Riw. 26
26
Umíakur sunastin
1Nakumkar najankamu yus tura enentáimtutai̱ kayasha najatmamkairap. Atumí nuṉke̱nka tikishmátratin kaya tí péṉker najankamusha takusairap. Warí Witjiai Uunt Yus atumí Yusri̱. 2Ayampratin tsawantai̱sha Winia tsawantur asamtai arantúktarum tura Yus Shiir Awajtai̱ Je̱a̱rsha shiir enentáimtusrun tsuntsumpruátarum. Witjiai Uunt Yus.
3Tura chicham umiktin nuyá̱ akupkámu umiktin Wi najankamuja̱i̱ métek wekaakrum péṉker enentáimtusrum umíakrumni̱ṉkia 4yumisha tsawantri̱ji̱a̱i̱ metek yutukat tusan akuptúktatjarme. Tura nuṉkasha tí peṉker neremtikiartatui núnisaṉ kampunniunmaya̱ yuraṉsha tí peṉker nerekartatui. Isk. 34:26-27 5Tura trikiu pákakrumsha uwa júuktin jeamam pakartatrume núnisrumek uwa juwakrumsha árak araktin ataksha jeamam júuktatrume. Túrakrum nutsumam atumí yurumkari̱n yuáttarme núnisrumek atumí nuṉke̱nka sapijmiatsuk tí peṉker matsamsattarme. 6Matsatrumna nu nuṉkanmaṉka tí peṉker aṉkant matsastatjarme. Kame yaki awaktámkatarum túmakrum sapijmiatsuk tí peṉker kanartatrume. Núnisnak atumí nuṉke̱nka yajasma emesma áiniana nunasha emeṉkártatjai tura mesetcha atumí nuṉke̱nka atsuttawai. 7Antsu atumí nemasri̱ṉkia pataatukrum puya̱ja̱i̱ máattarme. 8Kame atumíiya̱nka sénkuchikitiataṉ sian aentsun apapékartatui tura siánkaitkiuṉka tias mir aentsun apapékartatui. Túrakrum atumí nemasri̱ṉkia atumí puya̱ri̱ji̱a̱i̱ kajeṉtatrume. 9Nuya̱ṉka péṉker enentáimtustatjarme túran pampain awajsan ti untsurí awajsattajrume. Túranka atumji̱a̱i̱ chichaman najanmiaj núnaka nekas umiktatjai títiatjarme. 10Yurumak tí nukap aa asamtai yamái juukma ikiustai tusarum yaunchu juukma yúarmena nuka utsaṉtatrume.
11Kame Wi pujustinian atumíin ikiustatjai tura Winia enentái̱rsha muí̱jramkashtatrume. 12Wikia atumji̱a̱i̱ wekasattajai tura atumí Yusri̱ átatjai tura atumsha núnisrumek Wí shuar átatrume. 13Witjiai Ejiptunam matsatrumin nuyá̱ aentsu iniatairi̱ ára̱i̱ṉ tusan jí̱i̱rmiajrumna nu Uunt Yus atumí Yusri̱. Kame íniakur wáitkiatai matsatrumin Wi aṉkant awajsámiajrume túram paṉkairum naka wekasaitrume.
Umíachkur yumiṉnartin
14Túrasha Winia anturtutsuk ju̱ chicham akupkámu umiktin Wi najankamu péṉker enentáimtusrum umíachkurminkia 15tura Winia umiktin chichamur peṉké nakitiakrumni̱ṉkia núnisrumek atumí enentáisha Wi akupkámu chichamprun muí̱jiak péṉker enentáimtus Wi akupkámu áiniana nunasha umitsuk Wiji̱a̱i̱ chícham najanamusha ántar awajsákrumni̱ṉkia 16antsu nuiṉkia Wisha atumín ju̱na túrattajrume. Ti ashamkamnia tsuumai̱ áiniana nuna tura tísisnasha nuyá̱ atumí ji̱n emesturmak atumí enentái̱ncha jakamnia nekapkiu tusan tsue̱muncha akuptúktatjarme. Arakmakrumsha ántrarum atumí nemasri̱ yúatin arakmattarme. 17Wisha nuya̱ṉka atumniaka kajerkattajrume túrunawakrumni̱ṉkia atumí nemasri̱sha nupettamkattarme. Átum muí̱jiarmena nuke atumí uuntri̱ ajasártai túrasha átumka apapéachmatiatrumek ántrarum pisattarme.
