Wek. 14
14
Israer shuar Yusan umirkacharma
1Nuiṉkia ashí iruntrar charaatum ajasua kintiamkar káshikia útiarmiayi. 2Nuyá̱ Israer shuar Muisaisan Araunja̱i̱ yajauch chicharainiak “Ejiptunmaṉ jákaruitkiurkia nuí̱chuka atsú nuṉkana ju̱i̱ṉᵏ kaji̱ṉkiáruitkiurkia maak áraintji. 3¿Urukamtaik Uunt Yussha ju̱ nuṉkanmasha ii mesetnum jakakrin ii nuwe̱sha uchirí̱sha nemasri̱ wáitkiatai árat tusasha itiarmayajⁱ? Antsu Ejiptunmaṉ waketmainchuashit.” 4Nuyá̱ nuamtak chichasar “Ii uuntri̱ anaikiar ataksha Ejiptu nuṉkanmaṉ waketkiartai” tiármiayi. 5Tura Muisais Araunja̱i̱ ashí Israer shuar iruntramunam tikishmarar tsuntsumawarmiayi. 6Nuyá̱ Nuuna uchirí̱ Jusuí, Jipuni uchirí̱ Karepja̱i̱ nuṉká mamikmáuwarmia nui̱ páchitkia ásar pushiri̱n já̱a̱kar 7ashí Israer shuar iruntrarun chicharainiak “¡Nuṉka wekatukar iyutai tusar werimiaj nusha tí peṉkerauyi! 8Warí Uunt Yus nekas iin waitnentramakka tí peṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha ejetam núṉkentin awajtámsattaji. 9Tura Uunt Yus kajerkairap núnisaṉ nu nuṉkanmaya̱ aentssha ashamkairap. Paṉ yua awajkattaji nin ayamprúktinkia peṉké atsawai. Antsu iin yaintmaktinkia Uunt Yusaiti. Sapijmiakairap” tiármiayi. 10Tuíniakui nui̱ untsurí pujuarmia nu kayaja̱i̱ tukurtai tusa pujurainiai̱, Yus Shiir Awajtai̱ Je̱e̱n ashí Israer shuaran Uunt Yusa tsáapnintri̱ wantintiukarmiayi.
Muisais ni shuari̱ seatma
11Uunt Yus Muisaisan chicharuk “¿Ju̱ aentssha urutáik nakitrichush árat ni iimiainiamunam ashammainian túrin ai̱sha ti urutáik nekas enentáimtursarat? 12Tuma ásarmatai suṉkuran najamniun aju̱ntrán amukártatjai túrasha aminiaṉka ti untsurí aents awajsan níji̱a̱i̱ṉkia naṉkaamas kakaram awajsattajme” tímiayi.
13Túrasha Muisais Uunt Yusan aya̱k chicharuk “Nuna Ejiptunmaya̱ aents antukartatui. Warí jú̱ aentska Ejiptunam matsatáiniachuk Ame kakarmarmiji̱a̱i̱ jí̱i̱rarmam 14túrawar jú̱ nuṉkanmaya̱ aentsnum etserartatui. Kame nisha maa Uunt Yusá Ame pépruram pujurmanka nékainiawai. Maa Uunt Yusá Ámiji̱a̱i̱ iṉkiunaiwiar yapimniasha wainiainiana nunasha antukaruiti tura Ame yuraṉmiram niini̱ yakiini̱ nanatuncha nékainiawai. Núnisaraṉ tsawai̱kia yuraṉminiam tura káshikia jinium níya̱nka eem Ame wéamuncha antukaruiti. 15Túrasha chikichik aents matniua nútiksaram jú̱ aents amukákminkia ashí nuṉkanmaya̱ aents Ame túramun antukarua nú aents chichainiak 16‘Warí, nekas tajai tusa jú̱ nuṉkan atumín nekas amastatjarme tiarmia nui̱ awayá̱wartinian Uunt Yuska tujintiak atsamunmaṉ amuka̱a̱rai’ turamartatui” tímiayi. 17“Tuma asamtai yamaikia Ame chichakuitmena nuja̱i̱ métek Ame kakarmaram tí uunt paant awajsamu atí. Warí Ámeka chichakum 18‘Uunt Yuska wárikkia kajechuiti tura waitnenkartutairi̱sha tí uuntaiti. Yajauch túramuncha núnisaṉ umiktinian nakitín ainia nunasha Niṉkia tsaṉkurniuiti. Túrasha umitmákunka peṉké páchitskeka iniaichaiti. Tuma asa ni aparí̱ tunaari̱ni̱n uchirí̱n tiraṉki̱n nuyá̱ tiraṉkí̱ya̱ tímianaisha asutniuiti’ tímiame. 19Tuma asam Ejiptunmaya̱ juárkimik tsaṉkurkiaram tímiaja̱i̱ ikiankarumna nútiksamek Ame waitnenkartutairam tí uunta nuja̱i̱ métek jú̱ aents umiktinia nakitiáiniamuri̱sha tsaṉkurarta” tímiayi.
