1 Pit. 4
4
Ju̱ nuṉkanam wáitsatin
1Kristu ni aya̱shi̱i̱n waitsa asamtai atumsha núnisrumek wáitsatin ákuisha, katsuntratjai titiarum. Ni aya̱shi̱i̱n wáitiana nú shuar yajauchin páchiatsui. 2Antsu “iwiaakjana nui̱kia Yusa wakeramuri̱n tuke umirkátjai” tu enentáimiui. Ni aya̱shi̱ wakerana nuna yamaikia páchiatsui. 3Warí, Yusan nékainiatsna nú shuar túruiniana nu atumsha núkap túrichmakuram. Yus shuar ajatsuk tsanirmatin wakerimiarme. Yajauch túratniusha, nampernum nampekrum ti yurumárum, enentáincha ajasrum charaatum ajatniusha, najankamu yusa namperi̱i̱n yajauch ana nu najanatniusha nusha ashí wakerimiarme. 4Tura surimiatsuk yajauch túrimiarmena nu iniaisa asakrumin yaunchu atumji̱a̱i̱ nuna túrin armia nu “¿urukamtai iniaisara?” tusar yajauch áujmatramprume. 5Túrasha ukunam nu aents ni túramuri̱n etserkartatui. Iwiaaku ainia nunasha tura jákaru ainia nunasha Neka awai. Ni nu aentsun sumamtikiawartatui. 6Túrasha jaka armia nu Yusa shiir chichame̱ ujankarmiayi. Ni aya̱shi̱i̱n ashí shuarja̱i̱ métek jakamniaitiataṉ Yus iwiaaku pujana núnisaṉ ni wakaní̱ iwiaaku pujusárat tusa ujankarmiayi.
Shuar yáiṉtiniaitji
7Ashí amuukatin jeatémayi. Tuma asamtai péṉker enentáimsatarum. Túrarum anearum Yus auju pujutarum. 8Aneniamuja̱i̱ untsurí tunaasha tsaṉkuratin awai. Tuma asamtai ashí naṉkaamas nuamtak anenaistarum. 9Kajé kajeja̱i̱nchu atumí je̱e̱n itiaaniatarum. 10Iin aṉkant aṉkant shiir awajtámsatniun Yus tí nukap takakui. Tura iin shiir awajtámsamuja̱i̱ chíkich shuarsha shiir awajsatarum tusa chíkich chíkich túratniun suramsaitji. Tuma asamtai péṉker takaawa áintsarmek Yus amasmania nuja̱i̱ ame írutramuram yaiṉtá. 11Etserkatniun Yus amasuítkiuiṉkia ame támena nu Yus tana nuja̱i̱ métek atí. Chíkich shuar yáiṉtiniaitkiumka Yus amaana nú kakarmaja̱i̱ túrata. Ashí túramna nu Yusa naari̱ shiir atí tusam Jesukrístu náari̱ji̱a̱i̱ túrata. Jesukrístun ashí aents shiir enentáimtusarti. Tura ashí aentsnum ni kakarmari̱ tuke atí. Nuna tajai.
Yus shuarti wáitsatin
12Aneamu yatsurtiram, tí waitsatin nekapramsartin jeartámprumna nu nusháa enentáimprairap. Wáitsatin támatai “¿urukamtai waitsa pujaj?” tu enentáimsairap. Kame túrunamniaiti. 13Tuma ai̱ṉ shiir enentáimsatarum. “Kristu wáitsamuri̱n métek taku wáitiakun péṉkeraiti” tu enentáimsatarum. Ukunam Kristu winchari̱ wainkiarum timiá warasmi tusarum túratarum. 14Krístunu asakrumin katsekramkachartimpiash. Túmaitkiuisha Yusa Wakaní̱ shiir ana nu atumíin pujurtamkui shiir awajsámuitrume. Katsekramainia nú shuar imia Yusa Wakaní̱n yajauch áujmatainiawai. Tura átumka Yusa Wakaní̱ shiir awajearme. 15Tura atumsha yajauch túrawa̱i̱rum aneartarum. Maṉkartana nu, kasamkana nu, tunáa túrana nu tura chikichna páchiana nusha ni wáitsatniuri̱ṉkete. Atumji̱a̱i̱ṉkia nu wáitsatniuka atsutí. 16Tura antsu Krístunuiti tusar wishikramuk wáitkiarmainiakui natsa̱a̱rairap. Krístunu asam wáitiayatmek natsaamtsuk Kristu naari̱ shiir awajsata.
17Yuska ni shuari̱n nekapsatajtsa naṉkamatniuiti. Tura nu tsawantcha jeayi. Yus imia iin nekapramkuisha Yus chichaman umirainiatsna nú shuarsha urukawartiṉ. Ti asutniáwartatui. 18Imia Yus umirjinia nu uwempratniuri̱ itiurchataitkiuisha tunaan túruiniana nusha urukawartiṉ.Neka. 11:31; YKan. 1:4-5 19Tuma asamtai Yus wakeramuja̱i̱ wáitiainia nu, nisha Yus najanamu asa Yus íirsati tusa tuke péṉker túrati. Warí, Yuska tuke péṉker túrichukait.
Currently Selected:
1 Pit. 4: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.