Jus. 5
5
Jirkar nuṉkanam matsamkamu
1Amur aentsun ashí akupniúri̱ armia nu Jurtan ayaam nantu akatainmaani̱ pujuarmia nu nuyá̱ Kanaan aentsun ashí akupniúri̱ armia nusha nayants Mititiránianam matsamármia nusha Jurtan entsan Yus uku̱yámtai Israera shuari̱ katia̱rai táman antukar ti ashamkarmiayi.
2Nu tsawantin Uunt Yus Jusuin chicharuk “Kaya kuchí najanam Israera shuari̱ Wi tímiaj núnis ataksha tsupirnakarti” tímiayi. Naṉ. 17:10-14 3Nu tutai Jusuí kayan kuchí najanak Ararút nainnium Israera shuari̱n tsupirkarmiayi. 4Kame Ejiptunmaya̱ mesetan unuimiátka jíinkiarmia nuka kampuntin atsú nuṉkanam wésar jákarmiayi. 5Antsu Ejiptunmaya̱ jíintrarmia nuka mash tsupirnakaru ármiayi. Túrasha atsamunam ashí jintiá akiiniawaruka tsupirnakcha ármiayi. 6Warí Israer aentska mesetan unuimiátka Ejiptunmaya̱ jíintrarmia nu kaji̱ṉ amuumam kampuntin atsamunam kuaraintia uwí yujasarmiayi. Kame Uunt Yusa chichame̱n anturkachu ásar túrunawarmiayi. Warí Uunt Yus nekas túrattajai tusa chicharainiak “Tí peṉker nuṉkan ashí arak tsapáu asamtai muntsu míshkiji̱a̱i̱ entsa núnis akamunmasha atumí úuntri̱n súsatnuitjiarme tiármiaj nuiṉkia átumka waya̱shtiniaitrume” tiniu asa túramiayi. 7Uunt Yuska Israer shuara uchirí̱n nu nuṉkanmaṉka matsasármiayi. Tura jintia yujasar tsupirnakcharu ásarmatai Jusuí nu aentsun tsupirkarmiayi. 8Tura tsupirnararu armia nuka péṉker ajaamam matsamkamunmaṉ pujuarmiayi. 9Nuyá̱ Uunt Yus Jusuin chicharuk “Tsupirnarmaja̱i̱ Ejiptu aentsu natsantin tura umishtai̱ri̱n emeṉkátkattajai.” Nu túramu asamtai nú nuṉkaka yamaiya̱ ju̱i̱sha Jirkar náartiniaiti. 10Nuya̱ṉka Israer shuarsha Jirkar nuṉkanam Jirikiú pakarí̱n matsamkar yamaram nantutin katurse tsawantin aaṉku Páskuan najanawarmiayi. 11Áintsaṉ Paskua iniaṉkasar tura kashinkia ju̱ nuṉkanmaya̱ yurumkan paṉ karin eṉketáchma najanamun nuyá̱ trikiu unuikman yúawarmiayi. 12Tura nayaimpinmaya̱ yurumkaka nui̱ṉ naṉkankamtai kashinkia ju̱ nuṉkanmaya̱ yurumkan yurumtan juárkiarmiayi. Túrunamtai Israer shuar nayaimpinmaya̱ yurumkanka peṉké wáinkiacharmiayi. Antsu nu uwitinkia Kanaannumia̱ yurumkan yurumáwarmiayi.
13Nuyá̱ chíkich tsawantai̱ Jusuí Jirikiúnam nuntumas íimiaj tukamá áishmaṉ puya̱n takus wajan wainkiamiayi. Tura chicharuk “¿Íi shuarkaitiam nuíchuka ii nemasri̱nkaitiam?” tímiayi. 14Tutai nu áishmaṉsha chichaak “Amé shuarchaitjiai núnisnak nemasmechuitji̱a̱i̱. Antsu wikia Uunt Yusa suntari̱ uuntri̱ asan winiajai” takui̱ nuyá̱ Jusuisha arantúkmaja̱i̱ shiir awajuk tikishmar tsuntsumá nuṉká antiṉ aya̱k “Winia uuntru, ¿warí itiurtuktaj tusamea wakerutam?” tímiayi. 15Nuna takui̱ Uunt Yusa suntarí̱sha Jusuin chicharuk “Ame wajamna nui̱ Yus pujá asamtai arantakum sapatrum ukuinkiata.” Tutai Jusuí tímiatrusaṉ umikmiayi.
©2009 Avant Ministries in cooperation with Wycliffe Bible Translators, Inc. All rights reserved.