1 Samuelu 15
15
‘Ua ‘Auina Saulo e Fasi ‘iā Amaleka
1‘Ua fai atu Samuelu ‘iā Saulo, “Na ‘auina mai a‘u e le ALI‘I e fa‘au‘u ‘iā te oe ‘ia fai ma tupu o lona nu‘u o Isaraelu; o lenei, ‘ia e fa‘afofoga i le afioga a le ALI‘I.#1 Samu 10.1 2O lo‘o fa‘apea ‘ona fetalai mai le ALI‘I o ‘au, ‘‘Ou te taui atu i le mea na faia e Amaleka ‘iā Isaraelu, ‘ina ‘ua tu mai o ia ‘iā te ia i le ala i lona alu a‘e nai Aikupito.#Eso 17.8-14; Teu 25.17-19 3O lenei, ‘inā alu ia ma e fasi ‘iā Amaleka ma ‘outou fa‘aumatia ‘atoa uma ana mea, ‘aua ‘e te fa‘asaoina o ia, a ‘ia fasioti i tane ‘atoa ma fafine, o tama matua ‘atoa ma tama meamea, o povi ‘atoa ma mamoe, o kamela ‘atoa ma asini.’”
4‘Ona alu lea o le fa‘ala‘ei‘au a Saulo i le nu‘u ma na faitauina i latou i Tilaima, e lua selau afe o ‘au e sāvavali, ma afe e sefulu o tagata Iuta. 5‘Ua o‘o atu Saulo i le tasi ‘a‘ai o Amaleka, ‘ona latou lalafi ai lea i le alia. 6‘Ua fai atu Saulo i sa Kenī, “Ō mai ia ‘outou, ‘inā ō ‘ese, ‘inā ō ifo nai ‘iā Amaleka, ne‘i ‘ou fasia oe fa‘atasi ma ia; auā na e alofa i le fānauga a Isaraelu uma ‘ina ‘ua latou ō a‘e nai Aikupito;” ‘ona alu ‘ese ai lea o sa Kenī nai ‘iā Amaleka.#Kene 19.15; Eso 18.10, 19; Nume 10.29, 32; Fa‘ama 1.16; 1 Samu 27.10
7‘Ua fasi e Saulo ‘iā Amaleka, e pau mai i Havila e o‘o i Sura, o lo‘o feagai ia ma Aikupito. 8‘Ua ia pu‘e ola ‘iā Akako le tupu a Amaleka, a o le nu‘u uma ‘ua ia fasioti ‘iā te i latou i le pelu.#1 Samu 27.8, 9; 30.1 9‘Ua fa‘asao e Saulo ma le nu‘u ‘iā Akako ma ē aupito lelei o mamoe ma povi, ‘atoa ma ē aupito i ai, ma tama‘i mamoe, ma mea lelei uma ‘ua latou lē mafafai ‘ona fa‘aumatia; a o manu uma ‘ua leaga ma mama‘i, ‘ua matuā fa‘aumatia ia.
‘Ua Te‘ena le Tupu o Saulo
10‘Ona o‘o mai ai lea o le afioga a le ALI‘I ‘iā Samuelu, ‘ua fa‘apea mai, 11“‘Ua ‘ou salamō ‘ina ‘ua ‘ou tofia Saulo e fai ma tupu, auā ‘ua ia liliu ‘ese ‘iā te a‘u, ‘ua na lē fa‘ai‘uina a‘u ‘upu.” ‘Ua tigā ai Samuelu, ‘ua aoina le po o vala‘au o ia i le ALI‘I.#Kene 6.6; Nume 23.19; 1 Samu 13.13; 15.3, 29, 35 12‘Ua ala usu Samuelu i le taeao e fa‘afetaia‘i ‘iā Saulo, ‘ona ta‘ua mai lea ‘iā Samuelu, ‘ua fa‘apea, “Na sau Saulo i Karamelu, fa‘auta fo‘i, ‘ua fa‘atū le fa‘ailoga mōna, i le ‘ua fa‘ata‘amilo ma alu lea, ‘ua alu ifo i Kilikala.” 13‘Ua o‘o atu Samuelu ‘iā Saulo, ‘ona fai mai lea o Saulo ‘iā te ia, “‘Ia fa‘amanuia oe e le ALI‘I; ‘ua ‘ou fa‘ai‘uina le afioga a le ALI‘I.”#1 Samu 13.10
14‘Ona fai atu lea o Samuelu, “O le a fo‘i lenei tagi o mamoe i o‘u taliga ma le tagi o povi ‘ou te fa‘alogo i ai?”
15‘Ona fai mai lea o Saulo, “‘Ua latou ‘aumaia nai Amaleka; ‘ua fa‘asaoina e le nu‘u o mamoe ma povi e aupito lelei, ‘ina ‘ia fai ai taulaga i le ALI‘I lou Atua; a o mea na totoe ‘ua latou fa‘aumatia lava.”#1 Samu 15.9
16‘Ua fai atu Samuelu ‘iā Saulo, “Sōia, se‘i ‘ou ta‘u atu ‘iā te oe le mea na fetalai mai ai le ALI‘I ‘iā te a‘u anapō.”
‘Ua fai mai o Saulo ‘iā te ia, “‘Inā fai mai ia.”
