Tur. 9

Sauru Jesusan umirkámu

(Tur. 22:6-16; 26:12-18)

1Nuna tumai̱ Jerusaréṉnum Uunt Jesusan umirkarun maatai tusa áujmattanka Sáuruka peṉké iniaichamiayi. Tuma asa Yúsnan pujurniu úuntri̱n iyutaj tusa werimiayi. 2Tura jearí chichaak “Papí ame náarmiji̱a̱i̱ áaram surusta. Wi nu papí jukin timiai Tamasku péprunam jean Israer shuar iruntai̱niam waya̱ttajai. Túran nú papiji̱a̱i̱ Jesusan umirkaru ainia nuna náṉkamsan achikiártatjai. Túran áishmaṉnasha nuwa̱ncha achikian jiṉkian, ju̱i̱ Jerusaréṉnum eṉkeataj tusan ikiaankattajai” tímiayi. 3Tura papí susam Sauru jintiá weai̱ Tamaskunam nuntumsai̱ nui̱ aya aneachma nayaimpinmaya̱ tsáapin jíitsumir nin téntakmiayi. 4Túrunamtai Sauru nuṉká iniaarmiayi. Tura nayaimpinmaya̱ chichaamun antukmiayi. “Sauru, Sauru, ¿urukamtai yajauch awajtústaj tusam imiá pataaturam?” tímiayi. 5Táman antuk “¿Amesha, yáitiam, uunta?” tímiayi Sauru. Tutai ataksha chichaak “Wikia Jesusaitjiai. Ame pataaturmena núitjiai. Wí aents pataatamna nui̱ amek enentáimin yajauch awajmámsame, waaka saṉkanmiak numin ijiuma núnikiume” tímiayi. 6Nuya̱ṉka Sauru sapijin kurakmaikia chichaak “Nuiṉkia Uuntá, ¿wi warinia itiurkat tusamea wakeram?” Tutai Uunt chichaak “Wajakím weme péprunam waya̱ta. Nui̱ jeawakmin ame túrattamna nuna turamiartatui” tímiayi.

7Tura Sáuruja̱i̱ irunar wéarmia nu, chichaamun antukarmiayi. Tura aentsnaka peṉké wáinkiacharmiayi. Tuma ásar ti ashamkarmiayi. 8Nuyá̱ Sauru nuṉká tepá nantakmiayi. Tura wainmaktaj tukamá wainmakchamiayi. Tuma asamtai chíkich shuar uwejnum eṉkekiar Tamaskunam júkiarmiayi. 9Nui̱ jeá íimtsuk tura yurumtsuk núnisaṉ umutnasha úmutsuk menaintiú tsawant pujumiayi.

10Nui̱ Tamaskunam Yus shuar Ananías ámiayi. Nin mesekranam Uunt Jesus chicharuk “Ananíasa” tutai “¿Warí wakeram, Uuntá?” tímiayi. 11Nuyá̱ Uunt Jesus chichaak “Nantakim jintia, Naka tutaiya nui̱ wetá. Nui̱sha Jútasa je̱e̱n jeam Társunmaya̱ Sáurun e̱a̱ktaj tusan winijiai, titiá, tímiayi. Nisha Yusan áujuk pujawai. 12Tura ju̱na mesekranam Sáurun ipiatkámjai. Áishmaṉ wayá̱ ni uwejé̱ja̱i̱ ántiawai ataksha íimit tusa. Nú aishmaṉka ámetme, Ananíasá” tímiayi Jesus. 13Táman antuk Ananías chichaak “Túrasha Uuntá, jú̱ aishmaṉ ame áentsrumin Jerusaréṉnum ti yajauch awajchakait. Ni yajauch túramuri̱n ti untsurí aents ujatainiawai. 14Tura yamaisha Yúsnan pujurniu peṉkeri̱ ainia nuna papirí̱n takakui. Tura nuja̱i̱ ame náarmin páchiaj nuna achik jukitiaj tusa tímiaja̱i̱sha tarutramji” Ananías tímiayi. 15Tutai Uunt Jesus chichaak “Ántkisha wetá. Jú̱ aishmaṉkan winia etserniur atí tusan Wi achikjiai. Nisha Israer shuarchancha tura úunt akupniuncha tura Israer shuarnasha wínian etserin átatui. 16Tura Sauru winia náarun pachia asa tí waitsattana núnaka nin iniaktustatjai” tímiayi Jesus. 17Tura Jesus táman umirak Ananías Sauru pujamunam wémiayi. Tura je̱a̱ wayá̱ uwejé̱n awantas chichaak “Yatsur Sauru, Uunt Jesus jintiá wantintiurmakmamna nusha ame ataksha ame íimit tura Yusa Wakaní̱sha enentáimin pimiutramkat tusa winia akuptúkai” tímiayi. 18Nu chichamaik ni ji̱ya̱ namaka saepe̱ya ánin iniaarmiayi. Túrunamtai ataksha íimmiayi. Túruna wajaki̱ we imiantmiayi. 19Nuya̱sha yurumámiayi. Tura yurumásha kakaram ajasmiayi. Tura Yus shuarja̱i̱ Tamaskunam wárumchik tsawant pujusmiayi.

Sauru Tamaskunam étserma

20Nuya̱ṉka Sauru Israer shuara iruntai̱ri̱n wayá̱ Jesusa túramuri̱n etserkamiayi. Etseruk chichaak “Nekasaiti, ju̱ Jesus Yusa Uchirí̱nti” tímiayi. 21Nuna ashí anturú pujuiniaka “¿Ausha urukakua ania? tiármiayi. Enta jú̱ aishmaṉsha Jerusaréṉnum Jesusan enentáimtuinian ti pataatimia núchakait. Tura tímiaja̱i̱sha nuna achik Yúsnan pujurniu peṉkeri̱n jukitiaj tusa tamia núchakait” tiármiayi. 22Tura Sáurusha sapijmiatsuk etsermiayi. “Ju̱ Jesus nekas aentsun Uwemtikniuiti” tu etsermiayi. Tura ti paant étserkui Tamaskunmaya̱ Israer shuar nekaschaiti titiaj tukamá tujintkiarmiayi.

