Use. 13
13
Israer shuarka peṉké amuukamu
1Eprain shuar chichainiakuiṉkia Israer shuarka ashamainiak anturiarmiayi.
Tura ukunam Eprainkia Israernum niṉki naṉkamantu awajmámsamiayi.
Túrasha najankamu yusan Páaran tikishmátu pujus jakamiayi.
2Tura nu arant tunaan túruki̱ wénak
ni kuítri̱ji̱a̱i̱ ántar yusan ni nékamuja̱i̱ untsurí niisháa najanawar
aentska nú yusan shiir awajsatai tusar áestuinia nuna
“Waaka uchich nakumka najanamun mukunáwarti” tuíniawai.
3Tuma ásar Eprain shuarka káshik yuraṉkim nuṉká utsanar
nuyá̱ sanamák meṉkana tura nase kakaram iniar tsuátan umpuí yarumna
nuyá̱ jinia mukuintiuri̱ jíiniana núnis wárik meṉkakartatui.
4Ejiptunam pujumiarmena tímianiaṉ Wikia atumí Úunt Yusri̱ntjiai.
Wíkitjiai Yus. Chíkichkia wáinkiashtatrume.
Tura chíkich uwemtikkiartincha wáinkiashtatrume antsu aya Wíkitjiai.
5Kampuntin atsú ju̱ju̱ptin entsa atsamunam pujumiarmena nui̱sha Wikia ashí péṉker wainkiamiajrume.
6Tura yurumkanka amasmajrume túramu asarum núkap yurumá ejemarum
atumí enentái̱n naṉkamantu enentáimtumakrum
Wíniaka kajinmátrukmiarme.
7Tuma asamtai Wikia úunt ya̱wa̱ núnis jintiá nákaktatjarme.
8Wikia chai̱ uchirí̱ jurukmia kajek wekaana ántsanak iṉkiuṉkartatjai.
Tura úunt ya̱wa̱ yukartana núnisaṉ
yukartakun achia̱ran tepetar amajkattajai.
9Maa Israer shuartirmiṉkia Wiki amuktatjarme.
Tuma asamtai atumniasha yaki ayamprútmakarat.
10Atumí akupniúri̱sha tura úuntri̱sha yaunchu seatmiarum nusha
¿yamaisha tui̱ṉ pujuinia?
Kame ¿niji̱a̱i̱ ashí péprunmaya̱tiram uwempratin enentáimprachmakarum?
11Kame Wi atumín suir enentáiji̱a̱i̱ akupniun anaitiukmajrume,
túrayatnak kajerkan nu akupniun jurusmajrume.
12Tura Eprainia tunaari̱ṉkia kajinmátnaki̱ tusar júukar péṉker ikiusma núnisaiti
tuma asa ni yajauch irutmampramuja̱i̱ṉ asutniáttawai.
13Uchi enentáincha akiiniatniuri̱ tsawant jeamtai péṉker jíintsuna
Eprainkia núnis asa nuwa̱ uchin takustaj tusa najaimiana núnis najaimiatniuri̱ tsawant jeartiatui.
14Seura kakarmari̱ya̱ ata̱i̱ttiajrume,
jákatniunmaya̱ uwemtikrattajrume.
Jatái̱yá, emestairmesha ¿itiurkamea?
Seurá, ame ijiukrattairmesha ¿itiurkamea? 1 Kur. 15:54-55
Wi enentáimmiaka peṉké yapaji̱áchminiaiti.
15Kame Eprain Israer shuarja̱i̱ pampaakuisha
Úunt Yusai̱ya̱ kampuntin atsú nuṉkanmaya̱ nase tarí
ni entsari̱ncha tura púkuniri̱ncha kukach awajtúsartatui.
Túrunamtai ni nemasri̱ káutkar ni kuítri̱ncha tura ni wariri̱ncha ashí yarurkartatui.
16Samarianmaya̱ aentska ni Yusri̱n nakitiáiniak
enentáimtuscharu ásar asutniáwartatui.
Kame puya̱ja̱i̱ awatiar núnisaṉ uchincha aji̱a̱rar
tura nuwa̱ ajamtin ainia nunasha ajape̱ máwartatui.
Currently Selected:
Use. 13: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
