Riw. 27
27
Akikmatkar aents ataksha awaiṉkitin
1Uunt Yus Muisaisan áujuk chicharuk 2“Israer shuar áujsarta tura chicharainiakum ‘Yaaksha Winia átaj tau Uunt Yus iirui ju̱na nekas umiktatjai takui̱ akikmatkar jú̱nisaṉ aṉkant ajastiniaiti. 3Aents áishmaṉ páintinmaya̱ naṉkama sasaintia uwí takaku kuítriṉkia kuít jiru seṉkuintia sikru jeá átatui. Nú sikruja̱i̱ Yus Shiir Awajtai̱ Je̱e̱n takasarmai. 4Tura núwa̱itkiuṉka traintia sikru jeá átatui. 5Nuyá̱ áishmaṉ séṉkunmaya̱ juarki̱ painti uwí takakuṉka painti síkruiti antsu núwa̱itkiuṉka tias síkruiti. 6Áishmaṉ chikichik nantunmaya̱ juarki̱ seṉku uwí takakuka kuít jiru seṉku sikru jeawai. Antsu núwa̱ka kuít jiru menaintiú sikru jeawai. 7Áishmaṉ sasaintia uwí íniaṉkas takakuka kinse sikru tura núwa̱ka tias sikru jeawai. 8Kame urutmá akikmaktiniait nuna aents peṉké kuítrincha asa akikmaktinian tujintkiamtaiṉkia antsu nui̱ṉkia Yúsnan pujurniuí̱ wétiniaiti tura ju̱na nekas umiktatjai tana nú urutmana akikmakminiait nuja̱i̱ métek nuní̱ akikmakta Yúsnan pujurin títiniaiti.
Taṉku tura wari̱ṉsha akikmatkar awaiṉkitin
9Kame taṉku Uunt Yus mantuar susamniaitkiuiṉkia, nú taṉkunu ashí susamuka Uunt Yusna akantúkmaiti. 10Nuka peṉké yapaji̱áshtiniaiti túrutskesha péṉkerja̱i̱ yajauch yapajniáshtiniaiti ántsarik yajauchiji̱a̱i̱sha péṉker yapaji̱áshtiniaiti. Kame mái̱ taṉkuk yapajniakuiṉkia nusha tura yapaji̱ámusha Uunt Yus mái̱ akantúkma ártatui. 11Tura taṉku pénkerchaitkiuinkia Uunt Yus mantuar áestuachminiaitkiui̱ṉkia táṉkuka Yúsnan pujurniuí̱ júkitniuiti. 12Tura Yúsnan pujurin péṉkeraitkiuisha tura yajauchitkiuisha nuní̱ kuit jeawai títiniaiti. Kame Yúsnan pujurin títiatna núnisaṉ átatui. 13Tura yaaksha awaiṉkitniun wakerakka taṉku urutmá kuítiait nuna seṉku nakak chikichik nakakmanak patas akikmaktiniaiti.
14Kame yaaksha je̱e̱n Uunt Yusna akantúkma nútikiamtaiṉkia péṉkeraitkiuisha tura yajauchitkiuisha urutmá kuitia jeá núnaka Yúsnan pujurin apujsattawai. Tura Yúsnan pujurin urutmá titiatá núnisaṉ juáktatui. 15Túrasha ni je̱e̱n Yúsnan akantúkainia nuna akikmatak ataksha awaiṉkitniun wakerakka je̱a̱ kuítri̱n seṉku nakak chikichik nakakmanak je̱a̱ kuítri̱n patas akikmak awaiṉki̱ ataksha nérentin ajasminiaiti.
