Mar. 1

Imiakratin Juaṉka etserkamu

(Mat. 3:1-12; Ruk. 3:1-9; Jṉ. 1:19-28)

1Ju̱i̱ Jesukrístunu shiir chicham náṉkameawai. Jesukrístu Yusa Uchirí̱nti.

2Yúsnan etserin Isayas ni Papirí̱i̱n jú̱nis áarchamukait

“Iisiana, ame wéamurmin emka wetí tusan winia akatrámurun akupeajai.

Nisha ame jintimín iwiarattawai. Mks. 3:1

3 Nisha aents atsamunam untsumuk ju̱na títiatui

‘Uuntá jinti̱ iwiarturtarum,

naka awajsatarum.’” Isa. 40:3

4Wats, aents atsamunam imiakratin Juaṉ imiaittsa pujus étseruk “Yajauch túrutairun Yus asakátrurat tusarum nekas enentáiji̱a̱i̱ enentáimsarum iniaisarum iwiarnartarum. Nuyá̱ imiantiarum” tímiayi. 5Anturkatai tusar ashí Jutanmaya̱ shuar tura Jerusaréṉnumia̱ shuarsha Nin tariarmiayi. Taar ni yajauch túramun etsertumakarmatai Juaṉ Jurtannum imiainiarmiayi.

6Juaṉsha kamiyu ure̱ najantramun entsauyayi. Emenmamkesha nuapeyayi. Tura chiniji̱a̱i̱ yutai̱ titikriátsnasha yúuyayi. 7Nisha aentsun ujaak chicharainiak “Wíji̱a̱i̱ṉkia naṉkaamas ana nu winia ukurui̱ winittiawai. Nisha nekas ii Uuntri̱ asamtai wikia tsuntsumpruán ni sapatri̱ jiṉkiamuri̱nkisha atitrachminiaitjiai. 8Wikia entsaja̱i̱ṉ aya aya̱shmin imiaajrume antsu Niṉkia imiantinia ánis Yusa Wakaní̱ atumí enentái̱n eṉketramprattarme” tímiayi.

Juaṉ Jesusan imiaimiu

(Mat. 3:13-17; Ruk. 3:21-22)

9Juaṉ aentsun imiak pujurainiai̱ Jesuska Nasarét pepru Kariréanam ana nuyá̱ jiinkí̱ Juáṉkan tarimiayi. Tura Juaṉ Jurtannum Jesusan imiaimiayi. 10Nuiṉ Jesus entsaya̱ jíiniuk nayaimp uranniun wainkiamiayi. Tura Yusa Wakaní̱n yámpitsa núnin najanar Nin táarun wainkiamiayi. 11Tura nayaimpinmaya̱ chichaamun ju̱na antukmiayi “Ámeka winia aneamu Uchiruitme. Ámin shiir enentáimtajme.”

Íwianch Jesusan nekapsamu

(Mat. 4:1-11; Ruk. 4:1-13)

12Nuyá̱ wárik Yusa Wakaní̱ Jesusan atsá nuṉkanam jukimiayi. 13Tura nui̱ yajasma yujamunam kuaraintia tsawant pujumiayi. Nui̱ pujái̱ iwianchi uuntri̱ Satanás náartin Jesusan nekapsataj tusa pujurmiayi. Túramtai Jesusan wáinkiatai tusar nayaimpinmaya̱ suntar tariarmiayi.

Jesus ni takatrí̱n Kariréanam náṉkamma

(Mat. 4:12-17; Ruk. 4:14-15)

14Ukunam Juáṉkan sepunam eṉkeawarmatai Jesuska Kariréanam Yusa akupeamuri̱n pachis shiir chichaman etserki̱ támiayi. 15Tura chichaak “Tsawant jeayi. Shuarnum Yusa akupeamuri̱ jeatémai. Tuma asamtai nekas enentáiji̱a̱i̱ enentáimtumasrum yajauch túrutairam iniaisarum uwempratin chicham nekas enentáiji̱a̱i̱ enentáimtustarum” tu etserkamiayi.

Jesusa unuiniamuri̱n kuatru achikma

(Mat. 4:18-22; Ruk. 5:1-11)

16Jesus Kariréa antumiaṉka kaanmatkari̱n wekas namakan achinian Semuṉnasha ni yachi̱ Antresnasha nekan aju̱ntuk pujuinian wainkiamiayi. 17Wainiak “Nemartustarum. Namak achia̱rmena nútiksanak aentsun Yusna árat tusan e̱a̱un awajsattajrume” tímiayi. 18Tura nuya̱ṉka ni nekari̱n ajapa ikiuiniak Jesusan nemarsarmiayi.

19Nuya̱sha Jesus ishichik arantach wesa Sepetéu uchirí̱n Jakupun ni yachi̱n Juáṉnasha kanunam ni nekari̱n apáa pujuinian wáinkiarmiayi. 20Wainiak nemartusta tusa untsukarmiayi. Tutai ni aparí̱ncha ni aparí̱ takarniúri̱ncha kanunam ikiuiniak Jesusan nemarsarmiayi.

