1 Korinito 5

‘Ia Tu‘u i tua le Tagata Amio Leaga

1‘Ua salalau le tala o ‘iā te ‘outou le faita‘aga, o le faita‘aga fa‘apea fo‘i e lē o ta‘ua i nu‘u ‘ese, ‘ina ‘ua fai avā le tasi i le avā a lona tamā.#Levi 18.7-8 2O ‘outou fo‘i, ‘ua ‘outou loto fefete ‘ea? ‘Ae tou te lē fa‘anoanoa ‘ea, ‘ina ‘ia tu‘u‘eseina ‘iā te ‘outou lē ‘ua faia lenā mea? 3O a‘u fo‘i, o lo‘o lē i ai lo‘u tino ‘iā te ‘outou, a ‘ua ‘iā te ‘outou lo‘u loto, ‘ua uma ‘ona ‘ou fa‘amasino i lē ‘ua faia fa‘apea lenā mea, peiseaī ‘ua ‘ou i ai lava,#Kolo 2.5 4pe a fa‘apotopotoina ‘outou fa‘atasi ma lo‘u agaga, ma le mana o le tatou Ali‘i o Iesu Keriso, o le suafa o lo tatou Ali‘i o Iesu Keriso,#Mata 16.19; 18.18; 2 Kori 13.10 5tou te tu‘uina atu ai lē ‘ua fa‘apea ‘iā Satani e fano ai le tino, ‘ina ‘ia sao le agaga i le aso o le Ali‘i o Iesu.

6E lē tusa lo ‘outou mitamita. Tou te lē iloa ‘ea o se mea fa‘afefete itiiti, e fa‘afefeteina ai le paluga falaoa uma lava?#Kala 5.9 7O le mea lea ‘ia ‘outou fa‘ate‘a ‘ese ai le mea fa‘afefete tuai, ‘ina ‘ia ‘avea ‘outou ma paluga fou ‘ona ‘ua leai o se mea fa‘afefete ‘iā te ‘outou; auā fo‘i o Keriso la tatou paseka ‘ua fasia mo i tatou.#Eso 12.21; 13.7; Isai 53.7; 1 Pete 1.19 8o lenei, ‘aua tatou te faia le tausamiga ma le mea fa‘afefete tuai, o le loto leaga ma le amio leaga; a ‘ia faia ma le mea e lē fa‘afefeteina, o le loto lelei ma le fa‘amaoni.#Eso 12.3-20

9‘Ua ‘ou tusi atu ‘iā te ‘outou i la‘u tusi, ‘aua tou te feoa‘i ma ē faita‘aga.#Mata 18.17; 2 Tesa 3.14 10E lē fa‘asino lea i ē faita‘aga i lenei lalolagi, ‘atoa ma ē matape‘ape‘a, ma ē fao mea ma ē ifo i tupua; ‘ana fa‘apea, e ao ‘ina ‘outou ō ‘ese atu i le lalolagi. 11A o lenei, ‘ua ‘ou tusi atu ‘iā te ‘outou, ‘ai se tasi ‘ua ta‘uusoina ‘ae faita‘aga, pe matape‘ape‘a, pe ifo i tupua, pe agatele, pe ‘onā, pe fao mea; ‘aua lava ne‘i tou feoa‘i, ‘aua fo‘i tou te ‘a‘ai fa‘atasi ma lē o fa‘apea.#2 Tesa 3.6; Tito 3.10; 2 Ioane 10

12Auā o ‘iā te a‘u ‘ea ‘ona fa‘amasino i ē ‘ua i tua? O ‘outou e fa‘amasino i ē ‘ua i totonu; 13a o ē i tua, e fa‘amasinoina i latou e le Atua. “O lenei, ‘ia fa‘ate‘a‘eseina e ‘outou lenā tagata amio leaga ‘iā te ‘outou.”#Teu 13.5; 17.7; 22.24

Currently Selected:

1 Korinito 5: RSCB

Highlight

Copy