1 Samuelu 28
28
‘Ua si‘i le Tau‘a a Filisitia ‘iā Isaraelu
1O ia ona aso na fa‘apotopoto ai e Filisitia a latou ‘au e si‘i atu le tau‘a ‘iā Isaraelu; ‘ona fai mai lea o Akisa ‘iā Tavita, “‘Ia e matuā iloa, o le a tā ō atu ma a‘u i le tau‘a, o oe ‘atoa fo‘i ma ou tagata.”#1 Samu 29.1
2‘Ona fai atu lea o Tavita ‘iā Akisa, “O lea fo‘i ‘e te silafia ai le mea e faia e lau ‘au‘auna.”
‘Ona fai mai lea o Akisa ‘iā Tavita, “O lea fo‘i ‘ou te tofia ai oe e leoleo i lo‘u ulu i aso uma.”
‘Ua alu Saulo i le Taulāitu Fafine
3‘Ua oti Samuelu, sa taufaitagitu‘i Isaraelu uma ‘ona o ia, ma latou tanu ‘iā te ia i Rama lona nu‘u; ‘ua fa‘ate‘a fo‘i e Saulo taulāitu fafine, ma ē ‘ua i ai aitu vavalo nai le nu‘u.#Levi 20.27; Teu 18.10-11; 1 Samu 25.1
4‘Ua fa‘apotopoto Filisitia, ‘ua ō atu ma tolauapi i Sunema ‘ua fa‘apotopoto fo‘i e Saulo ‘iā Isaraelu uma, ma tolauapi i latou i Kilepoa.#Iosu 19.18; 1 Samu 31.1; 2 Tu 4.8 5‘Ua va‘ai atu Saulo i le itūtau‘a a Filisitia, ‘ona fefe ai lea o ia, ma gatete tele ai lona loto. 6‘Ua fesili atu fo‘i Saulo i le ALI‘I, a ‘ua lē tali mai le ALI‘I ‘iā te ia i se miti, po o le Urima, po o se perofeta.#Nume 27.21 7‘Ona fai mai lea o Saulo i ana ‘au‘auna, “‘Inā sā‘ili ia se fafine ‘ua i ai se aitu vavalo, ‘ou te alu atu ‘iā te ia, ma ‘ou fesili atu ‘iā te ia.”
‘Ua fai atu ana ‘au‘auna ‘iā te ia, “Fa‘auta, o le fafine na i ai le aitu vavalo o lo‘o i Enetoro.”
8‘Ona fa‘atagā tagata ‘ese lea o Saulo, ‘ua ‘ofu o ia i ‘ofu ‘ese, ‘ua alu atu o ia ma tagata e to‘alua ma ia; ‘ua o‘o po atu i le fafine, ‘ua fai atu ai, “O lou aitu vavalo ‘e te fa‘aali mai ai ‘iā te a‘u, ma fa‘atula‘i mai ai ‘iā te a‘u lē ‘ou te fai atu ai ‘iā te oe.”
9‘Ona tali mai lea o le fafine ‘iā te ia, “Fa‘auta, ‘ua e iloa le mea ‘ua faia e Saulo, ‘ua ia fasia taulāitu fafine, ma ē ‘ua i ai aitu vavalo i le nu‘u; o le a le mea ‘ua e fa‘amailei mai ai ‘iā te a‘u, ‘ou te oti ai?”#1 Samu 28.3; Sala 38.12
10‘Ona tautō lea o Saulo i le ALI‘I ‘iā te ia, ‘ua fa‘apea, “O lo‘o soifua le ALI‘I, e lē o‘o se leaga ‘iā te oe i lenei mea.”
11‘Ona fai mai lea o le fafine, “O ai ‘ea ‘ou te fa‘atū mai ‘iā te oe?”
‘Ua fai atu o ia, “O Samuelu, ‘e te fa‘atū mai ai ‘iā te a‘u.”
12‘Ua va‘ai le fafine ‘iā Samuelu ‘ona ‘alaga lea o ia ‘ua leo tele; ‘ua fai mai fo‘i le fafine ‘iā Saulo, “O le a le mea ‘ua e pelogia ai a‘u? o oe lava o Saulo.”
13‘Ona fai atu lea o le tupu ‘iā te ia, “‘Aua le fefe; o ai ‘ea ‘ua e iloa?”
‘Ua fai mai le fafine ‘iā Saulo, “‘Ua ‘ou iloa atu o lo‘o ō a‘e nai le ‘ele‘ele.”
14‘Ona fai atu lea o ia ‘iā te ia, “O le a lona tino mai?”