Iwianchrukun Jesus tsuarma

(Ruk. 4:31-37)

21Kame Kapernáumnum jeawarmiayi. Tura Israer shuar Iruntai̱ Je̱e̱n Jesus wayá̱ ayampratin tsawantinkia Yus Chichaman unuiniamiayi. 22Tura Israer shuara jintinniuri̱ jintintiármia núna iniaṉkas akupniua núnis Jesus jintíakui ni chichame̱n anturkar ti enentáimprarmiayi.Mat. 7:24-29 23Nu tumai̱ iruntai̱niam áishmaṉ iwianchruku pujá untsumuk 24“Nasarétnumia̱ Jesusá íiji̱a̱i̱sha ¿warí wakeram? ¿Iin emeskarturtaj tusamchak taum? Ame yáitiam nunasha wikia nékajme. Ámeka Tunaarincha Yusai̱ya̱itme” tímiayi. 25Tutai Jesus kakantar chicharuk “Takamáttsata. Ni enentái̱ya̱ jiinkitia tájame” 26tutai íwianch áishmaṉkan ukurak ajakniṉkiar untsumak kaka̱a̱r jiinkimiayi. 27Nuna wáinkiar ashamkar nuamtak aniniaisar “¿Ausha warinkit. Yamaram chicham warí chichamait? Ju̱ Jesuska timiá kakaram asa ímia iwianchin akupeatsuk. Iisiana umirainiatsuk” tiármiayi. 28Tura ti wárik nu túrunamu ashí Kariréanam antunkamiayi.

Semuṉka tsatsarí̱n Jesus tsuarma

(Mat. 8:14-15; Ruk. 4:38-39)

29Nuyá̱ Israer shuar iruntai̱ je̱e̱ya̱ jiinkí̱ Jesuska Jakupuja̱i̱ Juáṉja̱i̱sha we Semuṉ ni yachi̱ Antresja̱i̱ pujuarmia nui̱ jeawarmiayi. 30Semuṉka tsatsarí̱ tsue̱r peaknum tepemiayi. Túmakui̱ Jesusan wárik ujakármiayi. 31Nuyá̱ Jesus werí uwejnum achik iniantkímiayi. Túram nu chichamaik michatramiayi. Michatar péṉker ajas Jesusan ni nemarniuri̱ji̱a̱i̱ ayurawarmiayi.

Untsurí jaan Jesus péṉker awajsamu

(Mat. 8:16-17; Ruk. 4:40-41)

32Nu tsawant ki̱arai̱ ashí jáinian iwianchrukuncha Jesusan itiariármiayi. 33Tura ashí nú péprunmaya̱ shuar taar wáitiniam Jesusan káutkarmiayi. 34Untsurí aentsun náṉkamas suṉkurja̱i̱ jáinian Jesus tsuararmiayi. Tura iwianchruku armia nuna enentái̱ya̱n iwianchin jí̱i̱rkiarmiayi. Jesuska íwianch nékamu asa winia náarun ántar pachisara̱i̱ṉ tusa suritkiarmiayi.

Kariréanam Jesus Yus Chichaman étserma

(Ruk. 4:42-44)

35Nuyá̱ kashin káshik tsawa̱tsa̱i̱ṉ Jesus nantaki̱ Yusan áujsataj tusa jiinkí̱ kampuntin atsunum wémiayi. 36Tura Semuṉ ni amikrí̱ji̱a̱i̱ Jesus wemanumaani̱ wéarmiayi. 37Nin wáinkiar “Ashí shuar ámin e̱a̱tmainiawai” tiármiayi. 38Tutai Jesus chichaak “Chíkich péprunmasha arantach wetái. Nui̱ Yusa Chichame̱ etserkatai. Nuna túrattsan táwitjiai” tímiayi.

39Nuna ti ashí Kariréanam Israer shuar iruntai̱ je̱a̱nam etseras wekaimiayi tura núnisaṉ iwianchniasha ji̱i̱ki̱ akupkiní̱ wekaimiayi.

Jesus tunamáru tsuarma

(Mat. 8:1-4; Ruk. 5:12-16)

40Túramtai tunamáru Jesusan seatajtsa tarimiayi. Taa tikishmátar chicharuk “Wakerutakmeka tsuáratin tujintratsme” tímiayi. 41Tutai Jesus nin waitnentak uwejé̱ja̱i̱ antiṉmiayi. Antiṉ chicharuk “Wakerajme. Péṉker ajasta” tímiayi. 42Nu chichamaik Jesus chichakmatai ni suṉkuri̱ meṉkakamiayi. Tura péṉker ajasmiayi. 43Túrunamtai Jesus kakantar chicharak 44akupeak “Wáinkiata, náṉkamsam etseraip. Antsu weme Yúsnan pujurniu úuntrum iniakmamsata. Túram ashí aents ame péṉker ajasmarumin nekaawarat tusam Muisais aar akupkámiania nu umikiam súsatin ana nu susata” tímiayi. 45Tura etserkaip támaitiat jiinkí̱ ni túrunamuri̱n mash etseramiayi. Tura nuna etserka asamtai péprunam aents írunmanum wétinian Jesus nakitrámiayi antsu a̱a̱ atsamunam pujumiayi. Tura ashí nuṉkanmaya̱ Jesusan tariarmiayi.

Currently Selected:

Mar. 1: jiv

Highlight

Copy

Compare