18Maa, ju̱ka wáiniatrumek umirtutsuk nú arant ajakí̱ wéakrumni̱ṉkia nuya̱ṉka nuna naṉkaamas siati patatkan atumí tunaari̱ṉkia asutiáttajrume. 19Atumí kakarmari̱ji̱a̱i̱ naṉkamantu enentáimtumarmena nunasha emestuktatjarme tura atumí nayaimpiri̱ncha kátsuram jírua núnin nuyá̱ nuṉkemniaka yaṉkú jírua timianú pisu awajsartatjai. 20Atumí kakarmari̱sha ántrarum wasurkattarme. Warí nuṉkasha araknaka peṉké neremtikiashtatui tura kampunniunmaya̱ yuraṉsha peṉké nerekchartatui.
21Tura Winia umirtuktin nakitiakrum nú arant ajakí̱ wéakrumni̱ṉkia Wisha nútiksanak átum yajauch túramuja̱i̱ métek siati awaiṉkin ataksha siati jean suṉkuran akuptúktatjarme. 22Túran kampunniunmaya̱ yukartin yajasman akuptúran atumí uchirí̱n amutkattajrume nuyá̱ atumí waakari̱ncha emestukan atumniasha ishichik awajsattajrume. Túramka atumí jinti̱sha mashiarartatui.
23Tura jú̱ja̱i̱sha péṉker ajatsuk antsu nuna arant ajakí̱ wéakrumni̱ṉkia 24Wisha atumniasha nútiksanak nú arant kajerkattajrume. Túran átum yajauch túramunam nuna naṉkaamas siati awaiṉkin ataksha siati asutiáttajrume. 25Tura atumji̱a̱i̱ chícham najanamun ayamprakun Winia yapajmiátruktinian mesetan atumín itiartiatjarme. Tura atumí pepruri̱n u̱mkakrumnisha antsu nui̱ṉkia suṉkuran akuptúktatjarme túrunarum atumí nemasri̱ uwejé̱n íktusma átatrume. 26Túranka yurumkancha amaschattajrume. Kame nuna túramtai̱ṉkia tias nuwa̱ chikichik jiniumaṉ páṉkan iniarkartatui núnisaṉ páṉkan amainiakush nekapmasman amastatrume. Túmakrum yúakrumsha peṉké ejemarchattarme.
27Nu túramash peṉké anturtutsuk nú arant ajakí̱ wéakrumni̱ṉkia 28nui̱ṉkia Wisha suíran ka̱e̱ kaje̱ntkan nú arant awajsattajrume. Túran átum yajauch túramunam nuna naṉkaamas siati awaiṉkin ataksha siati asutiáttajrume. 29Nuya̱ṉka atumí uchirí̱ tura nawantri̱ namaṉke̱ yuáttarme. 30Túran najankamu yus átum enentáimtutai̱ naint írunna tura átum kuṉkuin áestutai̱ írunna nunasha emestuktatjarme. Tura atumí aya̱shí̱ kajinkiáru irumpramunam atumí yusri̱ kajinkiáru áiniana nunasha atumí aya̱shí̱ji̱a̱i̱ apatkan irumprattajai. Túran Wikia peṉké muí̱jkiattajrume. 31Atumí pépruri̱ṉkia itiarak awajtústatjai tura atumí Yus Shiir Awajtai̱ Je̱e̱ncha emeskaran aya jú̱nik awajsartatjai. Túran tí peṉker kuṉkuin áesturkurmincha nekaprashtatjai. 32Ántsanak nuṉkancha aya jú̱nik awajsartatjai. Nu túramun atumí nemasri̱ nui̱ pujuinia nuna wáinkiar ¡Chuwa ausháa! tiártatui. 33Atumniaka ashí nuṉkanam tsakiṉmaktatjarme. Túram Winia puya̱run atumín ukuitkiattajrume. Nuya̱ṉka atumí nuṉke̱nka aya jú̱nik ajasármatai atumí pépruri̱ṉkia ashí itiarak ajasártatui.
