Isa. 8
8
Uunt Yus Israeran tura Jutan Asirian akuptuk asutiámu
1Nuyá̱ Uunt Yus chichartak “Numi waṉkaram nakakmanum paant áujsamnia émamkesam MAJER-SHARAR-JÁSH-PAS#8:1 Nuka “Wárik akantratin árutsuk yaruaktin” támaiti. aartá.
2Nuyá̱ nekasaiti turutiartinian Jiwirikiása uchirí̱ Sakaríasan tura Yúsnan pujurin Uríasan achikiármajai” tímiayi Yus. 3Nuwa̱ Yúsnan etserin nua̱r ajasmai. Niji̱a̱i̱ tsaniṉkian ajaprumtikian uchin takumtiksamjai. Túramtai Uunt Yus chichartak “Majer-sharar-jásh-pas anaikiata” turutmiai. 4“Warí úchikia chichatan juáruk ‘apá’ ‘nukuá’ tutan juártsa̱i̱ṉ Tamasku warirí̱n tura Samaria warirí̱ncha ata̱a̱rman akantrar Asiria úunt akupniuri̱i̱n yaruakartatui” turutmiai.
5Ataksha Uunt Yuska nu arant chichartak
6“Kame ju̱ aentska Seruí entsa miaaku waana nuna nakitrar
antsu Resen nuyá̱ Remaríasa uchirí̱ji̱a̱i̱ warasarmai.
7Tuma asamtai Uunt Yus nincha Asirianmaya̱ úunt akupniun ti kakaram entsa ama̱a̱rna núnis akuptúrmakartatui.
Túram ti ama̱a̱rak ashintsan pajankar emetsainia núnis túrawartatui.
8Tura ama̱a̱rak ukatak Jutanka kuntuje̱a̱ imiai amurtatui.
Núnisaṉ nanape̱n ayapá̱r ame nuṉkemín enetkattawai, ¡Emanuérá! tíniuiti.
Nekaska Uunt Yus ashamkatniuiti.
9Kame ashí nuṉkanmaya̱ aentstirmesha nekaarum ti sapijmiaktarum.
Núnisaṉ ashí nuṉka náṉkatra ímianaiyatirmesha péṉker antukrum iwiarnaktarum túrasha tí sapijmiaktatrume.
10Warí Yus iiji̱a̱i̱ pujá asamtai chícham jútaka jusattarme túrasha uminkiashtatui.
Tura átum chichasrumek túratai títiatrume túrasha peṉké turunashtatui” tímiayi.
11Warí Uunt Yus Ni kakarmari̱ji̱a̱i̱ jintintrur ju̱ aents túruinia jú̱nisam túrawaip tusa chichartak
12“Átumka ju̱ aents ashí yajauch awajsatai tusar chícham najanamu nekasaiti tusarum enentáimtusairap.
Núnisrumek ni ashamainia nusha ashamkairap.
13Antsu Ashí Akupin Uunt Yusa nu ashamakrum
aya Niṉki tunaarinchaiti titiarum
tura aya Niṉki enentáimtusrum ashamkatarum.
14Nuya̱ṉka Nisha atumí ejamtairi̱ átatui.
Túrasha Israer shuar kanakar Israer tura Jutá jímiar ajasáru ainia nu mai̱ Nin tukumkar iniatai̱ káyaiti. Nu kayanka ti itiurchat enentáimtusartatui.
Nuyá̱ nékaka tura eṉkemkatniusha Úunt Yusaiti nuka Jerusaréṉnum pujuinia núnaiti.
15Tura nui̱ pujuinia nu untsurí nui̱ tukumkar iniararmatai wáitkiasma ártatui.
Tura eṉkemkarmatai achintrartatui” tímiayi Uunt Yus.
16Tura, Uunt Yusru, akupkámu umiktin chicham winia unuiniamur ainia nuna enentáin nú áchitrakea núnis awajsam péṉker anujtúkam ikiusta. 17Kame Uunt Yus Jakupa shuari̱n ú̱mprukua núnis pujana nuna nákastatjai tura aya Níniak enentáimtustatjai. 18Wats Ashí Akupin Uunt Yus Seun nainnium pujana nu wisha tura Uunt Yus uchin surusarua nuja̱i̱ ju̱i̱ Israer shuarnum aents túrachmin túrunatta nuna Yusai̱ya̱ iniakmasti tusar apujsamuitji. 19Tura atumín chichartamainiak “Jakaan chicháu áiniana nu tura nekamin ishishmasar chicháu áiniana nusha anintrústarum” turamainiakuisha chicharkuram “Aents ¿ni Yusri̱nkia anintrúschatniukait. Iwiaakna nu jakaan anintrústinkiait?” titiarum. 20Antsu “¡Yus akupkámu umiktin chichama nu anturkartai!” títin áiniawai. Tura núnis tuíniachkuṉka nú aentska tsawant tsawantracharma núnis ajasáru áiniawai.
21Kame wekainiartata nui̱ṉkia wáitkiasma tsukamainiak ni akupniúri̱ncha tura ni Yusri̱ncha kajerkar yajauch chicharkartatui. Tura nakaas iimsar 22nuyá̱ nuṉká iimsar tí waitiainiak kiritian tura tsuumainian kúntuts aan nekaawartatui. Tura kiritniunam matsatua núnis matsamsartatui.
©2009 Avant Ministries in cooperation with Wycliffe Bible Translators, Inc. All rights reserved.