Wek. 13
13
Kanaan mamikmatniun Muisais akupkarma
1Nuya̱ṉka Uunt Yus Muisaisan chicharuk 2“Kanaan nuṉkan Israer shuaran Wi súsartatjana nuna wekaatus nekaararat tusam aents akupkarta. Aṉkant aṉkant ní aparí̱ weanmaya chikichik chikichik aentsu uuntri̱ akupkarta” tímiayi. 3Muisaiska kampuntin atsunum Parannum pujus Uunt Yus timia tímiatrusaṉ aentsun akupkarmiayi. Nú aentska ashí Israer shuara uuntri̱ ármiayi. 4Tura nuna náari̱ṉkia ju̱ ármiayi, Ruwin shuarka Sakura uchirí̱ Samúa 5nuyá̱ Semiun shuarka Auri uchirí̱ Sajat 6núnisaṉ Jutá shuarka Jipuni uchirí̱ Karep 7tura Isakár shuarka Jusé uchirí̱ Ikiar 8núnisaṉ Eprain shuarka Nuuna uchirí̱ Useas 9nuyá̱ Piṉjiamín shuarka Rapu uchirí̱ Parti 10Sapurún shuarka Sutí uchirí̱ Katiar 11núnisaṉ Jusé shuarka Manasés weanmaya̱ṉka Susí uchirí̱ Kaati 12nuyá̱ Tan shuarka Jemari uchirí̱ Amiar 13núnisaṉ Aser shuarka Mikiaira uchirí̱ Setur 14Neptarí shuarka Wapsi uchirí̱ Nawí 15nuya̱ṉka Kaat shuarnumia̱ṉka Makía uchirí̱ Jiuír. 16Nuṉka iyutarum tusa Muisais akuprarmia nuka nu náartin ármiayi. Tura Nuuna uchirí̱ Useasan Muisais Jusuí anaikiamiayi. 17Muisais Kanaan nuṉka mamikmautarum tusa akupénak “Nekepnum jearum arakaani̱ naint írunna nui̱ wakarum ii iistarum” tímiayi. 18“Túrarum nu nuṉka péṉkerashit. Aents nui̱ matsatainia nusha untsuríyash tura kakarmash ainia nu íisrum mash nekaatarum. 19Tura nuṉka urukukit péṉkerashit tura yajauchiashit. Ni je̱e̱sha áṉkantniunmaṉkeash pujuinia nuí̱chuka wénumimpiash matsatáinia 20nuyá̱ nuṉkasha tí peṉker neremtikniuashit nuíchuka písuashit tura numisha irunainiawash nu mash iistarum. Tura kakaram ajasrum nu nuṉkanmaya̱ araka nere̱ wáintrumna nu akakrum itiatárum” tímiayi.
Kame nu tsawantka uwa yama nerekáru juutai̱ tsawantauyayi. 21Nuya̱ṉka wéar kampuntin atsunum Sénnumia̱ juárkiar mamikmárkutak Repuamátnumaani̱ Rejupnum jeawarmiayi. 22Tura Nekepnumaani̱ wéar Eprunka tímianai jeawarmiayi. Kame Anak aents Ajimián tura Sesai nuyá̱ Tarmai nui̱ṉkia matsamármiayi. (Kame Ejiptunam Suan pepru je̱a̱mnaktinkia siati uwí táasmanum Eprunnaka je̱a̱mkarmiayi.)
23Nuya̱ṉka Iskur ashintsanam jeawar uwa núkap nerekún kanawentuk tsupikiar numiji̱a̱i̱ weakar jímiar yanakiar juíniak ikiu nere̱ncha núnisaṉ munchincha juuk júkiarmiayi. 24Kame nú nuṉkanka Iskurnumia̱ ashints tu anaikiarmiayi. Warí nui̱ Israer shuar úwan nantaaṉkri̱ntiuk tsupikiar júkiaru ásar tu anaikiarmiayi.#13:24 Ipríu chichamnum Iskurka uwa nantaaṉkri̱ támaiti.
25Tura nu nuṉkan mamikmasua kuaraintia tsawantin waketrar káunkarmiayi. 26Káatishnum kampuntin atsú Parannum Muisais Araunja̱i̱ tura ashí Israer shuar matsamármia nui̱ káunkarmiayi. Nuya̱ṉka ni wáinkiarmia nuna mash etserkar araka nere̱ncha iniakmasarmiayi. 27Túrawar Muisaisan ujainiak nuṉka mamikmá ikiutarum tímiam nui̱ jeamji. Nusha nekas péṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha tura nu nuṉkanmaya̱ nere̱nka ju̱i̱ti tiármiayi. 28Túmaitiat aents nui̱ pujuinia nuka kakaram áiniawai tura ni mátsatkamuri̱sha ti uunt tura wenuimiu áiniawai. Núnisaṉ Anaka aentsri̱sha wáinkiarmaji. 29Kame jú̱nis pujuiniawai Nekep nuṉkanmaṉka Amarík aents tura muraani̱ṉkia Jet aents, Jípius aents, Amur aents nuyá̱ nayants yantam Jurtana pakarí̱nkia Kanaan aents matsatainiawai tiármiayi.
30Nuyá̱ Muisaissha pujái̱ Karep Israer shuaran mitia ajastarum tinia chicharainiak “Nú nuṉkaka ata̱i̱r nekas akintrukminiaitji” tímiayi. 31Takui̱ niji̱a̱i̱ wéarmia nu chichainiak “Nú aentsja̱i̱ṉkia mánikchamniaitji. Warí iiji̱a̱i̱ naṉkaamas kakaram áiniawai” tiármiayi. 32Tura niji̱a̱i̱ wéarmia nu Israer shuaran waitruawar ujainiak “Ii nuṉka iyumaj nuka kaji̱ti̱a̱i̱ núṉkaiti núnisaṉ nui̱ matsamárma nusha ti naya armai. 33Núnisaṉ naya aents Anaka shuari̱ waintramji tura niji̱a̱i̱ apatka íimiasmaka iikia manchichia núnin ajasmaji. Tura ni iirmassha manchichia ánin íirmarmaji” tiármiayi.
Currently Selected:
Wek. 13: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
