1 Korinito 9

‘Ia Alofaina lē ‘ua fai le Galuega a le Atua

1‘Ou te lē se sa‘oloto ‘ea? ‘Ou te lē ‘aposetolo ‘ea? ‘Ou te le‘i va‘aia ‘ea Iesu Keriso lo tatou Ali‘i? E lē o la‘u galuega ‘ea ‘outou i le Ali‘i? #1 Kori 15.8; Galu 26.16; 22.17 2Tu‘u ia nisi tagata, ‘ou te se ‘aposetolo lava ‘iā te ‘outou; auā o le fa‘amaufa‘ailoga ‘outou o la‘u galuega fa‘a‘aposetolo i le Ali‘i.

3O la‘u lenā tali i ē fa‘amasino mai ‘iā te a‘u. 4E lē o la matou faitalia ‘ea ‘ona ‘a‘ai ma inu? #Luka 10.8 5E lē o la matou faitalia ‘ea, pe matou te feoa‘i ma le avā Kerisiano pei o ‘aposetolo uma, ma uso o le Ali‘i, ma Kefa? 6Pe na o i mā‘ua ma Panapa, e lē sa ma faitalia ‘ea ‘ona tu‘u o galuega fa‘aletino? 7O ai ‘ea sē alu i le tau‘a ‘ae lē tauia o ia? O ai ‘ea sē na te faia se tōvine, ‘ae lē ‘ai i ona fua? Po o ai ‘ea se na te leoleoina se lafu ‘ae lē ‘ai i le suāsusu o le lafu?

8‘Ou te fai atu ‘ea nei mea i ‘upu a tagata? E lē o fai mai fo‘i ‘ea e le tulafono nei mea? 9Auā ‘ua tusia i le tulafono a Mose, “‘Aua ‘e te fusi le gutu o le povi a o solisolia e ia saito.” O povi ‘ea e manatu i ai le Atua? #Teu 25.4; 1 Timo 5.18 10Po ‘ua na lē fetalai mai ‘ea ‘ona o i tatou lava? ‘Ona o i tatou fo‘i ‘ua tusia mai ai, auā e tatau i lē na te suatia le ‘ele‘ele ‘ia suatia ma le fa‘amoemoe, o lē solisolia fo‘i saito, ‘ia solisolia ma le fa‘amoemoe, ‘ina ‘ia maua le mea ‘ua fa‘amoemoe i ai. 11‘Āfai ‘ua matou lūlū atu mā ‘outou mea fa‘aleagaga, o le mea tele ‘ea pe a matou selesele mai a ‘outou mea fa‘aletino? #Roma 15.27 12A pule isi ‘iā te ‘outou, e lē sili ‘ea ‘ona pule o i matou?

‘Ae lē faia e i matou lenā pule; a ‘ua matou ‘o‘ono i mea uma, ‘ina ne‘i matou tu‘uina atu se mea e fa‘alavelave ai le tala lelei ‘iā Keriso. #Galu 20.34-35; 1 Kori 13.7; 2 Kori 11.9 13Tou te lē iloa ‘ea, o ē galulue i mea pa‘ia latou te ‘a‘ai i mea mai le malumalu? O ē ‘au‘auna i le fatafaitaulaga ‘ua latou tofu i tufa‘aga fa‘atasi ma le fata. #Nume 18.8, 31; Teu 18.1-3 14‘Ua fa‘apea fo‘i le poloa‘iga a le Ali‘i i ē folafola le tala lelei e maua mea a le tino i le tala‘iga o le tala lelei. #Luka 10.7; Kala 6.6

