Mat. 28

Jesus nantakmia

(Mar. 16:1-8; Ruk. 24:1-12; Jṉ. 20:1-10)

1Ayampratin tsawant naṉkaamasmatai tumiṉtin yama tsawa̱a̱na ai̱ Maktaranmaya̱ Marisha chíkich Mariji̱a̱i̱ iwiarsamu iyutai tusar wéarmiayi. 2Tumai̱ Yusa suntari̱ nayaimpinmaya̱ iwiarsamun tarí kaya atutkamun urak nui̱ pujusmiayi. Túmakui̱ nuṉka tí u̱u̱rkamiayi. 3Yusa suntarí̱sha peemia tímiatrus wínchauyayi. Pushirí̱sha ti puju áuyayi. 4Tura iwiarsamun wáiniarmia nú suntarsha nuna wáinkiar ashamainiak ti kuraṉkarmiayi. Jaká áinis ajasármiayi.

5Nuyá̱ Yusa suntar nuwa̱n chichaak “Ashamkairap. Jesus krúsnum máwarmia nu e̱a̱tsrumek. 6Ju̱i̱ṉkia pujatsui. Ni timia núnisaṉ nantakniuiti. Pai, áepsarma nu iitiarum. 7Wárik werum ni unuiniamuri̱ ‘Jesus jakamunmaya̱ nantakní̱ tura wari Kariréanam wétatui. Nui̱ werirum wainkiattarme’ titiarum. Wats nunak tajai” tímiayi. 8Tutai nu nuwa̱ iwiarsamunmaya̱ wárik jíinkiar ashamainiayat ti warasar tseke waketkiarmiayi ni unuiniamuri̱n ujaktai tusar. 9Tumai̱ Jesus wantintiukarmiayi. Tura pujarmek takui̱ Jesusan tariar tikishmátrar nawe̱ncha miniakrusar shiir awajsarmiayi. 10Túram Jesus chichaak “Ashamprukairap. Werum winia yatsur ujatruktarum. Kariréanam wéarti. Nui̱ wéar wáitkiartatui. Tu ujaktarum” tímiayi.

Suntar etserkarma

11Nuwa̱ wéarmatai iwiarsamu wáinin suntarsha péprunam wéar Yúsnan pujurniu úuntri̱n ashí túrunamun ujakármiayi. 12Nisha nuna antukar Israer shuara úuntri̱ji̱a̱i̱ áujmatsatai tusar wéarmiayi. Áujmatsar suntaran ti kuit akikiar 13chicharainiak “Atumsha étserkuram ‘Kashi kanararin ni unuiniamuri̱ taar Jesusa aya̱shi̱n kasamkarmai’ titiarum. 14Tura akupin átum kanarman nekamtaisha niji̱a̱i̱ ii iwiarattaji atumín yajauch awajtámsa̱i̱ṉ tusar” tiármiayi. 15Nuyá̱ suntarsha kuítian achikiar tiarmia nuna tímiatrusaṉ titiái tusar wéarmiayi. Tura tuke yamaisha Israer shuar tu túrunaiti tuíniawai.

Jesus ni unuiniamuri̱n akatar akupma

(Mar. 16:14-18; Ruk. 24:36-49; Jṉ. 20:19-23)

16Nuyá̱ ni aunse unuiniamuri̱ Kariréanam wéarmiayi. Tura Jesus timia nú nainnium jeawar 17nui̱ Jesusan wáinkiar tikishmátrarmiayi. Kame chíkichka Jesusashit tuíniayat Nin wáinkiar tikishmátrarmiayi. 18Nuyá̱ Jesus tíjiu̱ch tantá chichaak “Ashí nayaimpinmasha nuṉkasha akupkatniun kakarman surusuiti. 19Tuma asamtai ashí nuṉkanam werum ashí shuar jintintiárum Wí shuar awajsatarum. Túrarum Yus Apa náari̱ji̱a̱i̱, Yus Uchi náari̱ji̱a̱i̱ tura Yus Wakaní̱ náari̱ji̱a̱i̱ imiaitiarum. 20Ashí atumíin Wi akatrámajrum nu nútiksarmek umiktin unuiniartarum. Tura ju̱ nekaatarum. Tuke tsawantai̱ ikiutsuk atumji̱a̱i̱ pujuttajai” tímiayi Jesus.

Currently Selected:

Mat. 28: jiv

Highlight

Copy

Compare