2 Samuelu 2
2
‘Ua Fa‘au‘uina Tavita e fai ma Tupu o Iuta
1Mulimuli ane ‘ua fesili atu Tavita i le ALI‘I, ‘ua fa‘apea atu, “‘Ou te alu a‘e ‘ea i se tasi ‘a‘ai o Iuta?”#Iosu 14.13-15; 1 Samu 23.2
‘Ua fetalai mai le ALI‘I ‘iā te ia, “‘Inā alu a‘e ia.”
‘Ua fai atu Tavita, “O le fea ‘a‘ai ‘ou te alu a‘e i ai?”
‘Ona fetalai mai lea o ia, “o Heperona.” 2‘Ona alu a‘e lea o Tavita i ai, o ia ‘atoa ma ana avā e to‘alua, o Ainoama le Isereelu, ma Apikaila le avā a Napalu le Karamelu.#1 Samu 25.42-43 3O ona tagata fo‘i sa ‘iā te ia na ō a‘e i latou ma Tavita, e ta‘itasi ma lona ‘āiga; ‘ua latou nonofo i ‘a‘ai o Heperona. 4‘Ua ō mai tagata o Iuta, ma latou fa‘au‘u ‘iā Tavita i lea mea e fai ma tupu o le ‘āiga o Iuta. ‘Ua ta‘u atu fo‘i ‘iā Tavita,
‘Ua fa‘apea, “O tagata Iapese-Kiliata na latou tanu ‘iā Saulo.”#1 Samu 31.11-13 5‘Ona ‘a‘au atu lea e Tavita le sāvali i tagata o Iapese-Kiliata, ‘ua fa‘apea atu i ai, “‘Ia manuia ‘outou mai le ALI‘I, auā na fa‘apea ‘ona ‘outou agalelei i lo ‘outou ali‘i o Saulo; na ‘outou teuteu fo‘i ‘iā te ia. 6O lenei, ‘ia agalelei fa‘amaoni le ALI‘I ‘iā te ‘outou; o a‘u fo‘i, ‘ou te taui atu ‘iā te ‘outou lenei mea lelei, ‘ina ‘ua ‘outou faia lenei mea.#2 Timo 1.16 7O lenei, ‘ia ‘outou lima malosi, ‘ia fai fo‘i ma tagata totoa; auā ‘ua maliu lo ‘outou ali‘i o Saulo; a ‘ua fa‘au‘uina a‘u e le ‘āiga o Iuta e fai ma tupu ‘iā te i latou.”
O Isoposeta ‘ua fai ma Tupu o Isaraelu
8A o Apineru le atali‘i o Neru lē pule i ‘au sa ‘iā Saulo, ‘ua na ‘ave ‘iā Isoposeta le atali‘i o Saulo, ‘ua la ō atu ma ia i Maanaima.#Iosu 13.26; 1 Samu 14.50; 2 Samu 17.24, 27; 1 Tu 4.14; 1 No 8.33 9‘Ua ia faia o ia ma tupu o Kiliata, ma sa Asurī, ma Isereelu, ma Efaraima, ma Peniamina, ‘atoa ma Isaraelu uma lava. 10‘Ua fagafulu tausaga o Isoposeta le atali‘i o Saulo ‘ina o fai o ia ma tupu o Isaraelu, na pule fo‘i o ia i tausaga e lua; na o le ‘āiga o Iuta sa mulimuli atu i latou ‘iā Tavita. 11O le faitau o aso sa fai ma tupu Tavita i Heperona i le ‘āiga o Iuta, ‘ua fitu ona tausaga ma masina e ono.
O le Tau‘a i le vā o Isaraelu ma Iuta
12‘Ua ō atu Apineru le atali‘i o Neru, ma ‘au‘auna a Isoposeta le atali‘i o Saulo nai Maanaima i Kipeona. 13‘Ua ō atu fo‘i Ioapo le tama a Seruia, ma ‘au‘auna a Tavita, ‘ua latou fetaia‘i i le vailepa o Kipeona; ‘ua nonofo i lalo, o i latou nei i le tasi itū o le vailepa, a o i latou ia i le tasi itū o le vailepa.#1 No 2.16; Iere 41.12 14‘Ua fai mai Apineru ‘ia Ioapo, “Se‘i tula‘i taulele‘a, ‘ia ta‘a‘alo i o tatou luma.”
‘Ua fai atu Ioapo, “‘Inā latou tula‘i ia.”
15‘Ona tula‘i lea, ma ō atu e to‘asefulu ma le to‘alua ē na faitauina o sa Peniamina, o ‘au‘auna a Isoposeta le atali‘i o Saulo; ma le to‘asefulu ma le to‘alua o ‘au‘auna a Tavita. 16‘Ua fa‘atau u‘u o latou ulu, ‘ona fa‘atau tutu‘i ai lea o latou itū ‘iā latou pelu; ‘ua oti fa‘atasi ai latou. ‘Ua igoa ai lea mea, O le fanua o ē malolosi, o lo‘o i Kipeona.