15A ‘ou te lē faia se mea e tasi o na mea, ‘ou te lē tusi atu fo‘i nei mea ‘ina ‘ia fa‘apea ‘ona fai ‘iā te a‘u; auā e lelei ‘ina ‘ou oti, ‘ae leaga ‘ina fa‘alēaogāina e se tasi lo‘u mitamita. #Galu 18.3 16Auā ‘āfai ‘ou te folafola le tala lelei, e lē se mea lea ‘ou te mitamita ai, auā ‘ua leai sa‘u faitalia i lea mea. ‘Oi talofa fo‘i ‘iā te a‘u, pe a ‘ou lē folafolaina le tala lelei. #Iere 20.9 17Auā ‘āfai ‘ou te faia lenei mea ma le loto, ‘ua ‘iā te a‘u le taui; peita‘i ane, a ‘ou lē faia ma le loto, ‘ua tu‘uina mai ‘iā te a‘u e fai ma ‘au‘auna tausi mea. #1 Kori 4.1 18O lenei, se a ‘ea lo‘u taui? O lenei, pe a ‘ou folafolaina atu le tala lelei, ‘ia ‘ou avatu le tala lelei ma le lē tauia mai; ‘ina ‘ua malie lo‘u loto ‘ou te lē fa‘aaogā le pule ‘ua tatau ‘iā te a‘u i lo‘u tala‘i atu. #1 Kori 8.9

19Auā e ui ‘ina ‘ou sa‘oloto mai tagata uma, ‘ua fa‘apologaina a‘u e a‘u mo tagata uma, ‘ina ‘ia atili ai ‘ona to‘atele ‘ou te maua. #Mata 20.26-27 20Sa ‘ou fa‘apei o se Iutaia ‘iā Iutaia, ‘ina ‘ia maua ni Iutaia; ‘ua ‘ou fa‘apei o sē nofo i le tulafono i ē nonofo i le tulafono ‘ina ‘ia ‘ou maua ni ē nonofo i le tulafono; #Galu 16.3; 21.20-26 21‘ua ‘ou fa‘apei o sē lē nofo i le tulafono i ē ‘ua lē nofo i le tulafono, e lē ‘ona ‘ua ‘ou lē nofo i le tulafono i le Atua, a ‘ua ‘ou nofo i le tulafono ‘iā Keriso, ‘ina ‘ia ‘ou maua ni ē ‘ua lē nofo i le tulafono. #Kala 2.3 22‘Ua ‘ou fa‘apei o sē vaivai i ē ‘ua vaivai, ‘ina ‘ia ‘ou maua ē ‘ua vaivai; ‘ua ‘avea a‘u ma mea uma mo tagata uma, ‘ina ‘ia i‘u lava ‘ina ola nisi ‘iā te a‘u. #2 Kori 11.29; Roma 11.14

23‘Ou te faia fo‘i le mea nei ‘ona o le tala lelei, ‘ina ‘ia ‘ou ‘auai i ona fa‘amanuiaga. 24Tou te lē iloa ‘ea, o ē tausiniō i le ala tanu, e tausiniō uma i latou, ‘ae maua le taui e le to‘atasi? ‘Ia fa‘apea ‘ona ‘outou tausiniō, ‘ina ‘ia ‘outou maua. #2 Timo 4.7; Fili 3.14 25O i latou uma o ē faigofie e fai fa‘atatau i mea uma lava; o i latou fo‘i ‘ua latou fa‘apea ‘ina ‘ia maua le pale palagofie, a o i tatou, ‘ina ‘ia maua le pale e lē pala lava. #2 Timo 2.4-5; 4.8; 1 Pete 5.4; Iako 1.12 26O a‘u nei fo‘i, ‘ua fa‘apea ‘ona ‘ou momo‘e e lē ma le fa‘alētonu; ‘ua fa‘apea ‘ona ‘ou tu‘i, e lē pei o sē tu‘i le matagi. 27A ‘ou te fa‘ato‘ilaloina lo‘u nei tino ma a‘u fai ai ma pologa, ‘ina ne‘i i‘u ‘ina lē fa‘amaoni a‘u, o a‘u sa tala‘i atu i isi tagata. #Roma 8.13; 13.14

Currently Selected:

1 Korinito 9: RSCB

Highlight

Copy