23Tura ukunam Israer shuar Sáurun maatai tusar chichaman jurusármiayi. 24Tura Sáurusha nu chicham jurusman nekamamiayi. Israer shuar pepru jíinmanum tuke tsawai̱sha káshisha achikiar maatai tusar jintian akirtiarmiayi. 25Nuna antukar Yus shuar Sáurun chaṉkinnium kashi eṉkeawar itiararmiayi. Pepru wenukri̱n itiarar awemarmiayi.

Sauru Tamaskunmaya̱ Jerusaréṉnum wema

26Tura Sauru Jerusaréṉnum jeá Yus shuarja̱i̱ iruntrattsa wakerimiayi túrasha niṉkia ashamiarmiayi. Sáurusha nekas Yus shuar ajaschaiti tusar ashamiarmiayi. 27Túmainiai̱ṉ Pirnapí Jesusa akatrámuri̱ matsatmanum Sáurun jukimiayi. Tura nui̱ ejé chichaak “Ju̱ Sauru jintiá wesa Uunt Jesusan wáinkiaiti. Tura Yus chicharkaiti. Tuma asa Sauru Tamaskunam sapijmiatsuk Jesusa náari̱n etserkaiti” tímiayi. 28Tura Sauru Jerusaréṉnum juákmiayi. Tura Yus shuarja̱i̱ irunar pujumiayi. 29Nuya̱sha Yus, etserkata tutai, sapijmiatsuk Jesusa túramuri̱n etsermiayi. Tura Israer shuar Kriaku chichaman chicháu armia nu nui̱ pujuarmiayi. Sáurusha nu shuarja̱i̱ áujmatsarmiayi. Túrasha nu shuar Sáurun itiur mátjik tusar chichaman juriarmiayi. 30Tura Yusai̱ yachi armia nu, chicham jurusman nekaawarmiayi. Neka ásar Sáurun Sesaria peprunam júkiarmiayi. Tura nuya̱sha Tarsu péprunam akupkarmiayi.

31Tura Jutanmaya̱, Kariréanmaya̱sha, Samarianmaya̱sha Yus shuar shiir aṉkant ajasár kakaram ajasármiayi. Yusan ashamainia ásar tura Yusa Wakaní̱ yaya̱mu ásar kaweṉki̱ kaweṉki̱ wéarmiayi.

Pítiur Eneasan yaiṉma

32Tura Pítruka Yusai̱ yachi̱ armia nui̱ iráa wekaimiayi. Wekaak Yus shuar Rítianam matsamármia nui̱sha iraumiayi. 33Nui̱sha Rítianam jeá áishmaṉkan Eneas náartinian wainkiamiayi. Nisha emearu asa wekaicha uchu uwí aya tépenuyayi. 34Tura Pítiur chicharuk “Eneasa, Jesukrístu tsuármawai. Nantaktia. Tura esekmatai̱ram iwiarata” tímiayi. Tutai Eneas nu chichamaik nantakmiayi. 35Nuna túman wáinkiar Rítianmaya̱ aents tura Sarunmaya̱ aentssha enentáimprar Uunt Yusan nemarsarmiayi.

Túrkas iniantkímiu

36Túrasha Jupi péprunam nuwa̱ Yus shuar pujuyayi, ni naari̱ Tapitia. Tura nusha Kriaku chichamja̱i̱ṉkia Túrkas tuíniawai. Nu nuwa̱sha nui̱ pujus tuke péṉker túriniuyayi. Tura nisha nútiksaṉ ya̱i̱ wémiayi. 37Nu tsawantinik Túrkas suṉkuran jateemak jakamiayi. Túrunamtai aya̱shi̱n nijiarar yakí̱ tesamunam áepsarmiayi. 38Jupi péprusha Rítianmaya̱ tíjiu̱ch ámiayi. Júpinmaya̱ Yus shuar Rítianam Pítiur pujan nekaawar jimiará áishmaṉkan akatrar akupkarmiayi, Júpiniam wari winití tusar. 39Nui̱ tutai Pítiur niji̱a̱i̱ wémiayi. Tura támatai jaka tepemia nui̱ awayá̱warmiayi. Nui̱ waya̱mtai waje̱ pujuarmia nu útkiar Pítrun téntakarmiayi. Túrawar pushiri̱n Túrkas iwiaaku pujus najankamia nuna iniaktusarmiayi.

40Nuya̱ṉka Pítiur a̱a̱ ashí akupkarmiayi. Tura nisha niṉki tikishmar Yusan áujsamiayi. Nuya̱sha nuwa̱n jaka tepan iis chichaak “Tapitia nantaktia.” Tutai nisha iimi Pítiur wajaan wainiak nantaki̱ pujusmiayi. 41Tura Pítrusha nuwa̱n uwejnum achik awajkimiayi. Tura iniais Yus shuar armia nuna tura waje̱ncha untsukar Túrkas iwiaaku ajasún iniaktusarmiayi. 42Nu túrunamun ashí aents Jupi péprunmaya̱ nekaawarmiayi. Túrawar untsurí aents Uunt Jesusan nekas winia úuntruiti tiar enentáimtusarmiayi. 43Tura Pítruka Jupi péprunam untsurí tsawant nuapen iwiarin Semuṉka je̱e̱n pujusmiayi.

Currently Selected:

Tur. 9: jiv

Highlight

Copy

Compare