34Nú túrunamtai atumí nemasri̱ nuṉke̱n átum pujuttarmena nui̱ṉkia aya jú̱nik juaku asa núṉkaka tí peṉker ayamprattawai. Nuyá̱ núṉkaka áyameak ti shiir nekaprattawai. 35Átum nui̱ pujarmena nú uwitin nú nuṉkaka atak asak kampunmatkiatcha asarum kampunkataj tusa yamaikia ayamprattawai. 36Atumíya̱ iwiaaku juákaru ni nemasri̱ nuṉke̱n pujuartatna nui̱ṉkia ní enentáinkia tí sapij awajsaram nuka iniak sa̱i̱rit ajak nuke ipisiártatui. Túmakrum maattsa apapéamua tímianu tsékeakrum apapéachmaitiatrumek atumek iniartatrume. 37Maattsa apapéamua tímiatrusrum tsékeakrum yaaksha apapéachmaitiatrum mái̱ túkumnai ajattarme. Atumí nemasri̱ wajatratniuka peṉké jeashtatrume. 38Uunt nuṉka mátsatkamunam pujustatrumna nui̱ṉ amuukattarme. Túmakrum atumí nemasri̱ nuṉke̱n amutmaktatrume. 39Atumíiya̱ tuke iwiaaku pujuartatna núnaka ní mui̱jmiai̱ri̱ṉ ikiaurartatui ní nemasri̱ nuṉke̱ni̱ṉ. Núnisaṉ ni aparí̱ mui̱jmiai̱ri̱ṉ ni aparí̱ji̱a̱i̱ métek kaurartatui.
40Antsu Winia umirtutsuk nisha níniun tura ni aparí̱ mui̱jmiai̱ túrawarman tura Winia nakitruiniak nu arant ajasármancha ashí etserkarmatai̱ṉkia 41Wisha núnisnak nin nakitiáiniakun kajerkaran ni nemasri̱ nuṉke̱n akupraru asan ni tsupirkachma núnisar Yusan enentáimtachunak enentáin yapaji̱áwar ni tunaarí̱n nekaamawarmataiṉkia 42Wisha núnisnak Jakupja̱i̱ tura Isakja̱i̱ nuyá̱ Aprajámja̱i̱ chícham najanawarmiajna nuna tura nuṉkancha enentáimturtatjai. 43Túrasha núṉkaka ni yajauchiri̱ni̱ṉ mashiar juákartatui. Túruna aya jú̱nik juákaruiti. Nu nuṉka tí peṉker ayamainiak ti shiir nekaprartatui. Nuka tumai̱ niṉkia ní yajauchiri̱ni̱ṉ asutniás pujusártatui. Warí Wi akupkámun nakitrar tura ni enentái̱sha Winia chichamprunka peṉké mui̱jkiarmai. 44Maa núnaka túmawariataṉ ni nemasri̱ nuṉke̱e̱n matsatáiniakuisha Wi niji̱a̱i̱ chícham najanamu ántar juáka̱i̱ṉ tusan Wikia nakittianash nakitrachartatjai tura muí̱jtianash muí̱jkiaran amú amuka awajsachartatjai. Warí Wikia Úunt Yusaitjiai ni Yusri̱. 45Tura nin waitnentainiakun ni úuntri̱ji̱a̱i̱ Wi chichaman nanamiajna nuna enentáimturtatjai. Kame atumí Yusri̱ átaj tusan Ejiptunam matsatrumin ashí nuṉkanmaya̱ aents iimiainiamunam jí̱i̱rmiajrumna nuitjiai Wikia Uunt Yus atumí Yusri̱’ tawai titiá” tímiayi.
46Jú̱ áiniawai chícham umiktin nuyá̱ akupkámu umiktin nuyá̱ jintíarma umiktinian Uunt Yus Senái nainnium Israer shuar umikiartinian Muisaisai̱ni̱ Israer shuar susamuka.
Currently Selected:
Riw. 26: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