16Tura yaaksha ni nuṉka takakman Uunt Yusan akantúkmataiṉkia urutmá araamnia jea nuja̱i̱ métek kuítri̱ṉkia átiniaiti. Jimiará ritru ishichik náṉkamasaṉ sewata jiṉkiái araatin jeakka nuna kuítri̱ṉkia kuít jiru seṉkuintia sikru jeawai. 17Tura tsaṉkurnatai̱ uwitin ni nuṉke̱n Yúsnan akantuiniakuiṉkia Yúsnan pujurin urutmá titiatá nuja̱i̱ métek átatui. 18Antsu tsaṉkurnatai̱ uwikia naṉkaamasmanum yaaksha ní nuṉke̱n Yúsnan akantúkka tsaṉkurnatai̱ uwí jeatin urutmá uwiya taasa nuja̱i̱ métek urutmá kuitia jea nuna Yúsnan pujurin nekaatniuiti nuna tura nuṉká kuítri̱ya̱ nuna ementúktiniaiti. 19Tura nuṉken Yúsnan akantúk akikmak ataksha awaiṉkitniun wakerakka nuṉká kuítri̱n seṉku nakak chikichik nakakmanak nuṉká kuítri̱n patak akikmaktiniaiti. Nuna akikmakka núṉkaka ataksha niniu ajawai. 20Antsu nuṉkan akikmak ataksha awakeachkuṉka tura nuṉka chíkich sunasmataiṉkia nuya̱ṉka atakka peṉké awaiṉkichmin ajasái. 21Tura tsaṉkurnatai̱ uwí naṉkaamasmatai nuṉka ata̱i̱miua núnis Uunt Yusna akantúkma átatui. Túruna Yúsnan pujurniu núṉkea núnis niniu ajawai. 22Nuyá̱ yaaksha nuṉka níniuchun sumak Uunt Yusan akantúkmataiṉkia 23nui̱ṉkia urutmá kuitia jea núnaka Yúsnan pujurin apujtustatui. Tura Uunt Yusna akantúkma asamtai ame urutmá títiatam núnaka nú tsawantini̱ṉ akikmaktiniaiti. 24Tura tsaṉkurnatai̱ uwí jeamtaiṉkia yana sumarkama nui̱ṉ nú nuṉkaka ní nerenniuri̱ni̱ṉ waketkittiawai. 25Kame kuitri̱ ashí apujtusartatmena nuka sikru Yus Shiir Awajtai̱ Je̱a̱ ana nuja̱i̱ métek nekapmam apujtusartatme. Nu síkruka painti jira takakui.#27:25 Chikichik jira seṉku kramu jeawai. Painti jira 100 krámuiti.
26Yaaksha taṉkuri̱ emká petsakmataiṉkia Uunt Yusna asamtai Yusna atí tusa atak akantúkchamniaiti. Warí nuka emká petsakma ásar Uunt Yusna áiniawai. Kame wáakaitkiusha núja̱i̱nchuka murikiuitkiuisha nuka Úunt Yusnaiti. 27Antsu taṉku imiatkímpra áiniana nuítkiuiṉkia taṉkú kuitri̱ urutmait nuna seṉku nakak chikichik nakakmanak taṉkú kuítri̱n patak akikmak ataksha awaiṉkimniaiti. Tura akikmatkar ataksha awakenachkuiṉkia antsu nui̱ṉkia urutmá kuítiait nuja̱i̱ métek surunkattawai. 28Tura aents ní ashí takakmanumia̱n warinkisha áentsuitkiuisha táṉkuitkiuisha núṉkaitkiuisha Uunt Yusan takamtsuk íktusuitkiuṉka nuka surutkesha surunkashtiniaiti tura akikmakar awaketkesh peṉké awaiṉkishtiniaiti. 29Chikichik áentskesha yumiṉkramuka akikmatkar ataksha aṉkant awajsachminiaiti. Nuka páchitsuk jákatniuiti.
30Kame ashí nuṉkanam tiásnumia̱ chikichik akankámu áiniana nuka araka nere̱sha tura numí neré̱ yuraṉ áiniana nusha Uunt Yusnaiti. Nuka Uunt Yusna akantúkma áiniawai. 31Tura tiásnumia̱ chikichik akankámun yaaksha akikmatak aṉkant awajsatniun wakerak nuna kuítri̱n seṉku nakak chikichik nakakmanak nuna kuítri̱n patak akikmaktiniaiti. 32Tura atumí ushukrutairi̱ni̱ naṉkaamainiana atumí waakari̱ tura atumí murikrí̱ tiásnumia̱ chikichik akankámu súarmena nuka Uunt Yusna akantúkma átiniaiti. 33Péṉkerashit núja̱i̱nchuka yajauchiashit nunaksha íischatniuiti tura yapají̱tniash yapaji̱áshtiniaiti. Antsu yapajniámtaiṉkia nusha tura yapajniásha Yusna akantúkma ajawai tura akikmatkarsha aṉkantka awajsachminiaiti’ tawai titiá” tímiayi. 34Jú̱ áiniawai akupkámu umiktin chichaman Senái nainnium Uunt Yus Muisaisan susamia nuka Israer shuar umikiartinian.
Currently Selected:
Riw. 27: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