‘Ua fai mai o ia, “O le toeaina ‘ua alu a‘e, o lo‘o ‘ofu i le ‘ofu talaloa.”
‘Ona iloa ai lea e Saulo, o Samuelu lea; ‘ua punou ona mata i le ‘ele‘ele ma ifo atu ‘iā te ia.#1 Samu 15.27
15‘Ua fai mai Samuelu ‘iā Saulo, “O le a le mea ‘ua e fa‘asoesā mai ai ‘iā te a‘u, i le fa‘atula‘i a‘e ‘iā te a‘u?”
‘Ona tali atu ai lea o Saulo, “‘Ua ‘ou atuatuvale tele lava; o Filisitia, ‘ua latou si‘i mai le tau‘a ‘iā te a‘u. ‘Ua afio ‘ese fo‘i le Atua ‘iā te a‘u, ‘ua lē toe tali mai o ia ‘iā te a‘u i perofeta, po o se miti; o lea ‘ua ‘ou vala‘au atu ai ‘iā te oe, ‘ia e fa‘ailoa mai se mea ‘ou te faia.”
16‘Ona fai mai lea o Samuelu, “O le a fo‘i ‘e te fesili mai ai ‘iā te a‘u, pe ‘āfai ‘ua afio ‘ese le ALI‘I ‘iā te oe, ma ‘ua fai oe mōna fili?#Isai 63.10 17‘Ua faia lava e le ALI‘I le mea na ia fetalai mai ‘iā te a‘u; ‘ua sae‘eseina e le ALI‘I le mālō nai ‘iā te oe, ‘ua tu‘u atu ai i le tasi tagata, o Tavita lea.#1 Samu 15.28 18Auā ‘ua e lē fa‘alogo i le si‘ufofoga o le ALI‘I ma ‘ua e le fa‘ao‘o lona to‘asā tele ‘iā Amaleka, o le mea lea ‘ua fai ai e le ALI‘I lenei mea ‘iā te oe i nei ona aso.#1 Samu 15.3-9 19‘Ua tu‘uina atu fo‘i e le ALI‘I o Isaraelu fa‘atasi ma oe i lima o Filisitia; a taeao fo‘i, ‘ona tatou fa‘atasi lea ma a‘u, o oe ‘atoa ma ou atali‘i; e tu‘uina atu fo‘i e le ALI‘I ‘au a Isaraelu i lima o Filisitia.”
20‘Ona pa‘ū loa lea o Saulo, ‘ua ta‘atia fa‘aloaloa i le ‘ele‘ele, ‘ua matuā mata‘u lava i ‘upu a Samuelu, ‘ua leai fo‘i se malosi ‘iā te ia; auā ‘ua ia le ‘ai, ‘ua ‘atoa le ao ‘ua ‘atoa fo‘i le po. 21‘Ona sau lea o le fafine ‘iā Saulo, ‘ua va‘ai, o lo‘o atuatuvale lava o ia; ‘ona fai mai lea o ia ‘iā te ia, “Fa‘auta, ‘ua fa‘alogo lau ‘au‘auna fafine i lou si‘ufofoga, ma a‘u tu‘u lo‘u ola i lo‘u lima, ‘ua ‘ou fa‘alogo fo‘i i au afioga na tulei mai ‘iā te a‘u;#Fa‘ama 12.3 22o lenei, ‘ia e fa‘afofoga mai lava oe i le leo o lau ‘au‘auna fafine, ‘ou te laulauina atu i ou luma sina mea e taumafa ‘e te taumafa ai, ‘ina ‘ia e malosi ai e maliu atu i lau malaga.”
23A ‘ua ia lē mafai; ‘ua fai ane, “‘Ou te lē ‘ai;” a ‘ua tauānau ‘iā te ia ana ‘au‘auna ‘atoa ma le fafine, ‘ona fa‘alogo lea o ia ‘iā latou ‘upu; ‘ua tula‘i nai le ‘ele‘ele, ‘ua nofo i le moega. 24Sa i le fafine le tama‘i povi na fagaina i le fale, ‘ua ia fa‘ata‘alise ‘ona fasi; ‘ua avane; fo‘i falaoa ma palu, ‘ua tunu fo‘i le areto lē fa‘afefeteina.#Kene 18.6-8; Luka 15.23 25‘Ona ‘aumai ai lea i luma o Saulo ma ana ‘au‘auna; na latou ‘a‘ai, ‘ona tula‘i lea o i latou, ‘ua ō i lea lava po.
Currently Selected:
1 Samuelu 28: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