20Tutai Uunt Yus chicharuk “Ame chichammiji̱a̱i̱ métek tsaṉkurainiajai” tímiayi. 21“Tuma ai̱ṉsha Wikia iwiaakjai tura Winia kakarmarsha ashí nuṉkanam piákuiti. 22Túrasha Ejiptunam tura atsunum Winia kakarmarun tura Wi túramun wáinkiariat nekáa nekaprakua tias ejewarsha Winia chichamprunka antukcharma nuka chikichkisha 23nekas tajai tusan atumí aparí̱n chicharkum jú̱ nuṉkan amastatjarme tiármiaj núnaka chikichkisha wáinkiashtatui. 24Antsu winia takartin Karepka núniska enentáimtsuk péṉker enentáimias takamtsuk umirtuku asamtai wekaatus iyuma nú nuṉkanam awayá̱ttajai túram ni shuari̱ nui̱ nuṉkenawartatui. 25Tura yamaikia Amur aents ántsaṉ Kanaan aentssha pakanam matsatáinia ásarmatai átumka wáketkuram kashinkia Kapantin Nayantsanmaani̱ atsamunmaani̱ wetarum” tímiayi.
Israer shuar mamikmáuja̱i̱ asutniáwarma
26Nuya̱sha Uunt Yuska Muisaisan Araunja̱i̱ áujenak chicharainiak 27“¿Kame jú̱ netse aents iruntraru kajertuinia ju̱nasha urutmák katsuntrartaj? ¡Warí Israer shuar Winia kajertuiniak turutiainiana nunasha Wikia ántajai! 28Tura chicharainiakum ‘Wikia Iwiaaku Uunt Yusaitjiai tawai Uunt Yus. Tuma asan Wi ántamunam átum tárumna nuja̱i̱ métek Wisha atumniaka túrashtajrumeash. 29Ashí aents painti uwí íniaṉkasaṉ takakainia nekapmarma ainia nuka Winia yajauch chichartukaru ásar kampuntin atsamunam ju̱i̱ṉ jákartatui. 30Nekasan tajai Winia uwejrun takuin nekas túrattajai tusan jú̱ nuṉkan atumín amasmatai ju̱i̱ matsastatjarme timiaj nuiṉkia átumka waya̱shtatrume. Antsu áyatik Jipuni uchirí̱ Karepak tura Nuuna uchirí̱ Jusuiji̱a̱i̱ niṉki waya̱wartatui. 31Antsu atumí uchirí̱ átum chicharkuram yúpichuch amunkartatui tímiarumna nuna nú nuṉkanmaṉka awayá̱wartatjai. Túram átum nakitrámu nuṉkanka ní nekaawartatui. 32Antsu átumka ju̱i̱ṉ atsamunmaṉ kajiṉtatrume. 33Tura atumí uchirí̱ṉkia atsamunmaṉ kuaraintia uwí ju̱i̱ṉ wekaikiní̱ ajartatui. Átum umikchamunam atumí uchirí̱ asutniáwartatui tura átum kajiṉkrum amuumam ju̱i̱ṉ atsunumaṉ matsamsartatui. 34Tura kuaraintia tsawant nuṉka mamikmakrum wekatúsmarmena nuja̱i̱ métek átum umiktin nakitrámunam chikichik tsawantin chikichik uwí asa kuaraintia uwí asutniáttarme. Kame nuja̱i̱ Wi kajekma nekaattarme. 35Wi Uunt Yusan chichakjai. Tuma asan netse aents iruntraru kajertuinia núnaka tájana nuna ashí túrawartatjai. Ju̱i̱ atsunum kajinkiar ashí amukártatui’ titiarum” tímiayi.
36Tura nuṉka mamikmá ikiutarum tiar Muisais akupkarma waketrar káunkar nú nuṉkanmaṉka waya̱chminiaitji tusar aentsun yajauch chichamtikiarmiania nú 37aentska nuṉkan yajauch chicharkaru ásar suṉkur akupkámuja̱i̱ Uunt Yus íimmianum jákarmiayi. 38Túrasha nuṉka nekatai̱ tusa wéarmia nuya̱ṉka áyatik Nuuna uchirí̱ Jusuí tura Jipuni uchirí̱ Karepja̱i̱ jímiarchik iwiaakuka juákarmiayi.
Úrmanam Israer shuar nupetnakarma
39Nuyá̱ Muisais Uunt Yus timia nu ujainiam ashí Israer shuar tí kuntuts enentáimprararmiayi. 40Nuya̱ṉka kashinkia tí káshik nantarár naintia tsakarí̱n wákatai tusar chichainiak “¡Pai yamaikia ju̱i̱ tácharjik! Uunt Yus nuṉkan nekaprutmamajnia nui̱ wéartai. Maa, nekas yajauch túraji” tiármiayi. 41Túrasha Muisais chicharainak “¿Kame urukamtai Uunt Yus akupeamusha umiktinkia nakitiarum? Tuma asarum átum túratin enentáimprumna nusha péṉker arutrámchattarme. 42Ju̱ya̱ṉka weerap. Warí Uunt Yuska atumji̱a̱i̱ṉkia pujatsui. Atumí nemasri̱ nupettamkattarme. 43Warí Amur aentska tura Kanaan aentssha aya ajatrámas nákarmarme tura puya̱ja̱i̱ kajeṉma átatrume. Warí átumka Uunt Yuska péṉker enentáimtusrum nemarsatin nakitra asakrumin Uunt Yussha atumji̱a̱i̱ṉkia pujushtatui” tímiayi. 44Nuka tuíniamatiataṉ ántutsuk nupetmasar naintia tsakarí̱n wákarmiayi. Antsu Uunt Yusna Eṉketáiṉkia núnisaṉ Muisaissha muchittsuk matsamkamunmaṉ pujuarmiayi. 45Túrunawarmatai Amur aents tura Kanaan aentssha nú nainnium matsatáinia akattúrar Israer shuarja̱i̱ mánaikiar nupetkar Urma nuṉkanam ejeyarmiayi.#14:45 Wek. 15:1-41 Shuar chichamnum yapaji̱áchmaiti.
Currently Selected:
Wek. 14: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