17Sa matuā tele lava le tau‘a i lea aso; na tulia Apineru ma tagata o Isaraelu i luma o ‘au‘auna a Tavita. 18Sa i ai tama tane e to‘atolu a Seruia, o Ioapo, ma Apisai, ma Asaelu; sa mamā vae o Asaelu pei se sevi o le vao.#1 Samu 26.6; 2 Samu 23.24; 1 No 2.16; 12.8; 27.7; Pese 2.17; Sapa 3.19 19‘Ua tuliloa e Asaelu ‘iā Apineru, ‘ua lē ‘alo ai o ia i le itū taumatau po o le itū tauagavale i lona mulimuli atu ‘iā Apineru. 20‘Ua tepa Apineru i ona tua, ‘ona fai mai lea o ia, “O oe ‘ea o Asaelu”
‘Ua fai atu o ia, “O a‘u lenei.”
21‘Ona fai mai lea o Apineru ‘iā te ia, “‘Inā ‘alo ia i le itū taumatau po o le itū tauagavale, ma e pu‘e se tasi taule‘ale‘a, ma ‘ave ana ‘au‘upega māu.” A ‘ua lē mafai Asaelu ‘ona alu ‘ese ia le mulimuli ‘iā te ia. 22‘Ona toe fai mai lea o Apineru ‘iā Asaelu, “Sōia ‘e te mulimuli mai ‘iā te a‘u; ‘ou te fasioti i se a ‘iā te oe? ‘Ona fa‘apefea lea ‘ona mā toe feiloa‘i ma Ioapo lou uso?”#2 Samu 3.27 23A ‘ua lē mafai ‘iā te ia ‘ona ‘alo ‘ese; ‘ona tutu‘i lea e Apineru ‘iā te ia i le muli o le tao i lona manava, ‘ua ati le tao i lona tua; ‘ona pa‘ū ai lea o ia, ‘ua oti i lea lava mea; o i latou uma ‘ua o‘o i le mea na pa‘ū ai Asaelu ma oti ai, ‘ua tutū ai i latou.
24A ‘ua tulituliloa Ioapo ma Apisai ‘iā Apineru; ‘ua goto le lā ‘ina ‘ua latou o‘o atu i le mauga o Ama, o lo‘o i luma o Kia i le ala i le vao o Kipeona. 25‘Ua fa‘apotopoto atu fo‘i le fānauga a Peniamina ‘iā Apineru, ‘ua fai ma ‘au e tasi; ‘ona tutū lea o i latou i le tumutumu o le tasi mauga. 26‘Ona vala‘au lea o Apineru ‘iā Ioapo, ‘ua fa‘apea mai, “E saga ‘ai pea ‘ea le pelu? ‘E te lē iloa ‘ea e i‘u ‘ina ‘o‘ona? ‘E te fai atu ‘ea afea i le nu‘u, ‘ia fo‘i i latou ‘aua le mulimuli atu i o latou uso?”#2 Samu 11.25
27‘Ua fai atu Ioapo, “O lo‘o soifua le Atua ‘ana e lē fai mai, po ‘ua ta‘itasi ma alu a‘e le nu‘u i le taeao ai le mulimuli atu i o latou uso.” 28‘Ona ili lea o le pū e Ioapo, ‘ua tutū mai ai le nu‘u uma, ‘ua lē toe tulituliloa ‘iā Isaraelu, ma ‘ua lē toe tau.
29O Apineru ma ona tagata, ‘ua sāvavali i latou i le ‘ele‘ele laugatasi ‘ua ao lava lea po; ‘ua latou sopo‘ia atu Ioritana, ma ui ane i Pitirona uma, ‘ona o‘o atu lea o i latou i Maanaima.#Teu 1.1; 2 Samu 2.8
30A ‘ua fo‘i atu Ioapo nai le tuliloaga o Apineru, ‘ua ia fa‘apotopotoina le nu‘u uma; o ‘au‘auna a Tavita e le‘i i ai o tagata e to‘asefulu ma le to‘aiva, ‘atoa ma Asaelu. 31A o ‘au‘auna a Tavita na latou fasia sa Peniaminā ma tagata o Apineru e to‘atolu galau ma le to‘aonogafulu ‘ua oti. 32‘Ua latou ‘ava‘e ‘iā Asaelu, ma tanu ‘iā te ia i le tu‘ugamau o lona tamā o i Peteleema; ‘ua ‘atoa le po o sāvavali Ioapo ma ona tagata, ‘ua aoina i latou i Heperona.
Currently Selected:
2 Samuelu 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.