Tur. 10

Pítiur Kurniriuja̱i̱

1Sesarianam Kurniriu náartin suntara uuntri̱ pujumiayi. Ni suntari̱ Itiaria nuṉkanmaya̱ ármiayi. 2Nu uunt Kurniriu ni shuari̱ji̱a̱i̱, Yuska naṉkamantuiti, tu enentáimtiarmiayi. Tuma ásar Yusan enentáimtin ármiayi. Tura nútiksaṉ kuítniasha takakchan yáiṉtaj tusa Israer shuaran súuyayi. Tura tuke tsawant Yusan áujtiniuyayi. 3Chíkich tsawant nantu aaṉku ajasái Kurniriu íimiarmiayi. Yusa suntari̱ Yus nayaimpinmaya̱ akupkámu, ni pujamunam utuá “Kurniriuá” tímiayi.

4Kurniriuá tutai Yusa suntari̱n ashamak iimia pujumiayi. Tura “¿Warimpiait, Uuntá?” Tutai Yusa suntari̱ tímiayi “Ame seamun Yus anturtamkai. Tura atsumainia nu yaya̱kmin Yus shiir enentáimturmawai.” 5Tura Yusa suntari̱ Kurniriun tuke chicharuk “Wats, áminiuram Júpiniam akupkata. Semuṉ chíkich naari̱ Pítiur, tatí tusam akuptukta. 6Nu Semuṉsha chíkich Semuṉja̱i̱ pujawai. Nuka nuapen iwiarin Semuṉkaiti. Tura ni je̱e̱sha nayantsanam ayamach pujawai. Nui̱ jeawakmin ame túrattamna nuna Semuṉ Pítiur turamtatui” tinia ikiukmiayi. 7Tura Yusa suntari̱ waketkimtai Kurniriuka ni takarniúri̱n jímiaran itiamiayi. Tura suntaran chikichkiniak nemarsat tusa itiamiayi. Nu suntar ni írutramuri̱yayi. Tura Yusan enentáimtiniuyayi. 8Kurniriusha ni túrunamuri̱n ashí ujáa ujá awajás Jupi péprunam akupkarmiayi.

9Kashin tsawantai̱ Kurniriu suntari̱ Júpiniam nuntumsarai̱ tutupin ai̱ Pítiur je̱a̱ yakiri̱ wákmanum Yusan áujsatajtsa wakamiayi. 10Pítrusha ti tsukamak yurumátaj tusa wakerimiayi. Túrasha yurumkan iniarainiai̱ Pítiur íkiajtiusmak 11nayaimp uranmianum waṉkaram tarachia ánin tura nuna tsakari̱n jiṉkiakman táarun wainkiamiayi. 12Nu tarachnium yajasma irunmiayi. Wekainiusha, nanamtincha, tura napisha eṉkemiarmiayi. 13Tumai̱ Pítrun Yus chicharuk “Pitru, nantakím maam yuátá” 14tutai Pítiur chichaak “Atsá Uuntá. Ii Israer shuartikia yajauch yajasma ainia nu tura yúatin surimkiamu ana nuka peṉké yúchaitji. Tuma asamtai jú̱naka wikia yúashtatjai” tímiayi. 15Túrasha Pítrun ataksha Yus chicharuk “Wi péṉkeraiti tájana nu yajauchiti tiip” tímiayi.

