Ams. 2
2
Muap sumamtikiamu
1Tura Jiuwá chichaak “Muapa tunaari̱nkia menaintiuiti tura ju̱ kuátruja̱i̱ṉkia asuttsukka peṉké iniaisashtatjai. Etumnumia̱ úunt akupniu ukunchí̱ncha aestuk aya ju̱yu̱ awajtúsuiti. 2Tuma asamtai jinia ekemátkan akupniu je̱e̱ Kiriutnum ainia nunasha aeskartatjai. Túram kaji̱niak kakantar Muápnumia̱ṉka untsumainiak tura kachun umpuiniakui charaatum ajartatui. 3Tura sumamtikin ainia núnaka jí̱i̱raran núnisaṉ peṉkeri̱ ainia nunasha nuja̱i̱ métek kajeṉkártatjai” Jiuwá tawai.
Jutá sumamtikiatin
4Tura Jiuwá chichaak “Jutá tunaari̱nkia menaintiuiti tura ju̱ kuátruja̱i̱ṉkia asuttsukka peṉké iniaisashtatjai. Warí Jiuwá akupeamuri̱nkia nakitrar Ni chichame̱ncha umirkacharuiti. Túmainiak ní wáitri̱n anaṉkawaram Ni we̱a̱tri̱ túrawarmia nunak túruiniak ántar yusan umirkaruiti. 5Tuma asamtai Jutanka jiji̱a̱i̱ akupniu je̱e̱ Jerusaréṉnum ainia nunasha ekemátrartatjai”.
Israer sumamtikiatin
6Jiuwá chichaak “Israer shuar tunaari̱nkia menaintiuiti tura ju̱ kuátruja̱i̱ṉkia asuttsukka peṉké iniaisashtatjai. Kame umitmákcha ainia nuna kuitji̱a̱i̱ surukaruiti tura kuítrinchanka jimiará sapatja̱i̱ yapají̱niak yajauchin ti túrawaruiti. 7Tura kuítrincha ainia nuna muuke̱n nuṉká ju̱yu̱ri̱ya̱ najatainia núnis tura péejchachiniu átinia nuna arantutsuk atantáiniawai. Nú arant apasha ni uchirí̱ji̱a̱i̱ nu nuwa̱nak tsanirmainiak winia naar péṉkera nuna yajauch awajsaruiti. 8Wariṉkish íkiamuk pushiri̱n ikiukmian najanamu yus aestutai̱niam áintrar kánuiniawai. Tura akikmaktinia nu akikmakma kuitji̱a̱i̱ wíniun sumakar ni najanamu yusri̱ enentáimtutai̱ je̱a̱nam úmuiniawai.
9Kame Wisha ni iimiainiamunmaṉ Amur aentsun sétrua ímianu yakí̱ tura numi uunta ensena ímianu áinianak nérentuk tura nantujtuk amukármiajai. 10Tura Wiki Ejiptunmaya̱ jí̱i̱kin Amur aentsu nuṉke̱ akintrukmintrum tusan kuaraintia uwí kampuntin atsú nuṉkanam yaruakan ewekámsamiajrume. 11Kame atumí uchirí̱n Yúsnan etserin tura natsancha nasaréu ártí tusan akankarmajai. Nuka nekaschakait Israer shuará” tawai Jiuwá. 12“Túrasha átumka nasaréu winiu ármarme tura Yúsnan etserniusha Yus chicham etserkatin suritkiamarme. Wek. 6:1-8 13Nu tura asaakrumin Wisha atumín kame karetanam trikiu áimkiamuja̱i̱ chanúa náṉkana áitkiattajrume.
14Tura wárik wekainiaitiataṉ pisarchattawai ántsaṉ kakarmancha ni kakarmari̱ṉkia yáiṉchattawai. Núnisaṉ ti kakarmasha ni iwiaakmari̱ uwemtikrashtatui. 15Tíshimkiun unuimiátraitiataṉ peṉké jeashtatui, kakaram wekainiusha uwemprachartatui. Tura kawainium eketainia nusha ni iwiaakmari̱ṉkia péṉke uwemtikrachartatui. 16Nu tsawantinkia ashí naṉkaamas kakarma nu pisaksha misú pisartatui” tímiayi Jiuwá.
Currently Selected:
Ams. 2: jiv
Highlight
Copy
Compare
Share
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
