Mat. 18

“¿Ya imiá naṉkamantuit?” tunaimiu

(Mar. 9:33-37; Ruk. 9:46-48)

1Nu tsawantai̱ ni unuiniamuri̱ tariar Jesusan chicharainiak “Yus akupeamunam pachinia nu ¿ya imiá naṉkamantu áminiait?” aniasarmiayi. 2Nuna tuíniakui Jesus uchin untsuk ajapén awajás 3chichaak “Tí nekasan tájarme, atumí enentáimtairi̱ yapaji̱árum uchia áinis ajachkurmeka Yus akupeamunam pachinkiachminiaitrume. 4Nu asamtai ju̱ uchia áinis péejchach enentáimtumana nuka Yus akupeana nui̱ nekas naṉkamantu ajasminiaiti. 5Nú arantcha Winia anentuk uchin itiaana nú shuar Winiasha itiaareawai” tímiayi. 6“Shuar ju̱ uchin Winia enentáimturas umirtana nuna yajauchiniam aju̱a̱rmataiṉkia nuna túratsa̱i̱ṉ nisha kuntujnum kayaja̱i̱ jiṉkiar nayantsanam ajapén aju̱ṉmaitkiuṉka maak ainti.

Yajauch túratniun aju̱nmakuiṉkia tsuumainti

(Mar. 9:42-48; Ruk. 17:1-2)

7 Ju̱ nuṉkanam tunaanum iniaatai írunna nuja̱i̱ aneartarum. Antsu shuar chikichan tunaanum aju̱a̱rka enentáimprati” tímiayi.

8 “Nu asamtai ame uwejém tura náwem yajauch túratniunam aju̱nmakuiṉkia tsupikiam ajapata. Kame muntuch pujustin tura ukunam nayaimpiniam wétin péṉkeraiti. Antsu kajinkiashtin jinium takamtsuk jeatniuka imiá yajauchiti. 9Núnisaṉ ame ji̱mi yajauch túratniunam aju̱nmakuiṉkia ukuinkiam ajapata. Kame chikichik ji̱ji̱a̱i̱ pujusam nayaimpiniam wétin péṉkeraiti. Antsu jinium mai̱ jí̱ntiuk wétin imiá yajauchiti” tímiayi.

Murik meṉkaaka áujmatsamu

(Ruk. 15:3-7)

10 “Uchi ainia nu nakitrairap. Yusa suntari̱ nin wáinkiatniua nu winia Aparuí̱ tíjiu̱ch pujuiniawai. 11Kame wi Aents Ajasu asan meṉkakarun e̱a̱ktajtsan táwitjiai. 12Enentáimpratarum. Shuar sian murikiun takakuitiat chikichik meṉkakamtai untsurí meṉkakacharun nainnium matsaakᵘ meṉkakan e̱a̱ushtatuak. 13Wáinkiasha untsurí meṉkakacharua nuja̱i̱ naṉkaamas waraschattawak. 14Núnisaṉ atumí Aparí̱ nayaimpiniam pujana nu, nu uchi chikichkisha meṉkakacharti tawai” tímiayi.

Yus shuarti tsaṉkurnáiratin

(Ruk. 17:3)

15 “Tuma asamtai chíkich Yus shuar ámin yajauchin túrutmakuiṉkia ni werim áujsata. Tura ámechik werim yatsumji̱a̱i̱ chichasta. Anturtamkuiṉkia ame yátsum yáiṉkiume. 16Tura anturtamchakuiṉkia chikichik shuar nuíchuka jimiará shuar jukim ataksha weritia. Túram ataksha áujsata nisha paant nekaawarat tusam.Muis. 19:15; Isr. 10:28 17Túrasha yátsum tuke ántachkuiṉkia Yus shuar iruntai̱niam iwiainiakta. Túrasha yátsum peṉké ántachkuiṉkia Yus shuarcha núnisam nu shuar enentáimtusta. 18Nekasan tájarme ju̱ nuṉkanam suritiam nu nayaimpinmasha suritniáktatui. Tura ju̱ nuṉkanam tsaṉkateam nu nayaimpinmasha tsaṉkatnaktatui.

19 Núnisnak tájarme, ju̱ nuṉkanam pujusrum jímiar Yus shuartiram métek enentáimprarum winia Apar nayaimpiniam pujana nu seakrumni̱ṉkia wakerarmena nuna suramsattarme. 20Jímiarchiksha nuíchuka menaintiuksha Yus shuar Winia enentáimturuk iruntrarmatai Wisha nui̱ niji̱a̱i̱ pujajai” tímiayi Jesus. 21Takui̱ Pítiur werí Jesusan aniasmiayi “Uuntá, winia yatsur yajauch awajtakui ¿urutmá tsaṉkuratniuitiaj. Siátikik tsaṉkuratniuitiaj?” 22Takui̱ Jesus aya̱k “Siátik tátsujme antsu iniaṉnatsuk tsaṉkuratniuitme” tímiayi.

Takakmau tsaṉkurachma áujmatsamu

23Tuma asa Jesus Yus akupeamunam pachinkiaru tsaṉkurnáirartiniaiti tusa ju̱ métektaku chichaman áujmatuk tímiayi “Uunt akupin takarin tumashin akirkarat tusa untsukarmai. 24Yama náṉkamuk tí nukap tumashmakua nuna untsukmai. Akikmakchamnia ti tumashmakuyi. 25Tura nu takakmau kuitri̱ atsakui úunt akupin ‘Yajasma áitkiasrum nua̱rtiuk uchirtiuk ashí wariri̱ntiuk suruktarum. Nu kuitji̱a̱i̱ akirkati’ timiai.

26 Tutai nu takakmau úunt akupniun tikishmátar seak ‘Uuntá, waitneasam nákarsata. Auka, mashⁱ akiktatjame’ tímiayi. 27Uunt akupin waitnentar tsaṉkur aṉkant akupkámai. 28Tura nú chichamaik nú takakmau jiinkí̱ ni ai̱n iṉkiuṉmai. Nú ai̱sha nin ishichik tumashiyi. Tura tsékeṉtki̱ sué̱nam achik chicharuk ‘Tumashitmena nu wari akirkata’ timiai. 29Tura ni ai̱ nin tikishmátar chicharuk ‘Waitneasam nákarsata. Wikia mash akiktatjame’ timiai. 30Túrasha nakitramai. Antsu tsaṉkurtsuk sepunam eṉkeamai ashí akirkat tusa. 31Chíkich takakmau nuna wáinkiar ti kúntuts enentáimtuiniak úunt akupniun ashí etsertukarmai. 32Nuna antuk úunt akupin untsuk itiá timiai ‘Yajauchitme. ¿Winia “waitnentrurta” túrutkumin ashí tsaṉkurachmakjam? 33Amesha núnismek ame ai̱m tsaṉkuratniuitme’ timiai. 34Tinia úunt akupin kajekmai. Tura ashí tumashin akikmatsuk asutniáti tusa suntarnum surukmai.” 35Jesus nuna áujmatas amúak chichaak “Núnisaṉ winia Apar nayaimpiniam pujana nu atumín túrutmattarme atumí yachi̱ nekas enentáiji̱a̱i̱ tsaṉkureachkurminkia” tímiayi.

Currently Selected:

Mat. 18: jiv

Highlight

Copy

Compare