Mat. 15

Aentsun ¿warí yajauch awajea?

(Mar. 7:1-23)

1Nuyá̱ Jerusaréṉnumia̱ Pariséusha yaunchu akupkámu jintinniuri̱sha Jesusan tariar aniasarmiayi 2“¿Urukamtai ame unuiniamuram ii uuntri̱ yaunchu jintintrarmia nuna uminiatsu? Iis, ikijmiatskesha yurumáiniawai” tiármiayi. 3Tuíniakui Jesus chicharuk “¿Urukamtai atumsha Yus akupkámu umirtsuk aya aents akupkámu umiirum? 4Iis, Yus chichaak ‘Ame apasha nukusha ti shiir enentáimtusrum umirkatarum.’ Tura ‘Aents ni aparí̱ncha tura nukurí̱ncha yajauchi yúmiṉkiakka nu shuarka páchitsuk mantamnati’ tíchamkia.Jiin. 20:12; 21:17; Muis. 5:16 5-6Antsu átumka tárume ‘Shuar ashí niniu írunna nuka mash “Yúsnaiti” takui̱ nuikia nuja̱i̱ ni aparí̱ncha nukurí̱ncha yáiṉchamniaiti, tárume. Nin yáiṉtinian nakitiak áyatik “Ashí winia áiniana nu Yusna asamtai yáiṉchamniaitjame” títiniaiti’ tárume. Núnisrum tákuram Yus akupkámu iniaisarum aya aents akupkámu umiirume. 7Ántar chichamtiniaitrume. Yúsnan etserin Isayas yaunchu nekas atumín ju̱na áartampramiayi

8 ‘Ju̱ aents ni wene̱ja̱i̱ shiir awajtuiniawai

tura ni enentái̱ṉkia yajá enentáimiainiawai.

9 Tura túkeneas shiir awajtuiniawai.

Aentsu chichame̱n jintintiáiniayat Yusa Chichame̱nte tuíniawai.’” Isa. 29:13 10Nuna tinia shuaran untsuk chicharuk “Ju̱ antukrum péṉker nekaatarum. 11Aents yúana nuka shuaran yajauch awajtsui. Antsu wenunmaya̱ jiinia nuka shuaran yajauch awajeawai” tímiayi.

12Nuyá̱ ni unuiniamuri̱ Jesusan tariar “Maa, Pariséu ame chichammin antukar ti itiurchat enentáimprarai” tiármiayi. 13-14Tuíniakui Jesus chichaak “Ikiuktiarum. Kusurua áintsaṉ áiniawai. Tura kusurúncha jintintiáiniawai. Mai̱ kusuru ásar mai̱ wá̱a̱nam akaikí̱ iniaawartatui. Wats, ajanam nupa̱ írunna ántsaṉ áiniawai. Tura ashí winia Apar nayaimpiniam pujana nu araachmaka takamtsuk uwé ajapamu átatui.” 15Takui̱ Pítiur Jesusan chicharuk “Nu métektaku chicham paant awajsata” tímiayi. 16Tutai Jesus chichaak “¿Atumsha nekaachurmek. 17Enentáimprachurmek? Ashí wenunam waya̱a̱na nu wakenam wéatsuk. Tura nuyá̱ iniaṉkastiniaiti. 18Antsu wenunmaya̱ jiinia nu enentáinmaya̱ jiiniu asa aentsun yajauch awajeawai. 19Ashí yajauch enentáimsatniuka enentáinmaya̱ jiiniainiawai, maṉkartuatniusha, chikicha nuwé̱ kasamkatniusha, tsanirmatniusha, kasamkatniusha, waitruatniusha, yajauch áujmatsatniusha. 20Nekaska ashí nu áiniawai shuaran yajauch awajna nuka. Tura ikijmiatsuk yurumátniuka shuaran ni enentái̱n yajauch awajeatsui” tímiayi.

Israercha nuwa̱ Jesusan enentáimtusma

(Mar. 7:24-30)

21Jesus nuyá̱ jiinkí̱ Tírunmasha tura Setunnumsha wémiayi. 22Tura Kanaannumia̱ nuwa̱ Jesusan tarí chicharuk “Uuntá, úunt akupin Tawit ame we̱a̱trum asamtai winia waitnentrurta. Nawantur yajauch wakantruku asa tí waitrutawai” tímiayi. 23Tura Jesus ái̱kchamiayi. Tura ni unuiniamuri̱ tariar “Awemata. Tuke untsumki̱ apapétmaji” tiármiayi. 24Nuyá̱ Jesus chicharainiak “Aya Israer shuarnumaṉ meṉkakaru ainia nuna e̱a̱ktinian Yus akuptúkuiti.” 25Takui̱ nuwa̱ tikishmátar “Uuntá, waitnentrurta.” 26Tutai Jesus chichaak “¿Uchi apatkun yu pujá jurukir ya̱wá̱ susamniakait?” 27Tutai nuwa̱ chichaak “Nekas, Uuntá, tame. Tura ya̱wa̱sha ni aentsri̱ yurumáiniakui nuṉká iniaarun yuíniatsuk.” 28Takui̱ Jesus chichaak “Makú, nekas Winia enentáimtursame. Ame wakeram núnisaṉ atí” tímiayi. Tura nu chichamaik ni nawantri̱ péṉker ajasmiayi.

Jesus untsurí jáinian tsuararma

29Jesus nuyá̱ jiinkí̱ Kariréa antumiaṉka kaanmatkari̱n waketkimiayi. Tura naint waka nui̱ pujusmiayi. 30Nui̱ untsurí aentsun shutuapnasha kusurúncha chichachuncha tsupirkamuncha chíkich jáiniancha Nin itiariármiayi. Túrawar Jesusa nawe̱n aeprusarmiayi. Túram tsuararmiayi. 31Kame chichachusha chichainiakui, tsupirkamusha péṉker ajainiakui, shutuapsha péṉker wekainiakui, kusurúsha imiainiakui nuna iisar Israera Yusri̱n shiir yumiṉsarmiayi.

Jesus kuatru mir áishmaṉnaka tura nuwa̱ncha uchincha ayurkamu

(Mar. 8:1-10)

32Nuyá̱ Jesus ni unuiniamuri̱n untsukar chicharainiak “Ju̱ aentsun waitnentainiajai. Warí, menaintiú tsawant Wiji̱a̱i̱ yurumtsuk yujainiatsuk. Ayurtsuk ni je̱e̱n akupkachminiaitjiai. Jintiá pimpiki̱ wáitsartatui.” 33Ni unuiniamuri̱ chicharainiak “Tura Uuntá, ¿shuar atsaasha tuya̱ṉ yurumak sumaktajⁱ ju̱ aents ayurawartincha?” 34Tutai Jesus inintrak “¿Urutmá paṉka takakrum?” tutai nisha “Siati paṉ nuyá̱ ishichik namak takakji” tiármiayi. 35Nuyá̱ aents nuṉká pujusárti tusa akupkámiayi. 36Tura siati páṉkan namaknasha achik nuyá̱ Yusan yumiṉsamiayi. Tura puur aents ayuratarum tusa ni unuiniamuri̱n susamiayi. 37Ashí yurumáwar ejemararmiayi. Tura puunaruka juukam siati chaṉkinnium piak juákmiayi. 38Tura nui̱ yurumáwaruka nuwa̱sha uchisha nekapmatsuk aya áishmaṉkak kuatru mir ármiayi. 39Nuyá̱ Jesus aentsun akupak kanunam eṉkemár Maktara nuṉkanam wémiayi.

Currently Selected:

Mat. 15: jiv

Highlight

Copy

Compare