16Nuka menaintiú túrunamiayi. Tura nuya̱sha tarach ataksha nayaimpiniam wakamiayi. 17Nuna túrunan wainiak Pítiur wariniak ániuncha wáinkiaj tusa enentáimia pujái̱ uunt Kurniriu aya̱kma armia nu Semuṉka je̱e̱n tui̱ pujá anintruiniak jeawariayi. 18Tura jeawar kakantar untsumainiak “¿Semuṉ Pítiur, ju̱i̱ṉ pujá?” tiármiayi. 19Tura Pítruka íimiarmari̱n tuke enentáimia pujái̱ Yusa Wakaní̱ chichaak “Menaintiú áishmaṉ untsurmainiawai. 20Wi akupkámu asamtai nantakím akaikitia túram arantutsuk nemariarta” tímiayi. 21Nuna antuk Pítiur taramiayi. Tura áishmaṉkan Kurniriu akupkámia nuna wajainian wainiak “Witjiai. Átum e̱a̱trumna núitjiai. ¿Warí tarintrum?” 22Tutai nisha chichainiak “Iisha uunt Kurniriu akupkámu taji. Kurniriuka péṉker áishmaṉkaiti tura Yusan enentáimtiniaiti. Tura Israer shuaran nin shiir enentáimtuiniawai. Kame nuik Yusa suntari̱, tunaarincha nu, ii úuntri̱n chicharuk ‘Pítrun untsukat akupkata. Ni tatí. Tura ni títiatna nu péṉker anturkata’ tímiayi. Nuna ii úuntri̱n takui̱ iisha winiji” tiármiayi.

23Tutai Pítiur je̱á̱ awayá̱miayi. Tura nu kashi nui̱ kanararmiayi. Kashin tsawa̱rar Pítiur niji̱a̱i̱ wéarmiayi. Túrasha Júpinmaya̱ Yus shuarsha nin nemariarmiayi. 24Nuyá̱ tsawa̱rar Sesarianam Kurniriu nákamun jeariármiayi. Kurniriuka ni shuari̱n tura ni nekas amikri̱n nekaatarum tusa untsuk ikiaankamiayi. 25Tura Pítrusha jeamtai Kurniriu a̱a̱ jiintiuki̱ Pítrun tikishmátramiayi. 26Túrasha Pítiur awajki̱ chichaak “Wajaktia. Wisha áentsketjai. Amea núnisketjai” tímiayi. 27Tura chichasar je̱á̱ waya̱warmiayi. Tura wayá̱ untsurí aents matsatun wainkiamiayi. 28Nuyá̱ Pítiur chichaak “Amikrua, atumsha nékarme. Iin Israer shuartinkia chíkich aentsja̱i̱ pachiniarchatniuitrume. Tura ni je̱e̱ncha waya̱shtiniaitrume iin jintintramin turamainiaji. Túrasha Yuska ni enentáimsamuri̱n wíniaka paant iniaktursayi. Túmaitkiui wikia náṉkamas aentsun yajauchiti tura auka wapikiaiti tíchamniaitjiai. 29Tuma asamtai untsurkurmin páchitsuk winimjiai. Túmaitkiui nekaataj tusan wakerajai. ¿Urukamtai untsurkamarum?” tímiayi.

30Tutai Kurniriu chichaak “Kuatru tsawant naṉkaamasai̱ tura nantusha ju̱ni̱ ai̱, wikia yurumtsuk Yusan áujsamjai, kí̱arai̱ áujsatin ana nuna. Túran wí chicha̱i̱ṉ áishmaṉ ni entsatái̱ri̱ wincharpátniun naka wajatran wainkiamjai. 31Nisha chichartak ‘Kurniriu, Yus ame áujman anturtamkayi. Tura shuar atsumainia yáiṉmamna nunasha nekarmayi. 32Tuma asamtai Júpiniam akatrámuram akupkata. Semuṉ Pítrun itiati. Nu Semuṉ Pítrusha chíkich Semuṉja̱i̱ pujawai. Nuapen iwiarin Semuṉkaiti nuka. Tura ni je̱e̱sha nayantsanam ayamach pujawai. Nisha taa ámin chichartamkattawai’ turutmiai. 33Túrutkui wi umikian ámin utitiá tusan aentsun wárikmasan akuptúkjame. Tura nékaseṉ taume. Tuma asamtai iisha ju̱i̱ Yus íimmianum pujuiniaji. Tuma asamtai ashí Uunt Yus ámin au ujakárta túramna nu, iisha antuktai tusar pujaji” tímiayi Kurniriu.

