1 Makapaio 16
16
O Tau‘a o Atali‘i o Simona
1‘Ona a‘e mai lea o Ioane nai Kasara ma ‘ua tala mai ‘iā Simona, lona tamā, o mea na faia e Kenepaio i lo latou nu‘u. 2‘Ona ‘a‘ami lea e Simona ona atali‘i matutua e to‘alua, o Iuta ma Ioane ma ‘ua fai atu ‘iā te i lā‘ua, “O a‘u ma o‘u uso ma le ‘āiga o lo‘u tamā, ‘ua matou tau le tau‘a ma fili o Isaraelu e āfua mai i lo matou taule‘ale‘a e o‘o mai i le aso nei ma ‘ua fa‘amanuiaina o matou lima e lavea‘i ‘iā Isaraelu i lea aso ma lea aso. 3A o lenei ‘ua ‘ou toeaina, a ‘ia ‘oulua sui ‘iā te i matou ma o‘u uso; ‘ia ‘oulua ō ma tau le tau‘a mo lo tatou nu‘u; ‘ia ‘iā te ‘oulua fo‘i le fesoasoani mai le lagi.”
4Ma ‘ua na filifilia i le nu‘u o tagata tau e luafulu afe ma le ‘au e ti‘eti‘e i solofanua ma ‘ua latou o ē fa‘afetaia‘i ‘iā Kenepaio ma ‘ua latou momoe i Motei. 5Ma ‘ua latou ala i le taeao ma ‘ua latou ō atu i le fanua laugatasi, fa‘auta fo‘i, ‘ua sau le itūtau‘a e to‘atele lava o fitafita sāvavali ma ē ti‘eti‘e i solofanua e fa‘afetaia‘i ‘iā te i latou, a o le vaitafe tafe malosi ‘ua i lo latou vā. 6Ma ‘ua tolauapi i o latou luma, o ia ma lona nu‘u; ma ‘ua iloa atu ‘ua taufefefe le nu‘u e sopo atu le vaitafe, ‘ona mua‘i sopo atu lea o ia; ma ‘ua va‘ava‘ai le ‘au ‘iā te ia ma ‘ua latou sopo atu e mulimuli ‘iā te ia. 7Ma ‘ua na vaeluaina le nu‘u, ‘ae tu‘u le ‘au e ti‘eti‘e i solofanua i totonu o ‘au e sāvavali; a ‘ua to‘atele anoanoa‘i le ‘au a le fili e ti‘eti‘e i solofanua. 8Ma ‘ua latou ilia o pū pa‘ia ma ‘ua tulia o Kenepaio ma lana itūtau‘a; ma ‘ua pa‘u‘ū nisi e to‘atele o i latou i le pelu, a o ē totoe ‘ua latou sōsōla i le ‘olo. 9‘Ona manu‘a ai lea o Iuta, le uso o Ioane; a o Ioane ‘ua na tuliloa ‘iā te i latou se‘ia o‘o atu i Kitoru na atiina a‘e e Kenepaio. 10Ma ‘ua latou sōsōla e o‘o atu i ‘olo sa i fanua o Asetota ma ‘ua na susunuina i le afi ma ‘ua fasia ai le lua afe o tagata tau ma ‘ua toe fo‘i mai Ioane i Iutaia ma le filemū.
O le Fasia o Simona ma ona Atali‘i e To‘alua
11A o Tulomaio, le atali‘i o Apupu, ‘ua tofia ma ta‘ita‘i i le lau‘ele‘ele o Ieriko; sa tele fo‘i ‘iā te ia le ario ma le auro, 12auā o ia le tane a le afafine o le ositaulaga sili. 13Ma ‘ua fa‘amaualugaina lona loto; sa mana‘o fo‘i ‘ina ‘ia pule o ia le lau‘ele‘ele ma ‘ua mafaufau e fa‘a‘ole‘ole ‘iā Simona mōna atali‘i i le fia ‘ave‘ese i latou. 14A o Simona, o fealualua‘i i ‘a‘ai ‘ua i le lau‘ele‘ele o Iuta ma le popole ‘ona o i latou, na alu ifo i Ieriko, o ia ma Matatia lona atali‘i ma Iuta, i le tausaga e tasi le selau ma le fitugafulu ma le fitu,#16.14 tausaga e tasi le selau ma le fitugafulu ma le fitu po o tausaga e 134 T.L.M. i lona sefulu ma le tasi o masina, o le masina lea o Sapati. 15Ma ‘ua talia i latou e le atali‘i o Apupu ma le fa‘a‘ole‘ole, i le ‘olo la‘itiiti ‘ua ta‘ua o Toka na atiina a‘e lava e ia ma ‘ua fai e ia se faigā‘ai tele mo i latou, ma ‘ua na natia ai ni fitafita. 16Ma ‘ua o‘o ‘ina ‘onanā o Simona ma ona atali‘i, ‘ona tula‘i lea o Tulomaio mōna tagata ma ‘ua latou u‘u o latou ‘au‘upega ma ‘ua latou ulufale i le afeafe o le taumafataga ma ‘ua latou fasiotia o ia mōna atali‘i e to‘alua ma nisi o ana ‘au‘auna. 17Ma ‘ua matuā fa‘a‘ole‘ole ai o ia ‘iā Isaraelu, ma ‘ua taui le lelei i le leaga.
‘Ua sui tulaga Ioane ‘iā Simona
18Ma ‘ua tusia o mea ia e Tulomaio ma ‘ua ‘auina atu le tusi i le tupu, ‘ina ‘ia ‘auina mai ‘iā te ia le itūtau‘a e fesoasoani i ai, ‘ona ia tu‘u atu lea ‘iā te ia le lau‘ele‘ele mōna ‘a‘ai ma la latou lafoga. 19Ma ‘ua ‘auina mai nisi i Kasara e pupu‘e ‘iā Ioane ma ‘ua ‘auina mai ni tusi i ta‘ita‘i ‘au ‘ia latou ō atu ‘iā te ia, ‘ona ia tu‘u atu lea ‘iā te i latou le auro ma le ario ma ni mea alofa. 20Ma na ‘auina mai ni isi latou te maua Ierusalema ma le mauga o le malumalu. 21A ‘ua momo‘e se tasi i luma ma ‘ua tala mai ‘iā Ioane i Kasara ‘ua fasiotia lona tamā mōna uso ma “‘Ua ‘auina mai fo‘i ni isi e fasioti ‘iā te oe.” 22‘Ua fa‘alogo i ai o ia, ‘ona matuā atuatuvale ai lea ma ‘ua na pu‘ea i latou na ō mai e fasioti ‘iā te ia, ma ‘ua na fasiotia i latou; auā sa na iloa ‘ua latou fia fasioti ‘iā te ia.
23A o toe o mea na faia e Ioane, mōna tau‘a ma galuega ta‘ua na ia faia ma le malosi ma le faiga o pavali na ia atiina a‘e ma mea ‘ua ia faia, 24o lenei ‘ua tusia mea ia i le tusi o tala o lana nofo ositaulaga, e āfua i le aso na ‘avea ai o ia ma ositaulaga sili, e soloa‘i ane ai i lona tamā.
Currently Selected:
1 Makapaio 16: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.