Mat. 17

Jesus nusháa iira ajasma

(Mar. 9:2-13; Ruk. 9:28-36)

1Nuyá̱ sais tsawant naṉkaamasu ai̱ Pítruncha, Jakupuncha tura ni yachi̱ Juaṉnasha níniak júkiar Jesus nainnium wakamiayi. 2Nui̱ Jesus nusháa iira ajattsarmiayi. Ni yapi̱sha étsa̱ya núnik wincha ajasmiayi. Ni pushirí̱sha ti puju jíitsumir ajasmiayi. 3Nui̱ Muisais Iríasja̱i̱ Jesusan chichainian wáinkiarmiayi. 4Nuyá̱ Pítiur Jesusan chicharuk “Uuntá, ju̱i̱ ti shiir pujaji. Wakerakminkia menaint áakmaktai áminiu chikichik tura chíkich Muisaisna tura chikitcha Iríasna” tímiayi. 5Tura Pítiur tu auju wajái̱ yuraṉkim ti puju amuamiayi. Tura nu yuraṉminmaya̱n chichaman antukarmiayi. “Ju̱ka winia aneamu Uchiruiti. Nin ti shiir enentáimtajai. Ni péṉker anturkatarum” tímiayi. Tu chichasmiayi Yus. 6Nuna ni unuiniamuri̱ antukar ti sapijmiakar tekem tikishmararmiayi. 7Túrunawarmatai Jesus tarí antiṉ “Ashamkairap, wajaktiarum” tiármiayi. 8Tura paṉkainiar íimiaj tukamá aya Jesusnak wáinkiarmiayi. 9Nuyá̱ náinniumia̱ akainiak Jesus chicharainiak “Átum ímiaja̱i̱k wainkiarmena nu Wi Aents Ajasu asan jakamunmaya̱ nantaatsa̱i̱ṉ peṉké etserkairap” tímiayi. 10Nuyá̱ ni unuiniamuri̱ Jesusan anintruiniak “¿Urukamtai iin jintintramin ‘Kristu táatsa̱i̱ṉ Irías emka tátiniaiti’ tuinia?” 11Tuíniakui Jesus aya̱k “Nekas Irías tátiniaiti. Tura ni mash iwiarattawai. 12Kame nekas Irías táwiti nuna nin nekaacharmai. Antsu aents wakeriarmia nuna túrawar yajauch awajsarmiayi. Núnisaṉ Winiasha Aents Ajasu ai̱ṉ wáitkiarsartatui.” 13Nuna takui̱ ni unuiniamuri̱ imiakratin Juáṉkan áujmatui, tu enentáimprarmiayi.

Jesus iwianchin ji̱i̱ki̱ akupkámu

(Mar. 9:14-29; Ruk. 9:37-43)

14Ataksha aents matsatmanum jeawarmatai shuar Jesusan tarí tikishmátar 15chicharuk “Uuntá, winia uchir waitnentrutrata. Mayái̱ ashinniuk ti wáitniuiti. Jiniumsha patamniuiti. Entsasha iniainaiti. 16Ame unuiniamurmincha itiarjai túrasha tujintkiarai.” 17Takui̱ Jesus ashí chicharainiak “Maa, Yus peṉké enentáimtichuitrume. Imiá úmichuitrume. ¿Wi atumín katsuntu ajatniukaitjiarum? Wats, uchi itiartitia” tímiayi. 18Nuyá̱ Jesus itiarím yajauch wakaní̱n uchí aya̱shí̱ya̱ ji̱i̱ki̱ akupkámiayi. Túram nu chichamaik péṉker ajasmiayi.

19Nuyá̱ urum ni unuiniamuri̱ Jesusja̱i̱ niṉki matsamsar áujmatainiak “¿Urukamtai yajauch wakan jí̱i̱ktin iikia tujintkiamajⁱ?” 20tuíniakui Jesus chichaak “Yus nekas enentáimtachu asarum tujintkiarme. Túmaitiat nekasaiti mustasa jiṉkiái timiá uchichitiat ti uunt tsakaatsuk. Núnisaṉ Yus ishichkisha enentáimtakrumka nu naint ékemkata tutai nu naint ekemkainti. Peṉké tujintkiashtatrume Yus nekas enentáimtakrumka. 21Kame nu yajauch wakan ji̱i̱ki̱ akupkatniuka ijiarmám Yus áujsatniuiti” tímiayi.

Ataksha Jesus jákatniun ujakma

(Mar. 9:30-32; Ruk. 9:43-45)

22Jesus ni unuiniamuri̱ji̱a̱i̱ Kariréanam wekas ju̱na ujakármiayi. “Wi Aents Ajasu asan, aentsnum surunkattajai tura mantamnattajai. 23Túrutawarmatai menaintiú tsawantai̱ nantaktiatjai.” Tura ni unuiniamuri̱ nuna antukar ti kúntuts enentáimprarmiayi.

Jesus aṉkantaitiat akiktinia nuna akikmakma

24Jesus ni unuiniamuri̱ji̱a̱i̱ Kapernáumnum jeawarmiayi. Tura kuítian achin armia nu Pítrun tariar aniasar “¿Atumí uuntri̱ Yúsnan pujurin akiktinia nuna akikiaik?” 25Tutai Pítiur “Ee” tímiayi. Tura Pítiur je̱á̱ wayá̱ chichaatsa̱i̱ṉ Jesus emka chichaak “Chíkich nuṉkanmaya̱ akupin ¿yana kuítri̱ji̱a̱i̱ṉ takainia. Ní shuari̱niunkek atantainia. Antsu yajaya̱ shuarnan atantainiatsuk. Nekaschak, Semuṉká?” 26Tutai Pítiur “Nekas yajaya̱ shuarnan atantáiniawai” tímiayi. Takui̱ Jesus chichaak “Nuikia ni shuari̱ aṉkant áiniawai. Iisha núnisrik nu akiktin aṉkantaitji. 27Túrasha itiurchat enentáimprara̱i̱ṉ tusar akiktai. Ame tsau jukim entsá wetá. Túram emka namak japikim iwiaṉkam nui̱ kuit wainkiattame. Nu jukim Wíniasha tura áminiusha akikmakta” tímiayi.

Currently Selected:

Mat. 17: jiv

Highlight

Copy

Compare