Kurniriu je̱e̱n Pítiur etserkamu

34Nuyá̱ Pítiur chichaak “Ayu. Yus íimmianum ashí aents métekrak áiniawai nekas nékajai. 35Antsu ashí nuṉkanam náṉkamas aents Yusan umirak péṉker tura nuna Yus nú aentsun shiir enentáimtawai. 36Yuska shiir chichaman Israer shuarun akuptúkmiayi. Nui̱ chichaak ‘Shuar Jesukrístu náari̱n páchiakka Yusja̱i̱ nawamnaikiatin átiniaiti. Nú Jesukrístu ashí shuara Úuntri̱nti’ tímiayi Yus. 37Túrasha Kariréanam naṉkaamak ashí Israernum túrunamia nu paant nékarme. Imiakratin Juaṉ imiaak etserak amukmia nú tsawantin naṉkamamiayi. 38Tura ju̱sha nékatsrumek. Nasarétnumia̱ Jesus, Yus Anaikiamu asa, Yusa Wakaní̱ kakarmari̱ji̱a̱i̱ péṉker túriniuyayi. Iwianchruku wáitias pujuarmia nuna péṉker awajsámiayi. Yus Niin pujurma asa ashí nuna túriniuyayi. 39Tura Israer shuar matsatkamunam tura imia Jerusaréṉnumsha Jesus túramia nu iisu asar iisha étsereaji. Tura Nin achikiar krúsnum mácharmakia. 40Tura menaintiú tsawant jeamtai Yus Nin iniantkímiayi. Tura ataksha iwiaintiurtamkachmakajⁱ. 41Ashí aentsnumka wantinkiachmiayi. Antsu íiniak nuik etserin atarum tusa Yus achirmákmiaj nú aentstiniak wantintiurmakmiaji. Au nekas jakamunmaya̱ nantakmiatai iisha Niji̱a̱i̱ tsaniṉkiar yurumámji. 42Tura Jesussha iin akuptámkaitji. Jesuska ‘Witjiai Yus Anaikiamun. Ashí aentsun ju̱ka makuumawai túrasha ju̱ka makuumatsui, Wiki títiniaitjiai. Kame ashí aentsun jaka ainia nuna tura iwiaaku ainia nunasha, Wíkitjiai nuna títinian’ tímiayi Jesus. Nusha átum werum ujatruktarum, Jesus turammaji. 43Ya shuarak Jesusan enentáimtak ni náari̱n pachia nú shuarnaka tunaari̱n tsaṉkurattawai, nuna ashí Yúsnan etserniusha yaunchu etseriarmiayi” tímiayi.

Israerchan Yusa Wakaní̱ tarurma

44Tura Pítiur tuke chichaak pujái̱ tura chikicha antúu pujuiniai̱ Yusa Wakaní̱ tarurarmiayi. 45-46Tuma ásar aṉkant aṉkant chíkich chichamja̱i̱ chichasarmiayi. Túmainiak “Yus tí peṉkeraiti” tiármiayi. Tura Israer shuar Yus shuar armia nuka Pítruja̱i̱ taarmia nu nuna antukar ti enentáimsarmiayi. Maa, Yusa Wakaní̱sha Israer shuarcha ainia nunasha tarurcharaik, tu enentáimsarmiayi 47Túmakui̱ Pítiur chichaak “Ju̱ aents imiantinian ¿yaki surimkiat? Warí nincha iiya áintsaṉ Yusa Wakaní̱ tarurcharaik” tímiayi. 48Nuyá̱ Pítiur Jesukrístu náari̱i̱n imiantiarum tusa akupkarmiayi. Tura nuya̱sha Pítrunka niji̱a̱i̱ ishichik tsawant pujustinian seawarmiayi.

Currently Selected:

Tur. 10: jiv

Highlight

Copy

Compare