17‘Ua fai atu Samuelu, “Sa lē faia ‘ea oe ma ali‘i o itū‘āiga o Isaraelu ‘ina o fa‘atauva‘a oe i lou lava manatu; sa fa‘au‘uina fo‘i oe e le ALI‘I e fai ma tupu o Isaraelu.#1 Samu 9.21; 2 Samu 12.7 18Na ‘auina atu oe e le ALI‘I i le malaga, na ia fetalai atu, ‘Alu ia oe, ma e fa‘aumatia o ia tagata agasala, o Amaleka, ma e tau ma i latou se‘ia fa‘aumatia i latou.’ 19O le a le mea ‘ua e lē fa‘afofoga ai i le si‘ufofoga o le ALI‘I, a ‘ua e oso i mea a le itūtau‘a ma ‘ua e fai le mea leaga i luma o le ALI‘I.”#1 Samu 14.32
20‘Ona fai mai lea o Saulo ‘iā Samuelu, “Auā ‘ua ‘ou fa‘alogo lava i le si‘ufofoga o le ALI‘I; na ‘ou alu fo‘i i le malaga na ‘auina ai a‘u e le ALI‘I; ‘ua ‘ou ‘aumaia fo‘i Akako le tupu a Amaleka, ma a‘u fa‘aumatia Amaleka. 21A ‘ua ‘aumai e le nu‘u mea a le itūtau‘a, o mamoe ma povi, (o mea sili lava ia i mea na fa‘afanoina,) e fai a‘i taulaga i le ALI‘I lou Atua i Kilikala.”#1 Samu 15.15
22‘Ua fai atu Samuelu, “E tusa, ‘ea ‘ona fiafia o le ALI‘I i taulaga mū ma taulaga, i lona fiafia i le fa‘alogo i le si‘ufofoga o le ALI‘I? Fa‘auta o le fa‘alogo e sili lea i le taulaga ma le usiusita‘i e sili lea i le ga‘o o mamoe po‘a. 23Auā o le fouvale, e tusa ia ma le agasala o le fa‘ataulāitu; o le finau vale, e tusa ia ma le leaga o le tapua‘i i tupua. ‘Ua e lafoa‘i le afioga a le ALI‘I, o lea ‘ua lafoa‘i ai o ia ‘iā te oe ‘ia lē fai ma tupu.”#Kene 31.19; 1 Samu 2.30; 13.14; 19.13; 2 Tu 23.24
24‘Ona fai mai lea o Saulo ‘iā Samuelu, “‘Ua ‘ou agasala, auā ‘ua ‘ou tu‘umavaega i le afioga a le ALI‘I ‘atoa ma lau ‘upu; auā sa a‘u fefe i le nu‘u ma ‘ou fa‘alogo ‘iā latou ‘upu. 25A o lenei, ‘ou te ‘ai‘oi ‘iā te oe, ‘ia e fa‘amāgalo i la‘u agasala, ma ‘ia tā fo‘i ma a‘u, ‘ia ‘ou ifo ai i le ALI‘I.”
26‘Ona fai atu lea o Samuelu ‘iā Saulo, “Tā te lē fo‘i ma oe, auā ‘ua e lafoa‘i le afioga a le ALI‘I, ‘ua lafoa‘i fo‘i e le ALI‘I ‘iā te oe, ‘ina ‘ia lē fai oe ma tupu ‘iā Isaraelu.”#1 Samu 16.1
27‘Ua liliu Samuelu o le a alu, ‘Ona tago atu ai lea o ia i lona pito ‘ofu, ‘ona māsae lea.#1 Samu 28.17; 1 Tu 11.30-31 28‘Ona fai atu lea o Samuelu ‘iā te ia, “‘Ua saeia e le ALI‘I le mālō o Isaraelu nai ‘iā te oe i lenei aso ma ‘ua foa‘i atu ai i le tasi e sili lona lelei ‘iā te oe.#1 Samu 13.14; 28.17-18 29E lē pepelo lava le Mamalu o Isaraelu, e lē salamō fo‘i o ia; auā e lē se tagata o ia e salamō ai.”
30‘Ona fai mai lea o ia, “‘Ua ‘ou agasala, ‘ou te ‘ai‘oi atu ‘iā te oe, ‘ia e fa‘amamalu mai ‘iā te a‘u i luma o toeaina o lo‘u nu‘u ma luma o Isaraelu, ma ‘ia tā fo‘i ma a‘u, ‘ou te ifo i le ALI‘I lou Atua.”#1 Samu 15.25 31‘Ona fo‘i ai lea o Samuelu, ‘ua mulimuli atu ‘iā te ia o Saulo; ‘ona ifo lea o Saulo i le ALI‘I.
32‘Ua fai atu Samuelu, “‘Aumai ia Akako le tupu o Amaleka ‘iā te a‘u.” ‘Ona sau ai lea o Akako ‘iā te ia ma le fiafia; ‘ua fa‘apea mai Akako, “E moni lava ‘ua mavae le tigā o le oti.” 33A ‘ua fai atu Samuelu,
“E pei ‘ona āufānaua o fafine i lau pelu;
e fa‘apea fo‘i lou tinā i fafine,
e āufānaua o ia.”
‘Ona tamotuina lea o Akako e Samuelu i luma o le ALI‘I i Kilikala.#Fa‘ama 1.7; 1 Samu 15.21; Iako 2.13
34‘Ona alu lea o Samuelu i Rama, ‘ae alu a‘e Saulo i lona fale i Kipea. 35‘Ua lē toe asiasi Samuelu ‘iā Saulo, ‘ua o‘o i le aso o lona oti; a ‘ua fa‘anoanoa Samuelu ‘iā Saulo; ‘ua salamō fo‘i le ALI‘I ‘ina ‘ua ia tofia Saulo e fai ma tupu o Isaraelu.#1 Samu 15.11; 16.1; 19.24; 25.1
Currently Selected:
1 Samuelu 15: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
