau le tagata nai le itūtau‘a a Saulo, ‘ua māsae ona ‘ofu ma le ‘ele‘ele i lona ulu, ‘ua o‘o atu o ia ‘iā Tavita, ‘ona fa‘apa‘ū ai lea o ia i le ‘ele‘ele, ‘ua ifo ‘iā te ia. 3‘Ona fai atu lea o Tavita ‘iā te ia, “Maifea ‘ea oe?”
‘Ua fai mai o ia ‘iā te ia, “‘Ua ‘ou sola mai le itūtau‘a a Isaraelu.”
4‘Ona fai atu lea o Tavita ‘iā te ia, “‘Ua a ‘ea? Ta‘u mai ia ‘iā te a‘u.”
‘Ua fai mai o ia, “‘Ua sōsōla le nu‘u nai le tau‘a, e to‘atele fo‘i o le nu‘u ‘ua pa‘u‘ū ‘ua oti; o Saulo fo‘i ma Ionatana lona atali‘i ‘ua oti i lā‘ua.”
5‘Ua fai atu Tavita i le taule‘ale‘a, na tala mai ‘iā te ia, “‘Ua e iloa fa‘apefea ‘ua oti Saulo ma Ionatana lona atali‘i?”
6‘Ona fai mai lea o le taule‘ale‘a na tala mai ‘iā te ia, “Na ‘ou so‘ona alu ane i le mauga o Kilepoa, fa‘auta, o lo‘o to‘ona‘i Saulo i lana tao;#1.6 o lo‘o to‘ona‘i Saulo i lana tao: po o o lo‘o fa‘alagolago Saulo i lana tao. fa‘auta fo‘i, o kariota ma ē ti‘eti‘e i solofanua o lo‘o pi‘itia le tuli ‘iā te ia.#1.6 ma ē ti‘eti‘e…pi‘itia le tuli ‘iā te ia: po o o lo‘o latou si‘osi‘omia o ia. #1 Samu 31.1-6; 1 No 10.1-6 7‘Ua fāliu o ia, ‘ua na iloa mai a‘u, ‘ona vala‘au mai lea o ia ‘iā te a‘u; ‘ona ‘ou fai atu lea, ‘O a‘u lenei.’ 8‘Ua fai mai o ia ‘iā te a‘u, ‘O ai ‘ea oe?’ ‘Ona ‘ou fai atu lea ‘iā te ia, ‘O a‘u o lo sa Amalekā.’ 9‘Ona fai mai lea o ia ‘iā te a‘u, ‘‘Ia e tu i o‘u luga, ma fa‘aoti ‘iā te a‘u, auā ‘ua o‘o mai le atuatuvale ‘ina ‘ua ‘ou ola pea lava.’ 10‘Ona ‘ou tu ai lea i ona luga, ma ‘ou fa‘aoti ‘iā te ia; auā na ‘ou iloa e lē toe ola o ia ‘ina ‘ua pa‘ū; ‘ona ‘ou tago ai lea i le paleali‘i sa i lona ao, ma le taulima sa i lona ‘a‘ao, ‘ua ‘ou ‘aumaia ‘i‘inei i lo‘u ali‘i.”#Fa‘ama 9.54; 1 Samu 31.4; 2 Tu 11.12
11‘Ona tago lea o Tavita i ona ‘ofu, ‘ua na saeia; ‘ua fa‘apea fo‘i tagata uma sa ‘iā te ia. 12‘Ua latou tagitu‘i, ma fētāgisi, ma anapopogi, ‘ua o‘o i le afiafi, ‘ona o Saulo, ma Ionatana lona atali‘i, ma le nu‘u o le ALI‘I, ma le ‘āiga o Isaraelu, ‘ina ‘ua latou oti i le pelu.
13‘Ua fai atu Tavita i le taule‘ale‘a na tala mai ‘iā te ia, “Se fea ‘ea oe?”
‘Ua fai mai o ia, “O a‘u o le atali‘i o le tagata ‘ese, o a‘u o lo sa Amalekā.”
