Use. 12
12
1Eprainkia áyatik nasen yuinia núniniawai.
Túmainiak nase etsa̱ jintiainmaani̱ya̱ umpuana nuna ashí tsawant takamtsuk apapéana núniniawai.
Warí Asiriaja̱i̱ chichaman najanawaru ásar aya wáitniak tura ámukatniunak ikiauntumainiawai.
Nuyá̱ asuitincha Ejiptunmaani̱ yarumainiawai.
2Tuma asa Uunt Yuska Jutanka kajerkaiti.
Tura Jakupnasha ni wekaasamuri̱ji̱a̱i̱ métek asutiáttawai.
Nuyá̱ ni túramuri̱ji̱a̱i̱ métek akikiártatui.
3Ni nukurí̱nia̱ akiintsuk ni yachí̱ saṉkani̱n achimkiámiayi.
Tura uunt ajassha Yusja̱i̱ mánaikmiayi.
4Yusa suntari̱ncha nupetak nupetmaku ajasmiayi.
Útmiayi tura seamiayi.
Núnisaṉ Pitir nuṉkanmasha wainkiamiayi
tura nui̱ Niji̱a̱i̱ chichasmiayi.
5¡Uunt Yus, Ashí Akupin Yus!
Ni náari̱ṉkia Úunt Yusaiti.
6Nui̱kia ame Yúsrumini̱ṉ ámeka waketkitia.
Tura Yusai̱ enentáimsam pujá asam
akupeamu Níniua nuna nékaseṉ ayampruiniana
nuja̱i̱ métek túrakum ame Yúsrum tuke enentáimtusam pujusta.
7Súrin kijin nekapmatai̱n métekchan takakainia
núnisaraṉ itiurchat awajkartustinian timiá enentáimtuiniawai.
8Túrasha Eprainkia chichaak “Nékaseṉ wikia kuítrintin ajasjai,
kuítniaka wínianak wáinkiaitjiai.
Winia takatrui̱ṉkia mui̱jmiainniasha
tura tunaancha peṉké yaaksha wáinkiashtatui” tawai.
9Túmaitkiuisha Wikia Ejiptunam pujumiarmena nuya̱ṉ yamaiya̱ ju̱i̱sha atumí Yusri̱ Úunt Yusaitjiai.
Tuma asam nampertin itiurniuitrum nútiksanak jutai̱ je̱a̱nmaṉ matsastatjarme.
10Yúsnan etserniun chichasáruitjiai
tura ímiaja̱i̱k wáinmancha tí nukap iniakmasaruitjiai.
Yúsnan etserin ainia nuní̱ métektaku chichamnasha chichasmajai.
11Karaatnum tunáa ákuiṉkia
nú nuṉkaka peṉké antar awajnástatui.
Tura Jirkarnum waakan máwar áesainiakuisha
ni áestutairi̱sha kaya tsairma arant tepetar ajainia núnikiartatui.
12Jakupka pisar Aramnum wémiayi.
Tura Israerka nuwa̱n wakerak chikichan takarin ajasmiayi.
Núnisaṉ nuwa̱ wakeramuja̱i̱ murikiu wáinin ajasmiayi.
13Nu arantcha chikichkí Yúsnan etserniuja̱i̱ṉ Ejiptunmaya̱ṉka Uunt Yus Israernaka jí̱i̱kmiayi.
Tura Yúsnan etserniuja̱i̱ṉ péṉker wainniakmiayi.
14Túrasha Eprainkia Yusan akajak tí itiurchat enentáimtikraiti.
Túmaitkiusha ní numpe̱ja̱i̱ṉ ni túramunka akikmaktatui.
Tura ni yajauch túramuja̱i̱ métek ni Úuntri̱ṉkia makuttawai.
Currently Selected:
Use. 12: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
