Jus. 4
4
Jurtan entsanmaya̱n tuse kaya irumpramu
1Ashí aents Jurtannum katia̱rar umirarmatai Uunt Yus Jusuin chicharuk 2“Israer shuar tuse wea ainia nuyá̱ chikichik weanmaya̱ chikichik chikichik anairata. 3Tura Jurtan entsa ajapén Yúsnan pujurin wajainia nuyá̱ tuse kaya achikrum jukirum tui̱ kanartatrum nui̱ irumpratarum tiartá” tímiayi Yus. 4Nuyá̱ Israer shuar tuse wea ainia nuya̱n chikichkiniak chikichkiniak anairamia nuna Jusuí untsukarmiayi. 5Tura Jusuí chicharainiak “Atumí Yusri̱ Eṉketai̱ Jurtan ajapénia̱ tímianai pujana nui̱ wetarum. Tura chikichik aentsuk chikichik káyanak yanakí̱ jukiti. Túrakrum Israer shuara uuntri̱ tuse ainia nuja̱i̱ métek jusatarum. 6Ju̱ka ukunmasha peṉké kajinmatkichmin atí tusarum túrattarme. Tura ukunam atumí uchirí̱ anintruiniak ‘¿Ju̱ kaya irumpramusha warí urukamtai jú̱tikiamuit?’ 7Túramkurmincha átum aya̱krum ‘Uunt Yus Aentsja̱i̱ Chícham Najanamu Eṉketáin inimiainiakui Jurtan entsa jímiapetek nakaakamiayi. Tura nakaak kukach ajasmanum Eṉketáin katiṉmiayi’ títiniaitrume. Tuma asamtai Israer shuartikia nu kaya irumpramu iisar nu tuke enentáimtustiniaitji” tímiayi.
8Kame Israer shuarka Jusuí timia ímiatrusaṉ túrawarmiayi. Uunt Yus Jusuin timia nuja̱i̱ métek Jurtan entsa ajapénian tuse kayan júsarmiayi. Tura Israer shuara uuntri̱ tuse ainia nuja̱i̱ métek kayan júsarmia núnaka yaruakar ni kanararmia nui̱ irumprarmiayi. 9Núnisaṉ Jusuikia Yúsnan pujurin Yus Aentsja̱i̱ Chícham Najanamu Eṉketáin yanas Jurtan ajapéri̱n wajarmia nui̱sha tuse kayan irumpramiayi. Tura nú kayaka yamaiya̱ ju̱i̱sha tuke matsatainiawai. 10Yúsnan pujurin Uunt Yusna Eṉketáin juarmia nuka Uunt Yus Jusuin timia umiimiam Jurtan ajapéri̱ni̱ṉ wajarmiayi. Kame Muisais Jusuin jú̱nisam túrata timia nuka ashí uminkiamiayi. Túrunamtai ashí aents wárik katiṉkiarmiayi. 11Nuyá̱ ashí aents katia̱rarmatai Uunt Yusna Eṉketai̱sha Yúsnan pujurin armia nuja̱i̱ ashí iimiainiamunam katia̱rarmiayi. 12Núnisaṉ Muisais timia nuja̱i̱ métek Ruwinkia uchirí̱sha Kaata uchirí̱sha tura Manasésa uchirí̱ṉkia jímiapetek nakaakarmia nuka meseta iwiarnatkaru Israer shuarnum eem katia̱rarmiayi. 13Uunt Yus íimmianum kuaraintia mir suntar mesetan aya ajattsar Jirikiú pakari̱ni̱ mániattsa wéarmiayi. 14Tura nu tsawantin Uunt Yus Jusuin naṉkamantu awajsámiayi. Túramtai Israer shuar iisar Muisaisan ashamkarmia núnisaṉ ashamkarmiayi.
15Uunt Yus Jusuin chicharuk 16“Yúsnan pujurin Uunt Yusna Eṉketáin juinia nu Jurtan entsanmaya̱ṉka jíinkitiarum tiartá” tímiayi. 17Nuya̱ṉka Jusuí Yúsnan pujurniun chicharainiak “Jurtannumia̱ṉka jíinkitiarum” tiármiayi. 18Tutai Yúsnan pujurin Uunt Yusna Eṉketáin juarmia nuka Jurtan entsa ajapéri̱nia̱ jíinkiarmiayi. Tura kukar jíintsaru ai̱ṉ Jurtanka ataksha tímiatrusaṉ piak awa̱a̱msamiayi.#4:18 Jus. 4:19-24 Shuar chichamnum yapaji̱áchmaiti.
©2009 Avant Ministries in cooperation with Wycliffe Bible Translators, Inc. All rights reserved.