14‘Ua fai atu Tavita ‘iā te ia, “Pe na fa‘apefea ‘ona e lē fefe e fa‘ao‘o lou lima e fa‘aoti ai i lē na fa‘au‘uina e le ALI‘I.”#1 Samu 12.3; 24.6; 26.9; 31.4 15‘Ona vala‘au atu lea o Tavita i le tasi taule‘ale‘a, ‘ua fai atu i ai, “‘Inā alu atu ia, ma e fasioti ‘iā te ia.” ‘Ona fasi ai lea e ia ‘iā te ia, ‘ua oti ai. 16‘Ua fai atu fo‘i Tavita ‘iā te ia, “‘Ia i ai i luga o lou ulu lou lava toto, auā na e molimau mai lou lava gutu ‘iā te oe, o lo‘o fa‘apea, ‘Na ‘ou fasioti i lē na fa‘au‘uina e le ALI‘I.’”
‘Ua tagi Tavita ‘ona o Saulo ma Ionatana
17‘Ua lagi e Tavita lenei fatu e aualofa ai ‘iā Saulo ma Ionatana lona atali‘i.#2 Samu 3.33; 2 No 35.25 18‘Ua fai atu fo‘i o ia, ‘ia a‘oa‘oina le fānauga a Iuta i le ‘aufana;#1.18 ‘ia a‘oa‘oina fānauga a Iuta…‘aufana: O nisi fa‘aliliuga; ‘ia a‘oa‘oina fānauga a Iuta…i le tau‘a. fa‘auta, ‘ua tusia i le tusi a Iasera:#Iosu 10.13
19O le mamalu o Isaraelu ‘ua fasia i au mea maualuluga;
Auē ‘ua maliliu toa.
20‘Aua ne‘i ta‘ua i Kata,#Eso 15.20; Fa‘ama 11.34; 14.3; 16.23-24; 1 Samu 6.17; 14.6; 31.4, 9
‘aua ne‘i tala‘i atu i malae o Asekelona;
ne‘i ‘oli‘oli ai afafine o Filisitia,
ne‘i mitamita ai afafine o ē lē peritomeina.
21Mauga o Kilepoa e, ‘aua ne‘i i ai se sau,
‘aua ne‘i i ai se timu ‘iā te ‘outou, po o fanua e tupu ai taulaga.
Auā na lafoa‘iina ai talitā a toa,
o le talitā a Saulo, peiseaī na lē fa‘au‘uina o ia i le u‘u.
22Na lē fa‘afoisia le ‘aufana a Ionatana,
ma le pelu a Saulo e le‘i fo‘i fua lea,
nai le toto o ē na fasia, ma le ga‘o o toa.
23O Saulo ma Ionatana sa pele ma agafa‘afiafia i lā‘ua ‘ina o soifua mai;
‘ua lē te‘a ‘ese‘ese fo‘i i lo la maliu;
sa sili lo la tele vavave i aeto,
sa sili fo‘i lo la malolosi i leona.#1 Samu 31.6; Iere 4.13; Sapa 1.8
24Afafine o Isaraelu e, ‘ia fētāgisi ‘outou ‘iā Saulo.
Sa na fa‘a‘ofu ‘iā te ‘outou i ‘ie mūmū, ‘atoa ma mea fa‘afiafia;
na ia teuteua o ‘outou ‘ofu i auro e fa‘amatagofie a‘i.
25Auē ‘ua maliliu toa i le tau‘a;
Ionatana e, ‘ua fasia oe i au mea maualuluga.
26‘Ua tigāina a‘u ‘ona o oe lo‘u uso Ionatana e;
sa a‘u matuā fiafia ‘iā te oe.
Sa ma‘eu lava lou alofa ‘iā te a‘u,
e sili i le alofa o fafine.#1 Samu 18.1, 3
27Auē ‘ua maliliu toa,
‘ua maumau ai ‘au‘upega o le tau‘a.
Currently Selected:
2 Samuelu 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.